Hebre 4

Garai Gasâng É Byu Pê É Matú Bánno Jowò

1Haû nghut mù luî, Garai Gasâng é bánno jowò má wàng râ matú htûm tô é danghtum ru gîng nyi ashî nghut é yánmai, núngmòq mâ é ó yùq le, haú má a hkyit hkap é a dùt râ matú, ngá-nhúng sidìq nyì sháng. 2Hkâsu mù gâ le, yhángmòq lé gabú danglù haû hko kyo bê su, ngá-mòq lé le hko kyo bê nghut lhê; nghut kôlhang, yhángmòq wó gyô é mungdang gi, yhángmòq é matú a-kyû a bò, haî mù gâ le, haû wó gyô é bang gi, lùmjíng myìt mai a lhom hàp yù kô é yánmai nghut ri. 3Ngá-nhúng lùmjíng bê bang za, bánno jowò haú má wó wang é nghut lhê. Haú hkyô gi,

“Haû mù, ‘Ngá é bánno jowò má yhángmòq hkâ-nhám le wó wâng kôrâ a nghut.’ nghû, Ngò, nhikjum yô é èq dakâm dang taí bê nghut lhê.”#Hkya-on 95:11

ga Garai Gasang taí bê eq rajung za dùt é nghut ri. Nghut kôlhang, Yhâng é múzó gi, mau htoq xâng hkun mai ban kut to bê nghut lhê. 4Hkâsu mù gâ le, “Garai Gasang gi, nyhit nyí nghû râ buìnyì má Yhâng é múzó bànshoq mai bánno bê nghut ri.”#A-pûn 2:2 gâ é dang pé má, haû nyhit nyí nghû râ buìnyì eq sêng é hkyô lé rawò má Yhang taî tô ri. 5Bánno jowò jòq é eq séng luî, Yhang dum taî tô é gi, “Ngá é bánno jowò má yhángmòq hkâ-nhám le wó wâng kôrâ a nghut.”#Hkya-on 95:11 gâ ri.

6Bánno jowò haú má wàng râ bang ra-am nyi é, htûm tô é danghtum jòq tô ashî nghut ri; hí hkûn, gabú danglù haû wó gyô wú bê bang kúm gi, yhángmòq jì-no a gyo kô é yánmai, a wàng kô é nghut lhê. 7Haû mù luî,

“Hkû-nyí, núngmòq, Yhâng é danghtê lé wó gyo kô é nghut jáng, núngmòq é i‑myìt lé hkâ lhoqhtan to kó.”#Hkya-on 95:7-8

gâ é lé, ngò hí lé taí bê eq rajung za, Garai Gasang gi, gyai myáng é htâng má Dawiq dông mai taî é hkûn, “Hkû-nyí” gâ é buìnyì ra-nyí dum masàt to bê nghut ri. 8Hkâsu mù gâ le, yhángmòq lé, Yoshuq èq bánno jowò byi bê ru nghut le gi, Garai Gasang gi, htâng má, gótû buìnyì eq séng luî taí râ a nghut lo. 9Haû mù luî, Garai Gasâng é byu pê é matú gi, Bánno Buìnyì dông nghut é bánno jowò ru jòq tô ashî nghut ri. 10Hkâsu mù gâ le, Garai Gasang gi, Yhâng é múzó mai bánnô é su, Garai Gasâng é bánno jowò má wàng é sû gi, yhûmsing é múzó mai bánno râ nghut lhê. 11Haû nghut mù, yhángmòq é jì-no a gyo hkyo é alìk lé cháng mù lèqbàt é, ó yùq le a bò sháng gàq, ngá-nhúng gi, bánno jowò haú má wó wâng shoq, a-tsam bo é í shi-kùt sháng.

12Hkâsu mù gâ le, Garai Gasâng é mungdang gi, rû dui nyi é eq a-tsam bo é nghut lhê. Haû gi, shámsó í shut dàp é shâm htoq má je htoq é nghut mù, myìt nhiklhum eq sô lé le, wuimyoq pé eq wuinyún lé le, wó gam hkoq hkyang ròt é nghut lhê; haû gi, ngá-nhúng myìt é hkyô pé eq myìt sôn é hkyô pé lé wó jéyáng é nghut lhê. 13Hpan tô é lhúnglháng gi, Garai Gasâng é hí mai wó haq pyâm é haî le a jòq é nghut lhê. Jung hkangmó gi, ngá-nhúng, jihpán shit ra râ Su é myòq hí má a wó nghop tô é hkyô, de de dùt é nghut lhê.

Je Gyaú É Hkyangjong Mó Yesuq

14Haû mù luî, ngá-nhúng gi, Garai Gasâng é Yhangzo Yesuq nghut sû, mauhkûng pê shut hkyang dòq ló bê nghut é gyaú é hkyangjong mó lé wó é nghut é yánmai, ngá-nhúng yín yu to bê lùmjíng hkyô lé ging ging myhik zing nyì sháng. 15Hkâsu mù gâ le, ngá-nhúng gi, ngá-nhúng wum nyhôm é hkyô pé lé a sê gyo byî é hkyangjong mó wó é a nghut é za, ngá-nhúng su hkyô hkangmó má gúnglaú é huî wú kôlhang mara a bo é sû hkyangjong mó lé shèq wó é ru nghut lhê. 16Haû mù luî, ngá-nhúng gi, shogyo nhikmyîn é hkyô wó yû râ eq, ngá-nhúng râ tô é u má ngá-nhúng lé wó garúm râ jeju lé myang hô sháng gàq, hkyak lum é myìt mai Garaî jeju tánghkuq shut chyâng htèp ê sháng.

Currently Selected:

Hebre 4: znot

Highlight

Copy

Compare