A-pûn Awang 35

Behtela Má Yakup Dum Taû Ló É Hkyô

1Hau htâng, Garai Gasang gi, Yakup lé, “Behtela má dòq ló mù, haú má ló nyî luî, nungmang Eso lé nàng hpang é hkûn, nang lé htoq shit é Garai Gasâng é matú hkungga gyàp ralhum saí aq.” ga taî ri.

2Haû mù, Yakup gi, yhâng é yhûmbyù wuì eq yhâng chyáng nyi é bang bànshoq lé, “Núngmòq wó é tûngbaù hparà pé lé lhuî pyám mù, yhûmsing gùng yhûmsîng lhoqsan lhoqyúng yû luî, núngmòq é mèbu pé lé htaî pyám keq. 3Haû mù, lé keq; Behtela má dòq ló sháng; ngò myìt myo myìt chiq é hkûn, ngo lé gyo byi mù, ngò jé é jowò hkangmó má ngò eq rahá nghut nyi é Garai Gasâng é matú, ngò, haú má hkungga gyàp ralhum saí râ nghut lhê.” ga taî ri. 4Haû mù, yhángmòq gi, Yakup lé, yhángmòq wó é tûngbaù hparà pé bànshoq eq yhángmòq é nohkyap mâ é nogóng pé byî akô; haú hkûn, Yakup gi, Shehkem mâ é wàqmyòq gàm wang má, haú pé lé myhup pyám bê nghut ri. 5Haû mù, yhángmòq gi, htoq e ló bekô; yhángmòq é awui ayàm mâ é wà mó pé bànshoq é ahtoq má, Garai Gasâng chyáng mâ é gyùq chiq hkyô jé é nghut mù, ó yùq le, yhángmòq lé a châng hkat lo kó nghut ri.

6Yakup eq yhâng htâng châng é byù bànshoq bang gi, Hkanan mau mâ é Behtela le gâ é Luza jowò má jé bekô nghut ri. 7Yakup gi, haú má hkungga gyàp ralhum saí mù, jowò haú lé Eli Behtela#35:7 Eli Behtela gâ é gi, Behtela mâ é Garai Gasang gâ é lichyúm nghut lhê. ga myhîng ri. Haî mù gâ le, yhang, yhang mang lé hpang wún é hkûn, haú jowò má, yhang lé, Garai Gasang htoq shit é yánmai nghut ri.

8Rebeka lé baû kô é sû Debora gi, shi byùq é nghut mù, Behtela é a-o hkyam shut mâ é wàqmyòq gàm wang má myhup yhûm pyâm akô nghut ri. Haû mù, sikgâm haú lé, Alon Bahkut#35:8 Alon Bahkut gâ é gi, ngaùbyi ngaùnhap nghut é wàqmyòq gàm gâ é lichyúm nghut lhê. ga myhîng akô nghut ri.

9Yakup, Hpadan Aram mai taû lo é htâng, Garai Gasang gi, yhang lé dum htoq shit mù, shimân byî ri. 10Garai Gasang gi, yhang lé, “Náng é myìng gi, Yakup#35:10 Yakup gâ é gi, hkyîhtáng la-nhik má châng kyaq zui gâ é lichyúm nghut lhê. Danglhîng dông gi, yhang mhaû ri gâ é nghut lhê. gâ lhê; nghut kôlhang, nang lé Yakup ga lo kôrâ a nghut. Náng é myìng gi, Isira-elaq#35:10 Isira-elaq gâ é gi, Garai Gasang eq htuqhtîng lhum gâ é lichyúm nghut lhê. ga râ nghut lhê.” ga taî ri. Haú dông, Garai Gasang gi, yhang lé Isira-elaq ga myìng myhíng byî ri.

11Hau htoq agó, Garai Gasang gi, yhang lé, “Ngò gi, Wum-o a-tsam dìk shoq bò Sû Garai Gasang nghut lhê; zodù hkû mù, byù du myô jàt nhâng àq. Byù myû ra-myû za a nghut, byù myû myo myo náng chyáng mai dùt htoq lô râ nghut mù, hkóhkam pé, náng é gùngdu mai htoq lô râ nghut lhê. 12Ngò, Abraham eq Isak lé byî é maumyî, nang lé le, náng é htâng má nyi lé lô râ náng é awùt ashîn pé lé le byi râ nghut lhê.” ga taî ri. 13Hau htâng, Garai Gasang gi, Yakup lé nyo é jowò haû mai dòq ló byùq bê nghut ri.

14Yakup gi, Garai Gasâng èq yhang lé nyo é jowò má lùqzìng ralhum xuq mù, hau é ahtoq má shuq jung hkungga hut gyun luî, namngón xû lé le, hau é ahtoq má hut gyûn ri. 15Yakup gi, Garai Gasâng èq yhang lé nyo é jowò lé, Behtela#35:15 Behtela gâ é gi, Garai Gasâng é yhûm gâ é lichyúm nghut lhê. ga myìng myhîng ri.

Rahkela Eq Isak Shi Byùq É Hkyô

16Hau htâng, yhángmòq gi, Behtela mai dum xoq htoq e ló bekô. Yhángmòq, Ehprat má jé râ ra-tsuí wê ashî hkûn, Rahkela gi, zohkû nò no lò mù, gyai yhang wuîhkê nyi bekô nghut ri. 17Yhang, zohkû râ matú gyai yhang wuîhkê nyi é hkûn, zohkû byi sû gi, yhang lé, “Hkâgyùq, hkâsu mù gâ le, nàng yùqzo rayùq dum wó bê nghut ri.” ga taî ri. 18Yhang gi, shi myòq ló nyi é nghut luî, kângsoq byìt ló é u, yhâng é yùqzo haú lé Ben-Oni#35:18 Ben-Oni gâ é gi, ngá é wuîhke jamjau mâ é yùqzo gâ é lichyúm nghut lhê. ga myìng myhîng ri. Nghut kôlhang, yhâng wa gi, yhang lé, Ben-yamin#35:18 Ben-yamin gâ é gi, ngá é lòqyo lòq é yùqzo gâ é lichyúm nghut lhê. ga myhîng ri.

19Haû mù, Rahkela gi, shi byùq luî, Betlehem le gâ é Ehprat shut ló é hkyô má myhup yhûm pyám bekô nghut ri. 20Yakup gi, yhâng é lùp htoq má lùqzìng xuq tô ri; lùqzìng haû gi, hkû-nyí jé shoq, Rahkela é lùp masàt lùqzìng dùt nyi bê nghut ri.

21Isira-elaq gi, dum htòt é ló luî, Migadala Edera#35:21 Migadala Edera gâ é gi, sau bainám lé wú zúng é mâchya lé taî é nghut lhê. laî e é jáng má, yhâng é zúm ê saî ri. 22Isira-elaq gi, haú mau má nyi nyi é hkûn, Rubin gi, yhâng wâ é myi-ngê Bila chyáng wàng mù, yhup yu ri; haú hkyô lé, Isira-elaq wó gyo bê nghut ri.

Yakup gi, yhang zo raxe í yùq wó lhê. 23Le-a hku é yhang zo yùqzô pé gi, Yakup é zo-mún Rubin, Sime-on, Lewiq, Yudaq, Yisahka eq Zebulun pé nghut ri. 24Rahkela hku é yhang zo yùqzô pé gi, Yosep eq Ben-yamin nhiktâng nghut akô. 25Rahkela é duìnhâng zoshâng myhí Bila hku é yhang zo yùqzô pé gi, Dan eq Naphtali nhiktâng nghut akô. 26Le-a é duìnhâng zoshâng myhí Zilihpa hku é yhang zo yùqzô pé gi, Gat eq Asheri nhiktâng nghut akô. Shí bang gi, Hpadan Aram má hku é, Yakup é yhang zo yùqzô pé nghut akô.

27Hau htâng, Yakup gi, Abraham eq Isak nyi laî lo é Hebron gâ é Kiri-at Araba nàm mâ é, Mamre jowò má nyi é yhâng wa Isak chyáng ló jé ri. 28Isak gi, chyungxe zànwut 180 zàn nyi ri. 29Yhang gi, u hpyû zuì nè mù, mâng byùq bê nghut luî, yhâng é kângsoq byìt mù, shi byùq luî, yhâng é îchyí îwâ pê chyáng ló byùq bê nghut ri. Yhâng é yùqzo Eso eq Yakup nhiktâng gi, yhang lé myhup yhûm kat akô nghut ri.

Currently Selected:

A-pûn Awang 35: znot

Highlight

Compare

Copy