Hebre 7

Hkyangjong Melahkizedek É Hkyô

1Melahkizedek gi, Salem wà mó é hkóhkâm eq Myhang Htâng é Garai Gasâng é hkyangjong nghut ri. Yhang gi, hkóhkâm pé lé sat ung pyám luî dum taû lo é Abraham lé hui mù, shimân byi bê nghut ri. 2Haû mù, Abraham gi, wó lo é jung hkangmó mâ é, xê gàmbùm mâ é ragàmbùm, yhang lé byi bê nghut ri. Sânghi lhê é Melahkizedek é myìng lichyúm gi, “díngmán hkyo é hkóhkâm” gâ é nghut mù, htâng lhê é “Salem é hkóhkâm” gâ é gi, “nguì ngón hkyo é hkóhkâm” gâ é nghut lhê. 3Yhâng é înu îwâ é hkyô eq byùxik labaû le, hi é buìnyì eq chyungxe htûm é hkyô le a kâ to nghut ri. Yhang gi, Garai Gasâng é Yhangzo su, ahtum abyùq hkyangjong ru nghut nyi ri.

4Yhang hkâ-í hkìk lhê nghu é lé, myìt wú keq. Haû îchyí îwa Abraham lháng gi, wó lo é mâ é xê gàmbùm mâ é ragàmbùm, yhang lé byî rî-nhung! 5Hkyangjong dùt bang Lewiq é awùt ashín pé gi, yhángmòq é gu-mang wuì, Abraham mai nyi gyó lo é bang nghut kôle, târâ má bo é eq rajung za, haú bâng chyáng mai xê gàmbùm mâ é ragàmbùm lé hkyui yù râ dùt é bang nghut akô. 6Nghut kôlhang, Melahkizedek gi, Lewiq mai gyó lo é a-myû a nghut kôle, danghtum htûm tô é pé wó to sû nghut é Abraham chyáng mai xê gàmbùm mâ é ragàmbùm hàp yù mù, shimân byî ri. 7Shimân byi sû gi, shimân byî é lé hkam yù sû htoq je gyaú sû nghut é lé, ó yùq le uq-o râ hkyô a jòq é nghut lhê. 8Hkyangjông pé eq séng luî ga jáng, shi byùq sê é byu èq, xê gàmbùm mâ é ragàmbùm lé hkyui yu é nghut lhê; nghut kôlhang, Melahkizedek eq séng luî nghut jáng, chyungxe dui nyi é ga taî pyô byî é huí su èq hkyui yu é nghut lhê. 9Xê gàmbùm mâ é ragàmbùm hkyui yù sû, Lewiq lháng gi, Abraham dông mai xê gàmbùm mâ é ragàmbùm byi bê nghû wó taî ri. 10Haî mù gâ le, Melahkizedek gi, Abraham lé huî é hkûn, Lewiq gi, yhâng é îchyí îkê é gùngdu hkaû má ru bo tô ashî nghut ri.

Melahkizedek Eq Du É Yesuq

11Haû Lewiq hkyangjong a-myû pê é i-pyàt má, byu pé gi, jep é târâ lé wó yu bùm kô é nghut mù, hkyangjong ayá haû mai gúmjùp hkyô wó yû kô é nghut le gi, haî mù luî, Arun wó é hkyangjong ayá hkyô dông a nghut é za, Melahkizedek wó é hkyangjong ayá hkyô dông lo é sû gótû hkyangjong rayùq ra shirâ lhú? 12Hkâsu mù gâ le, hkyangjong a-myû htaî é hkûn gi, târâ le htaí yhang htaí râ dùt é nghut lhê. 13Haû su nghû taî é hkyô pé eq sêng é Sû gi, gótû byùhú mâ é sû nghut mù, byùhú haû mai gi, ó yùq le hkungga gyàp má dójaú wú é a nghut. 14Hkâsu mù gâ le, ngá-nhûng é Yhûmsîng gi, Yudaq byùhú mai gyó lo é awùt ashín nghut é hkyô, san za nghut nyi ri. Mosheq kúm gi, byùhú haû eq sêng é hkyô má, hkyangjông pé eq séng luî haî lé a taî é nghut lhê. 15Melahkizedek eq du é gótû hkyangjong rayùq nyi htoq bê nghû, ngá-mòq taí bê hkyô gi, je riyhang san za dùt bê nghut ri. 16Yhang gi, îwa rayùq é awùt ashín pé nghut râ lhê gâ é târâ dông hkyangjong rayùq lé dùt é a nghut é za, a wó lhoqhtên é chyungxê é a-tsam eq rajung za lé dùt é ru nghut lhê. 17Hkâsu mù gâ le,

“Nàng gi, Melahkizedek wó é hkyangjong ayá hkyô dông mai, ahtum abyùq hkyangjong rayùq nghut nyi ri.”#Hkya-on 110:4

ga Yhang eq séng luî taî pyo tô é nghut lhê.

18Haû hí lhê é cháng ra târâ gi, wum nyhôm é eq a-kyû a bo é yánmai, tô pyám bê nghut lhê. 19Hkâsu mù gâ le, haû jep é târâ gi, gúmjùp hkyô haî a wó kut byî é nghut lhê. Haû mù, je ge é myìt myòqbyù hkyô lajang byî é nghut luî, ngá-nhúng gi, myìt myòqbyù hkyô haû mai Garai Gasâng chyáng wó chyâng htèp e é nghut lhê.

20Myìt myòqbyù hkyô haû gi, dakâm hkyô a bo é a nghut myhî-nhung! Góbang gi, dakâm hkyô a bo é za hkyangjông pé wó dùt bekô nghut ri. 21Nghut kôlhang, Yesuq kúm gi,

“‘Nàng gi, ahtum abyùq hkyangjong rayùq nghut lhê.’

ga haû Yhûmsîng dakâm bê nghut mù, Yhang myìt é hkyô htaí râ a nghut.”#Hkya-on 110:4

ga, Yhang eq séng luî Garai Gasang taî é hkûn, dakâm dang haû mai hkyangjong rayùq dùt bê nghut ri. 22Dakâm dang hau é yánmai, Yesuq gi, je ge é dangshikaq é wòwùn yù sû dùt bê nghut ri.

23Hkyangjông pé myo myo nyì râ dùt é gi, yhángmòq é múzó a wó xoq zui shoq shi byùq hkyo èq hkûm zing pyám kô é yánmai nghut ri. 24Nghut kôlhang, Yesuq gi, ahtum abyùq dui nyì sû nghut é yánmai, Yhang gi, hkyangjong mû ayang ru zuî nyì râ nghut lhê. 25Haû mù luî, Yhang gi, Yhang dông mai Garai Gasâng chyáng lé jé é bang lé, hkâ-nhám le wó hkyi yu é nghut lhê; haî mù gâ le, Yhang gi, yhángmòq é matú dûng tôngbán byî nyì râ matú, rû dui nyi é sû nghut lhê.

26Yesuq gi, chyoiyúng é sû, mara hûn râ hkyô a bo é sû, sân-yúng é sû, yubàk dàp bang eq rahá a nghut shoq gótû san kut huî é sû, mauhkûng pê ahtoq má lhoqtoq lhoqgyaú yù huî é sû nghut ri. Haû sû é hkyangjong mó gi, ngá-nhúng râ é lé lajang byi râ htuk ang ri. 27Nyí nyí buì buì, yhûmsing é marâ é matú hí hkungga nhông byi mù, byu pê é mara matú le hkungga nhông byî é gótû hkyangjong mó pé su, Yhang gi, a kut râ é sû nghut lhê. Yhang gi, Yhânggùng lé Yhang nhông byî é hkûn, yhángmòq é yubàk marâ é matú bànshoq radàm za hkungga nhông byi pyám bê nghut ri. 28Hkâsu mù gâ le, haû jep é târâ gi, wum nyhôm é byu pé lé hkyangjong mó pé dông masàt é nghut ri. Nghut kôlhang, Garai Gasang gi, haû jep é târâ é htâng má lé jé é dakâm dâng èq, Yhâng é Yùqzo lé masàt to bê nghut mù, Yhang gi, ahtum abyùq lhoq gúmjùp hui bê nghut ri.

Currently Selected:

Hebre 7: znot

Highlight

Copy

Compare