A-pûn Awang 40
40
Tsibyiq Wing Jaú Sû Eq Mùk Bung Sû
1Haú hkyô dùt é htâng má, Egutuq ming mâ é hkóhkam é tsibyiq wing jaú sû eq mùk bung sû gi, yhángnhik é yhûmsîng hpó, haû Egutuq ming mâ é hkóhkâm lé shut akô nghut ri. 2Hpara-uq gi, tsibyiq wing jaú zau eq mùk bung zau haú nhik lé, nhik-yô é nghut luî, 3Yosep lé lhûng tô é htóng nghut é, chyungxe zúng zau hpô é yhûm má, yhángnhik lé htóng lhûng pyâm bê nghut ri. 4Haû chyungxe zúng zau hpó gi, yhángnhik lé Yosep é lòq má àp byî é nghut luî, Yosep gi, yhángnhik lé wú gon bê nghut ri.
Yhángnhik htóng má rayòq zo lúng é htâng, 5htóng lhúng huî to su nhik nghut é, haû Egutuq mâ é hkóhkam é tsibyiq wing jaú sû eq mùk bung sû gi, yhángnhik í yùq é, ra-myìn má za, yhángnhik ó le ó eq sêng é lichyúm bo é yhupmòq lé myang mòq akô nghut ri.
6Hau htang nàpkyó, Yosep gi, yhángnhik chyáng lé jé e hkûn, yhángnhik myòqdong gyai a yúng dùt tô é lé myang ri. 7Haû mù, yhang gi, “Hkû-nyí, núngnhik é myòqdong haî mù haû í a yúng dùt tô akô lhú?” ga, yhâng é yhûmsîng hpô é yhûm má, yhang eq rahá htóng lúng nyi é, haû Hpara-uq é zaugun nhik lé myî ri.
8Yhángnhik gi, “Ngá-nhik í yùq é yhupmòq myang ri; nghut kôlhang, yhupmòq é lichyúm taî kyo râ byù a nyì.” ga tû taî akô.
Haú hkûn, Yosep gi, yhángnhik lé, “Yhupmòq é lichyúm taî kyo râ gi, Garai Gasang eq sêng lhê a nghut kó lhí? Ngo lé, núngnhik é yhupmòq hkaî kyô wú keq.” ga taî ri.
9Haû mù, haû tsibyiq wing jaú zau hpó gi, Yosep lé, yhâng é yhupmòq hkaî kyô ri. Yhang hkaî kyô é gi, “Ngò myang é yhupmòq má, ngá é hí má tsibyiq gâm ragàm yùq tô ri. 10Haû tsibyiq nuî má gi, akoq sum koq koq tô ri. Haú má a-nyùq nyún lô eq yhang, abó bó lô mù, myhîng é shipaû zuî to bê nghut ri. 11Hpara-uq é gòm gi, ngá é lòq má nghut nyî mù, ngò gi, tsibyiq shi lé hpyoq yû luî, Hpara-uq é gòm má awing chyup kat mù, gòm haú lé, yhâng é lòq má kat byî é nghut lhê.” gâ ri.
12Haú hkûn, Yosep gi, yhang lé, “Hau é lichyúm gi, shí dông nghut lhê; akoq sum koq gi, buìnyì sum nyí nghut ri. 13Sum nyí nghut jáng, Hpara-uq gi, nang lé lhoqtoq yû mù, hí lhê é náng é jowò má dum zùng nhâng râ nghut luî, nàng gi, hí lé nàng tsibyiq wing jaú sû nghut é hkûn kut é su, Hpara-uq é lòq má yhâng é gòm lé kat byi râ nghut lhê. 14Nghut kôlhang, nàng, nguì ngón yùqyo nyi é hkûn, ngo lé myìtbun mù, náng é jeju shit àq; Hpara-uq é hí má ngá é hkyô taî kyo luî, ngo lé, htóng shî mai lhoqhtoq yû àq. 15Hkâsu mù gâ le, Hebre byu pê é mau mai ngo lé zìk shuî gyó lô kômù, ahkuî, ngò, shî má htóng lúng râ mara a kut shut kôlhang, ngo lé htóng má lhûng tô akô nghut ri.” ga taî ri.
16Haû mùk bung sû gi, Yosep èq gyo naû nhô za gâ é yhupmòq lichyúm hpuq kyô é lé myàng jáng, yhang le, Yosep lé, “Ngò le yhupmòq ralhum myang ri; yhupmòq haû gi, ngá é ulhum má mùk kyáng sum kyáng kê tô ri. 17Je ahtoq kyáng má gi, Hpara-uq é matú bûng é zè jung hkang jung mó bo tô ri; nghut kôlhang, nghoqzô pé gi, ngá é u htoq mâ é kyáng má bo é haú pé lé hte zô nyi akô nghut ri.” ga hkaî kyô ri.
18Haú hkûn, Yosep gi, “Hau é lichyúm gi, shí dông nghut lhê; kyáng sum kyáng gi, sum nyí nghut ri. 19Sum nyí nghut jáng, Hpara-uq gi, náng é ulhum lé hpyit yû mù, nang lé sikgâm má htaû lhâng pyám râ nghut lhê. Haú hkûn, nghoqzô pé gi, náng é gùngsho lé hte zô pyám kôrâ nghut lhê.” ga taî ri.
20Haû sum nyí nghu é nyí gi, Hpara-uq é hkû buìnyì nghut mù, yhang gi, yhâng é zaugun wuì bànshoq bang lé zoshuq poî kut byî ri. Yhang gi, yhâng é zaugun wui é hí má, haû tsibyiq wing jaú sû eq mùk bung su nhik lé lhoqhtoq yu ri. 21Haû mù, yhang gi, tsibyiq wing jaú zau lé, hí lhê é jowò má dum zùng nhang é nghut mù, haú yùq gi, Hpara-uq é lòq má, gòm lé radàm dum myang kat byi bê nghut ri. 22Nghut kôlhang, Hpara-uq gi, Yosep èq yhâng é yhupmòq lichyúm lé, yhángnhik chyáng hkaî kyô é eq rajung za, mùk bung zau lé htaû lhâng pyám bê nghut ri.
23Haû tsibyiq wing jaú zau hpó kúm gi, Yosep lé a myìtbun lô é za tô-myhî pyám bê nghut ri.
Currently Selected:
A-pûn Awang 40: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
