Hebre 5

1Hkyangjong mó yùq hkangmó gi, byu pê chyáng mai hkyin htoq yû huî é nghut mù, mara pê é matú, chyûnghuq pé eq hkungga pé nhông byi hkyô nghut é, Garai Gasang eq sêng é múzó pé má, yhángmòq é gùnglik dông, hkyin masàt to huî é bang nghut akô. 2Yhânggùng yhang gi, wum nyhóm hkyo é a‑ô má nghut nyi é yánmai, yhang gi, bun a bóng é eq hkyô nghoq ló é bang lé nú nhâm é dông wó shuî-û é nghut lhê. 3Wum nyhôm é yánmai, yhang gi, byu pê é marâ é matú le, yhânggùng yhâng é marâ é matú le, hkungga nhông byi râ dùt é nghut lhê.

4Ó yùq le, yhûmsing gùng yhûmsîng xânghpoq nge wó hkyô haû lé wó yu é a nghut; Arun lé su, Garai Gasâng èq wùt yu é hui jáng shèq wó é ru nghut lhê. 5Haû eq rajung za, Hkrisidùq le, hkyangjong mó dùt lo é hpungwup shingkang lé, Yhânggùng yhang kut yu é a nghut. Garai Gasang shèq, Yhang lé,

“Nàng gi, Ngá zo nghut lhê; Ngò gi, hkû-nyí Náng Wa dùt bê nghut lhê.”#Hkya-on 2:7

ga taî é nghut lhê. 6Hau htoq agó,

“Nàng gi, Melahkizedek wó é hkyangjong ayá hkyô dông mai, ahtum abyùq hkyangjong rayùq nghut nyi ri.”#Hkya-on 110:4

ga, gówô má le, Yhang taî tô ashî nghut ri.

7Yesuq gi, myìdàm htoq má chyungxe dui nyi é buìnyì pé má, Yhang lé, shi é mai wó hkyi yù Su chyáng, ngaùbyi ngaùnhap eq wùt garû é èq, kyûdûng é eq dûng tôngbán bê nghut mù, Yhâng é hkúngga gíng é àp nhông hkyô yánmai, gyo byî é hui bê nghut ri. 8Yhang gi, Zo rayùq nghut to kôle, Yhang hui zô é wuîhke jamjau hkyô mai jì-no gyo hkyô wó mhoq yû bê nghut ri. 9Yhang gi, lhoq gúmjùp huî é hkûn, Yhâng é jì-no gyo bang bànshoq é matú, ahtum abyùq é hkyi yù hkyo é awang dùt byùq bê nghut é eq, 10Melahkizedek wó é hkyangjong ayá hkyô dông mai hkyangjong mó dùt râ matú, Garai Gasâng èq hkyin masàt é hui bê sû nghut ri.

Sô Má Wáng Ra Bê Hkyô

11Ngá-mòq gi, shí hkyô eq séng luî taí râ gyai jòq lhê; nghut kôlhang, núngmòq gi, ra luì za a sê gyô é bang nghut kô é yánmai, taî sân kyo wuî ri. 12Gè gè ga jáng, ahkui lhê ahkyíng má, núngmòq gi, sará dùt gíng bê bang nghut lhê; nghut kôlhang, Garai Gasâng é mungdang mâ é tengmán hkyo é awang lé, rayùq yùq èq núngmòq lé dum taû mhoq byi râ ru dùt nyi akô nghut ri. Núngmòq gi, htan é zoshuq râ é bang a nghut, naú wing râ é bang ru nghut nyi ashi kó myhî-nhung! 13Naú wing shuq râ é sû ó yùq le, zonú nghut nyi ashî mù, díngmán é hkyô lé mhoqshit é má a mán shi nghut ri. 14Nghut kôlhang, htan é zoshuq gi, ge é hkyô eq agè ashop é hkyô lé wó sê gam hkoq yû shoq, hkâ-nhám le yhûmsing gùng yhûmsîng lhoqmhân yu nyi é, kô dìng bê bâng é matú ru nghut lhê.

Currently Selected:

Hebre 5: znot

Highlight

Copy

Compare