A-pûn Awang 34
34
Dina Eq Shehkim Byu Pê É Hkyô
1Ra-nyí lé, Yakup lé Le-a hkû byî é byìzo Dina gi, haú mau mâ é myiwe wuì lé ê huî kún râ matú htoq e ri. 2Haú hkûn, haú mau mâ é zau, Hiwi byù Hamora é yhang zo yùqzo Shehkem gi, yhang lé lhom myàng luî, shuî yù mù, lhom rhoi yu ri. 3Yhâng é i-myìt nhiklhum gi, Yakup é byìzo Dina chyáng za tuî byùq mù, byìzo haú lé chyitdàp luî, yhang lé chyit dang kâng dang taí bê nghut ri. 4Haû mù, Shehkem gi, yhâng wa Hamora lé, “Ngá é yhûmsîng myhí kut râ matú, myiwe zo shí yùq lé yù byi aq.” ga taî ri. 5Yakup gi, Shehkem èq yhang zo byìzo Dina é xânghpoq nge wó hkyô lé lhoqhpoî pyám byi bê gâ é hkyô lé wó gyô é hkûn, yhang zo yùqzô pé gi, yòso má, yhâng é shigu gaunyhaû pé lé zúng nyi bum ashi kô nghut ri; haû mù, yhang gi, yhángmòq yhûm jé lo bùm shoq zim za kut nyi tô ri.
6Hau htâng, Shehkem é yhâng wa Hamora gi, Yakup lé ê huî nyò râ ga htoq e ri. 7Yakup é yhang zo yùqzô pé gi, yòso mai je wang lò eq yhang, dùt laî lo é hkyô lé wó gyo bekô nghut ri. Shehkem gi, a dùt gíng é múzó nghut é, Yakup é byìzo eq yhup é dông, Isira-elaq pê chyáng hoq hpu hkyô lhoqhtoq byi bê nghut é yánmai, yhángnhik tâng wuì gi, yón lhê, nhikmó-yô lhê dùt bekô nghut ri.
8Nghut kôlhang, Hamora gi, yhángmòq lé, “Ngá zo Shehkem gi, núngmòq é byìzo lé chyit kang nyì bê nghut ri; jeju mai, yhâng é yhûmsîng myhí kut râ matú, byìzo shî lé byi tso keq. 9Ngá-mòq eq myi byi myi yû kut lhum sháng; ngá-mòq lé, núngmòq é byìzô pé byi mù, ngá-mòq é byìzô pé lé, núngmòq yù keq. 10Núngmòq gi, ngá-mòq chyáng nyì keq; maumyî gi, núngmòq é hí má nghut nyî bê. Haú má nyì mù, wuìloq kut#34:10 Wuìloq kut gâ é lé, htoq htoq wàng wàng kut keq gâ é lichyúm le, wuìloq ge kut lhê gâ é lichyúm le htoq lhê. luî, yhûm yò sùtzè ho tsîng yù keq.” ga taî ri.
11Hau htâng, Shehkem gi, Dina é yhâng wa eq yhâng mùng zô pé lé, “Núngmòq é hí má, ngò myòqdong wó sháng gàq; núngmòq haî dûng le haî byi râ nghut lhê. 12Hpaulàng le, chyûnghuq myo myo le, núngmòq dûng é myhó kat râ nghut lhê. Byìzo shî lé za, ngá é yhûmsîng myhí kut râ matú byi tso keq.” ga taî ri.
13Yakup é yhang zo yùqzô pé gi, yhángmòq é yhâng nhammó Dina é xânghpoq nge wó hkyô lé lhoqhpoî pyám byi bê nghut é yánmai, Shehkem eq yhâng wa Hamora lé hpàqchyî dông tû taî mhaú kô é gi, 14“Shî sû é hkyô ngá-mòq a wó kut; ahpyo-kuq a hpyit é byù rayùq lé, ngá-mòq é nhammó a wó byi tso. Haû gi, ngá-mòq é matú hoq hpu hkyô nghut lhê. 15Ngá-mòq é htûng jòq é eq rajung za, núngmòq é yùqgè wuì lhúnglhâng bang ahpyo-kuq hpyit kô le kúm gi, ngá-mòq gyo byi râ nghut lhê. 16Haû jáng, ngá-mòq gi, núngmòq lé, ngá-mòq é byìzô pé byi tso mù, ngá-mòq é matú, núngmòq é byìzô pé lé yù râ nghut lhê. Ngá-mòq gi, núngmòq eq rahá nyì mù, núngmòq eq ra-myû za dùt râ nghut lhê. 17Nghut kôlhang, ahpyo-kuq hpyit râ hkyô lé núngmòq myìt a huî é nghut jáng, ngá-mòq é nhammó lé shuî ló byùq râ nghut lhê.” ga taî akô nghut ri.
18Yhángmòq taî é dang haú lé, Hamora eq yhang zo Shehkem gyô htuk bun bekô nghut ri. 19Yhâng wâ é yhûmbyù wuì bànshoq bâng htoq má xânghpoq nge wó é yùqzo haû gi, Yakup é yhang zo byìzo haú lé chyitdàp é yánmai, yhángmòq taî é dông kut râ lé, ahkyíng a lhoqpán lo nghut ri. 20Haû mù, Hamora eq yhang zo yùqzo Shehkem gi, yhángmòq é wà hkum má htoq ê mù, yhángmòq é wà byù luzúm wuî lé, 21“Byù shí bang gi, ngá-nhúng eq htuk ri; yhángmòq lé, ngá-nhûng é maumyî má nyì nhâng mù, wuìloq kut nhâng sháng; maumyî gi, yhángmòq nyì râ matú ngô ashî. Yhángmòq é byìzo wuì lé gi, ngá-nhúng yù; ngá-nhûng é byìzo wuì lé gi, yhángmòq yù ge kut lhê. 22Nghut kôlhang, yhángmòq su, ngá-nhûng é yùqgè wuì ahpyo-kuq hpyit jáng za shèq, ngá-nhúng eq ra-myû za dông chôm nyì râ matú, yhángmòq gyo kôrâ nghut lhê. 23Yhángmòq é shigu gaunyhaû pé, yhángmòq é sùtzè pé eq yhángmòq é gótû gaunyhaû pé gi, ngá-nhûng é dùt byùq râ a nghut kó lhú? Haû mù, yhángmòq é dang gyo byi sháng; haû jáng, yhángmòq gi, ngá-nhûng chyáng nyi to kôrâ nghut lhê.” ga taî akô nghut ri.
24Wà hkum má htoq e é bang bànshoq gi, Hamora eq yhang zo yùqzo Shehkem lé myìt hui kômù, wà mâ é yùqgè wuì yùq hkangmó ahpyo-kuq hpyit hkâm bekô nghut ri.
25Sum nyí laî htâng, yhángmòq bànshoq bang dàm rû no nyi bum ashî u, Yakup é yhang zo Sime-on eq Lewiq, Dina é mung zô nhik gi, ó le ô é shâm yu chûng kômù, haî dut lô râ su a myìt ngam tô é wà lé, ê htim kôluî, yùqgè wuì yùq hkangmó lé sat pyám bekô nghut ri. 26Yhángnhik gi, Hamora eq yhang zo yùqzo Shehkem lé zân sat pyám kômù, Dina lé, Shehkem é yhûm mai shuî yù luî, taû ló bekô nghut ri. 27Yakup é yhang zo yùqzô pé gi, màng pé jòq é jang má lé jé kômù, yhángmòq é nhammó rhoî huî é wà lé hpyoq yû bekô nghut ri. 28Yhángmòq gi, haú bâng é sau bainám pé, no myang pé eq loze pé lé le, wà mâ é zè jung hkangmó eq yò pé mâ é zè jung hkangmó lé le yu pyám byî akô. 29Hau htoq agó, yhángmòq gi, haú bâng é sùtzè bànshoq lé le, yhángmòq é myiwe zoshâng bànshoq lé le, yhûm pé mâ é jung hkangmó lé le, sing yu pyám byî akô nghut ri.
30Haû mù, Yakup gi, Sime-on eq Lewiq lé, “Núngnhik gi, shi mau má nyi é Hkanan byu pé eq Perizi byu pê hí má, ngo lé myìng lhoqhten byi mù, mú mó lhoqhtoq byi bekô nghut ri. Ngá-nhúng gi, byù du shaû lhê; yhángmòq chôm pông mù, ngo lé lé htim lé zan kô é ru nghut le gi, ngò eq ngá é yhûmbyù wuì lhoqhtûm pyâm é hui râ nghut lhê.” ga taî ri.
31Nghut kôlhang, yhángnhik gi, “Yhang, ngá-nhik é nhammó lé, shiwa myhí dông kut jung nghut lhê lhú?” ga tû taî akô nghut ri.
Currently Selected:
A-pûn Awang 34: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
