A-pûn Awang 39

Yosep Eq Hpotihpa É Yhûmsîng Myhî É Hkyô

1Yosep lé gi, Egutuq ming má shuî gyó ló akô. Hpara-uq é zaugun wuì mâ é rayùq nghut é sû, chyungxe zúng zau Egutuq byù Hpotihpa gi, haû má Yosep lé shuî gyó lo é Ishima-elaq byu pê é lòq mai, Yosep lé wui hpyit yû bê nghut ri.

2Haû Yhûmsîng Garai gi, Yosep eq rahá nghut nyî mù, Yosep gi, hkyô hkat hkangmó má yùqyò kô lam ri; yhang gi, yhâng é Egutuq byù yhûmsîng hpô é yhûm má nyi nyi ri. 3Haû Yhûmsîng Garai gi, yhang eq rahá nghut nyi é hkyô lé le, Yhûmsîng Garai gi, yhang kut é hkyô hkat hkangmó má ûngmyuq hkyô wó nhang é lé le, haû yhâng é yhûmsîng hpó byu myang é hkûn, 4Yosep gi, yhâng é hí má myòqdong wó é nghut luî, yhâng é lùm byù dùt bê nghut ri. Hpotihpa gi, yhang lé, yhâng é yhûm i-kun bànshoq wú gon nhang é htoq agó, yháng sing é lhúnglháng lé wú magûm râ matú lum to bê nghut ri. 5Haú hkûn mai, Hpotihpa gi, yhang lé, yhâng é yhûm i-kun eq yháng sing é lhúnglháng wú gon nhâng bê nghut mù, haû Yhûmsîng Garai gi, Yosep é yánmai, Egutuq byù hau é yhûm i-kun lé shimân byî ri. Haû Yhûmsîng Garaî é shimân jeju gi, Hpotihpa é yhûm má le, yò má le, yhang wó é jung hkangmó má jòq nyi ri. 6Haû mù, yhang gi, Yosep lé, yhang wó é jung hkangmó wú gon nhang ri; yhang gi, Yosep lé wú gon nhang to bê nghut luî, yhang zô é zang mai lai mù, gótû haî lé le a bo wú gon lo nghut ri.

Ahkuî, Yosep gi, gùnghkyâng isâm kô yúng sû nghut mù, 7adê myáng má, yhâng é yhûmsîng hpô é yhang myi gi, Yosep lé wú záng mù, “Ngò eq rahá yhup gòq!” ga taî ri.

8Nghut kôlhang, yhang gi, he-ngìk pyám luî, yhâng yhûmsîng hpô é yhang myi lé, “Ngá é yhûmsîng hpó gi, yhûm shî má jòq é jung hkangmó lé hai myìt a châng myo lo, ngo lé wú gon nhang to bê; yháng sing é jung hkangmó lé ngò wú gon râ matú, ngo lé lum to bê nghut lhê. 9Shí yhûm má ngá htoq kô é ó yùq le a nyì. Nàng gi, yhâng é yhûmsîng myhí nghut é yánmai, ngá é yhûmsîng hpó gi, nàng mai lai luî, ngo lé a àp byî é haî le a jòq nghut ri. Hau mù, ngò gi, shî sû é agè ashop hkyô eq Garai Gasang lé mara shut é hkyô lé, hkâsu ge kut râ lhú?” ga taî ri. 10Yhang gi, ra-nyí htâng ra-nyí Yosep lé taî wú kôlhang, Yosep gi, yhang eq rahá yhup râ lé le, yhang eq rahá rajowò má za nyì râ lé lé, he-ngìk pyám bê nghut ri.

11Ra-nyí lé, Yosep gi, yhâng é mú ê zui saí râ ga yhúmhkaû má wang e é hkûn, yhûm mâ é duìnhâng zoshâng wuì rayùq le a nyi to kó nghut ri. 12Haú hkûn, myiwe myhí haû gi, yhâng é bu má kyaq zuî to luî, “Ngò eq yhup gòq!” ga taî ri. Nghut kôlhang, Yosep gi, yhâng é lòq má bu hkyô to hkó mù, yhúmhkaû mai din htoq ló bê nghut ri.

13Myiwe myhí haû gi, yhâng é lòq má bu hkyô to hkó mù, yhúmhkaû mai Yosep din htoq ló byùq é lé myàng jáng, 14yhâng yhûm mâ é duìnhâng zoshâng wuì lé wùt yù mù, yhángmòq lé, “Wú keq, ngá yhûmsîng hpó gi, ngá-nhúng lé rhoî jihkyoî kut nhâng râ matú, Hebre byù shî lé ngá-nhûng chyáng shuî tô é nghut ri nhung! Yhang gi, ngò eq yhup râ matú wang lo ri; nghut kôlhang, ngò kyek garû kat é nghut lhê. 15Yhang gi, garúm yû râ matú ngò kyek garû kat é lé wó gyo jáng, yhâng é bu lé ngá chyáng hkyô to hkó mù, yhúmhkaû mai din htoq ló bê nghut ri.” ga taî kyô ri.

16Myiwe myhí haû gi, yhâng é yhûmsîng hpó yhûm má jé lô shoq, Yosep é bu lé yhâng chyáng tô tô ri. 17Haû mù, yhang gi, haú hkyô eq séng luî, yhâng é yhûmsîng hpó lé, “Haû, nàng, ngá-nhûng chyáng shuî lo é Hebre jùn hpó gi, ngá chyáng lé mù, ngo lé rhoî jihkyoî kut ri. 18Nghut kôlhang, garúm yû râ matú ngò kyek garû kat eq yhang, yhâng é bu lé ngá chyáng lhoqhkyô to mù, yhúmhkaû mai din htoq ló byùq bê nghut ri.” ga lhom taî kyô ri.

19Yhâng é yhûmsîng hpó gi, yhang lé, “Shî gi, náng é jùn hpó ngo lé kut é hkyô nghut bê.” ga yhâng é yhûmsîng myhí taî é dang lé wó gyo jáng, nhikjum mó yo bê nghut ri. 20Yosep é yhûmsîng hpó gi, yhang lé, haû hkóhkam é htongbyû wuì lé lhûng tô é jang má shuî ê mù, htóng má ê lhûng to bê nghut ri.

Nghut kôlhang, Yosep, htóng má lúng tô é u le, 21haû Yhûmsîng Garai gi, yhang eq rahá nghut nyî mù, yhang lé shogyo nhikmyin hkyô shit luî, htóng zau hpô é hí má myòqdong wó nhang ri. 22Haû mù, htóng zau hpó gi, htóng má lhûng tô é htongbyû bànshoq lé, Yosep é lòq má àp to luî, htóng má kut é hkyô bànshoq lé le, yhang lé wò yù nhang ri. 23Haû Yhûmsîng Garai gi, Yosep eq rahá nghut nyî mù, yhang kut é hkyô hkat hkangmó má ûngmyuq hkyô wó nhang é yánmai, haû htóng zau hpó gi, Yosep wú gôn é hkyô haî lé nghut kôle, a lhing wú ra lo nghut ri.

Currently Selected:

A-pûn Awang 39: znot

Highlight

Compare

Copy