A-pûn Awang 41

Hpara-uq É Yhupmòq Pé

1Hau htâng í zân laî é hkûn, Hpara-uq gi, yhupmòq rahkat mòq ri; yhupmòq haú má, yhang gi, Nile Wuìlàng yàm má yàp tô é hkûn, 2wuìlàng hkaû mai xu yúng é nojûng nyhit du htoq lô mù, wuì yàm mâ é jàm-haq zô bum akô nghut ri. 3No haú jum é htâng má, ra-tsuí le a yúng, showui gyòng gyong é gótû nojûng nyhit du gi, Nile Wuìlàng haû mai htoq lô mù, haû wuì yàm má nyi tô é nô jum é a-nàm má yàp tô bum akô nghut ri. 4Haû mù, haû ra-tsuí le a yúng, showui gyòng gyong é nojûng jùm gi, xu yúng é nojûng jùm lé zô pyám bekô nghut ri. Haú hkûn, Hpara-uq bûn lò bê nghut ri.

5Yhang gi, dum yhup myhî byùq é hkûn, yhupmòq rahkat dum myang ri; yhupmòq haú má, gùq gàm ragàm mai za, ge é, já é gùqnhâm nyhit nhâm yùq htoq lo ri. 6Haú pê é htâng má, nhân nhan é eq buìhtoq lai èq nyé kyuq tô é, gótû gùqnhâm nyhit nhâm nyún htoq lo ri. 7Nhân nhan é gùqnhâm haú pé gi, já é eq kô é gùqnhâm nyhit nhâm lé myhui pyâm akô nghut ri. Haú hkûn, Hpara-uq gi, bûn lò luî, yhupmòq nghut é lé sê ri.

8Nàpkyó nghut jáng, yhang gi, myìt myo luî, Egutuq mâ é myòqheq hpàqchyî sé bang bànshoq eq hpàqchyî bò bang lhúnglháng lé ê ji lò nhang ri. Hpara-uq gi, haú bang lé, yhâng é yhupmòq pé taî kyô ri; nghut kôlhang, hká yùq le, yhang lé yhupmòq é lichyúm a dàt hpuq kyo kó nghut ri.

9Haú hkûn, haû tsibyiq wing jaú zau hpó gi, Hpara-uq lé, “Hkû-nyí shèq, ngò râ byùq é hkyô lé myìtbûn lo ri. 10Radàm lé, Hpara-uq gi, yhâng é duìnhâng zoshâng nhik lé nhik-yo naû mù, chyungxe zúng zau hpô é yhûm má, ngò eq mùk bung zau hpó lé htóng lhûng tô é nghut lhê. 11Ngá-nhik í yùq é ra-myìn má za, ó le ó yhupmòq myang é nghut lhê; yhupmòq haû gi, yhâng é yhang lichyúm bo ri. 12Haú hkûn, chyungxe zúng zau hpô é duìnhâng zoshâng Hebre zorâm rayùq, ngá-nhik eq rahá nyi é nghut lhê. Ngá-nhik gi, yhang lé, ngá-nhik é yhupmòq taî kyo jáng, yhang gi, ngá-nhik é matú, ó le ô é yhupmòq é lichyúm lé hpuq kyô ri. 13Ngá-nhik lé yhang hpuq byî é jung hkangmó gi, roq roq yhang dùt htoq lo ri; ngò gi, ngá é jowò má dum myang zung ri; ngá é luzúm hpó gi, htaû lhâng sat pyâm é huî ri.” ga taî ri.

14Haû mù, Hpara-uq gi, Yosep lé ê shui nhang é nghut mù, Yosep gi, htóng mai hân za yhang shuî htoq yu é hui bê nghut ri. Yhang gi, nhutmui wùq pyám mù, mèbu ban htaî wùt é htâng má, Hpara-uq é hí má lé jé ri.

15Hpara-uq gi, Yosep lé, “Ngò yhupmòq rahkat myang é nghut lhê; haú lé, ó yùq le lichyúm a ge hpuq kyo kó nghut ri. Nghut kôlhang, nàng gi, yhupmòq hkaî kyo kôjáng, hau é lichyúm lé dàt hpuq kyô ri gâ é lé, ngò wó gyô ri.” ga taî ri.

16Haú hkûn, Yosep gi, Hpara-uq lé, “Ngò gi, yhupmòq a dàt hpuq kyo; nghut kôlhang, Garai Gasang gi, Hpara-uq myìt ô nau é lichyúm lé byi râ nghut lhê.” ga taî ri.

17Haû jáng, Hpara-uq gi, Yosep lé, “Ngá é yhupmòq má, ngò gi, Nile Wuìlàng yàm má yàp tô é hkûn, 18wuìlàng hkaû mai xu yúng é nojûng nyhit du htoq lô mù, wuì yàm mâ é jàm-haq zô bum akô nghut ri. 19No haú jum é htâng má, ra-tsuí le a yúng, agyòng gyòng mâ é eq gyí kyuq é gótû nojûng nyhit du le châng htoq lo ri. Ngò gi, Egutuq ming gón má, haû í a yúng é nojûng lé, hkâ-nhám lháng a myang wú é nghut lhê. 20Haû ra-tsuí le a yúng, showui gyòng gyong é nojûng jùm gi, sânghi htoq lo é, xu yúng é nojûng nyhit du lé zô pyâm akô nghut ri. 21Haú jûm gi, xu yúng é nojûng jùm lé zô pyám kôlhang, zô é su a wú htoq kó; haî mù gâ le, hí lhê su roq ra-tsuí lháng a yúng ru dut nyi bum ashi kô nghut ri. Haú hkûn, ngò bûn lo ri.

22Ngá é yhupmòq má, ngò gi, gùq gàm ragàm mai za, kô é, já é gùqnhâm nyhit nhâm yùq htoq lo é lé le myang ri. 23Haú pê é htâng má, nyhuî byùq é, nhân nhan é eq buìhtoq lai èq nyé kyuq tô é, gótû gùqnhâm nyhit nhâm nyún htoq lo ri. 24Nhân nhan é gùqnhâm haú pé gi, já é gùqnhâm nyhit nhâm lé myhui pyâm akô. Ngò gi, haú lé, myòqheq hpàqchyî bò bang lé taî kyô wú é nghut lhê; nghut kôlhang, hká yùq le, ngo lé, hau é lichyúm a dàt taî sân kyo kó nghut ri.” ga taî ri.

25Haú hkûn, Yosep gi, Hpara-uq lé, “Hpara-uq myang é yhupmòq haû í lhum gi, lichyúm rahkat za nghut ri. Garai Gasang gi, Yhang hkâsu kut râ hkyô lé, Hpara-uq chyáng hpông shit bê nghut ri. 26Haû xu yúng é nojûng nyhit du gi, nyhit zân nghut ri; haû já é gùqnhâm nyhit nhâm gi, nyhit zân nghut ri; haû gi, rajung zâ é yhupmòq nghut ri. 27Haû htâng má châng htoq lo é, ra-tsuí le a yúng, showui gyòng gyong é nojûng nyhit du gi, nyhit zân nghut é eq rajung za, haû buìhtoq lai èq nyé kyuq to mù, a-kyû a bo é gùqnhâm nyhit nhâm le, nyhit zân nghut ri. Haû gi, nyhit zân mùtmó gyó râ hkyô nghut lhê.

28Hpara-uq lé ngò taí bê eq rajung za, Garai Gasang gi, Yhang hkâsu kut râ hkyô lé, Hpara-uq chyáng tûn shit bê nghut ri. 29Egutuq ming gón má, nyhit zân agùn agó wó râ nghut lhê; 30nghut kôlhang, hau htâng má nyhit zân mùtmó gyó râ nghut lhê. Haú hkûn, Egutuq ming má agùn agó wó é hkyô lé tô-myhî pyám kôrâ nghut mù, mùtmó hau é yánmai, haú mau gi, htên byòq byùq râ nghut lhê. 31Mùtmó gyó nyi é gi, ladu yhang lai râ nghut mù, haú mau má agùn agó wó é hkyô lé myìtbun râ a nghut lo. 32Hpara-uq lé yhupmòq í hkat dông byî é hkyô gi, shí hkyô lé, Garai Gasang èq gingtíng shoq myìt hpyit to bê nghut luî, Garai Gasang gi, haú hkyô lé han é dông kut râ nghut é lé, hpông shit é nghut ri.

33Haû mù, ahkuî, Hpara-uq gi, u-nuq bo é eq hpàqchyî bo é byù ho yù mù, Egutuq ming lé wú gon râ matú, haú yùq lé wò byi aq. 34Hau htoq agó, Hpara-uq gi, ra-mau gón má mú htûng râ byù hkyin masàt to luî, agùn agó wó é nyhit zân gyoro má, Egutuq ming mâ é kyôshi myuishi ngo gâmbùm mâ é ragàmbùm lé hkong to nhâng àq. 35Haú bang gi, jé lô râ ge é zànwut haú pé mâ é zoshuq bànshoq lé tsing hkyui yù mù, Hpara-uq é ahko ahkáng mai, wà pé má zoshuq tsing hkong to ra râ nghut lhê. 36Zoshuq shí pé gi, Egutuq ming má jé lô râ nghut é mùtmó gyó é nyhit zân gyoro má chûng râ dông, mingzo dánzô é matú hkong to ra râ nghut lhê; haú hkûn, mîngdán shî gi, mùtmó gyó é yánmai, a htên byòq byùq râ nghut lhê.” ga taî ri.

37Haú hkyô lé, Hpara-uq eq yhâng é zaugun wuì bànshoq bang gyô htuk bekô nghut ri. 38Haû mù, Hpara-uq gi, yhángmòq lé, “Garai Gasâng é sô lúng é byù shí yùq sû é lé, ngá-nhúng myang hô râ nghut lhê lhú?” ga myî ri. 39Hau htâng, Hpara-uq gi, Yosep lé, “Garai Gasang gi, nang lé shí hkyô pé bànshoq sé nhâng bê nghut é yánmai, nàng su u-nuq bo é eq hpàqchyî bo é byù gótû a nyì lo. 40Nàng gi, ngá é hkóhkâm wâng lé ùp ra râ nghut mù, ngá é byu pé bànshoq bang gi, náng é dang lé gyo kôrâ nghut lhê. Hkóhkâm tángmyhâng eq séng luî za, ngò, náng htoq ko râ nghut lhê.” ga taî ri.

Egutuq Ming Lé Yosep Ùp É Hkyô

41Haû mù, Hpara-uq gi, Yosep lé, “Wú aq, ngò, nang lé, Egutuq ming gón lé ùp nhang to bê nghut lhê.” ga taî ri. 42Hau htâng, Hpara-uq gi, yhâng é lòqtsung dizìk lé, yhâng é lòqnyhui mai hkyut yû luî, Yosep é lòqnyhui má tsung byî ri. Hau htoq agó, yhang gi, Yosep lé, nú nhâm é jihkyîng pán buhîng hut luî, yhâng é lìngzing má hîng wuizo hut byî ri. 43Yhang gi, Yosep lé, yhâng a-ô mâ é ùp zaû é myanglhêng má jí nhang ri; shiwa byu pé gi, yhâng é hí má, “Hkyô hui keq!”#41:43 Hkyô hui keq! gâ é lé, hkyîhput htuq keq le gâ tô bum akô. ga taî garû bum akô. Haú dông, Hpara-uq gi, Yosep lé, Egutuq ra-ming gón lé ùp nhang ri.

44Hau htâng, Hpara-uq gi, Yosep lé, “Ngò gi, Hpara-uq nghut lhê; nghut kôlhang, náng é dang mai za a nghut jáng, Egutuq ra-ming gón má, ó yùq le hkyî lòq wó tû râ a nghut.” ga taî ri. 45Hpara-uq gi, Yosep lé, Zahpenat Hpane-a ga myìng myhíng byi luî, yhâng é yhûmsîng myhí kut râ matú, Ona noqkuq yhûm mâ é hkyangjong hpó Hpotihpera é yhang zo byìzo Asenat lé byi tsô ri. Yosep gi, Egutuq ra-ming gón sô kum bê nghut ri.

46Yosep gi, Egutuq ming mâ é hkóhkâm Hpara-uq chyáng wang dójaú é hkûn, chyungxe zànwut 30 zàn bò bê nghut ri. Haú hkûn, Yosep gi, Hpara-uq é myòq hí mai htoq luî, Egutuq ra-ming gón ê sô kûm ri. 47Haû agùn agó wó é nyhit zân gyoro, haú mau má kyôshi myuishi gyai yhang htoq ri. 48Yosep gi, Egutuq ming má agùn agó wó é nyhit zân gyoro htoq é zoshuq bànshoq lé tsing hkyui yù mù, haû lé wà mó pé má tsing hkong tô ri. Wà hkangmó má, hau é awui ayàm mâ é yò pé mai htoq é zoshuq lé tsing yu hkong tô ri. 49Yosep gi, wuimau yàm mâ é se-muî su myô é kyôshi myuishi hkong to bê nghut ri; a ung lìk loshoq myô byùq é yánmai, yhang gi, a jâng lìk lo kut bê nghut ri.

50Mùtmó gyó râ zànwut pé a jé shi-má, Ona noqkuq yhûm mâ é hkyangjong hpó Hpotihpera é yhang zo byìzo Asenat gi, Yosep lé, yùqzo í yùq hkû byî ri. 51Yosep gi, “Ngá é wuîhke jamjau hkyô bànshoq eq ngá wâ é yhûmbyù wuì bànshoq lé, Garai Gasâng èq tô-myhî pyám nhâng bê nghut é yánmai nghut lhê.” ga taí luî, yhâng é zo-mún yùq lé Manase ga myìng myhíng byî ri. 52Yhang gi, “Ngò hpu zô é mau má, Garai Gasang èq ngo lé zo myo myhû nhâng bê nghut é yánmai nghut lhê.” ga taí luî, lanóng yùq lé Ehprim ga myìng myhíng byî ri.

53Egutuq ming má agùn agó wó é nyhit zân gi, htáng bê nghut luî, 54Yosep taî é eq rajung za, mùtmó gyó é nyhit zân hî bê nghut ri. Gó-mau pé bànshoq má mùtmó gyó kôlhang, Egutuq ra-ming gón má gi, zoshuq wó akô nghut ri. 55Egutuq ming bànshoq má zò-mut huî lo bùm kôjáng, shiwa byu pé gi, Hpara-uq lé zoshuq dûng wùt ngau bum akô nghut ri. Haú hkûn, Hpara-uq gi, Egutuq byù bànshoq bang lé, “Yosep chyáng ê mù, yhang taî é eq rajung za kut keq.” ga taî ri.

56Ra-ming gón mùtmó gyó lo é hkûn, Yosep gi, chyî pé hpóng luî, Egutuq byu pé lé gùqzò muilhum ung byî ri; hkâsu mù gâ le, Egutuq ra-ming gón má ladu lai shoq yhang mùtmó gyó bê nghut ri. 57Mingkan gón má ladu lai shoq yhang mùtmó gyó é yánmai, ming hkang ming mó mâ é bang gi, Yosep chyáng mai gùqzò muilhum wui yù râ ga, Egutuq ming má jé lé bum akô nghut ri.

Currently Selected:

A-pûn Awang 41: znot

Highlight

Compare

Copy