A-pûn Awang 32

Eso Lé Hui Râ Matú Yakup Hen Lajâng É Hkyô

1Yakup le yhâng é hkyôwuì má xoq e ló ri; haû Garai Gasâng é maumang lagyô pé gi, yhang lé lhom huî akô. 2Yakup gi, yhángmòq lé myang é hkûn, “Shî gi, Garai Gasâng é gyèdap yhang nghut ri nhung!” ga taî ri. Haû mù, yhang gi, jowò haú lé Mahana-im#32:2 Mahana-im gâ é gi, gyèdap í dàp gâ é lichyúm nghut lhê. ga myhîng ri.

3Yakup gi, Edom mau mâ é Se-ira jowò má nyi é yhang mang Eso chyáng, lagyô pé lé hí máng nhang kat ri. 4Yhang, haú bang lé châng pying kat é gi, “Ngá é yhûmsîng Eso lé, ‘Náng é duìnhâng zoshâng Yakup taî le, ngò gi, ahkuî jé shoq Laban eq ê nyi nyi é nghut lhê. 5Ngò gi, no myang eq loze pé, sau eq bainám pé, duìnhâng zoshâng myiwe yùqgè wuì wó lhê. Ngò gi, náng é hí má myòqdong wó sháng gàq nghû, ahkuî, danglù shî lé, ngá é yhûmsîng náng chyáng hun kat lhê.’ nghû núngmòq ê taí keq.” ga ri.

6Haû lagyô pé, Yakup chyáng dum taû jé lô kô é hkûn, yhángmòq gi, “Nungmang Eso chyáng ngá-mòq ê jé bê; haû mù, ahkuî, yhang gi, nang lé lé hui râ ga, byù 400 yùq eq lé lo nyi ri.” ga taî kyô akô nghut ri.

7Haû mù, Yakup gi, gyùq nán é eq myìt myo myìt chiq byùq mù, yhang eq rahá nghut nyi é byù, sau bainám, no myang eq gola-uk pé lé, í hpúng gam hkoq bê nghut ri. 8Yhang gi, “Eso èq rahpúng lé lé htîm é nghut jáng, góhpúng gi, wó hpang lùt râ nghut lhê.” ga wó myìt é yánmai haú su kut é nghut ri.

9Hau htâng, Yakup kyûdûng é gi, “Ngá wa Isak é Garai Gasang, ngá chyí Abraham é Garai Gasang, ‘Náng é yhummau, náng é buìnùm wui chyáng taû ló aq; Ngò, nang lé nyì ngón yùqyò nhâng râ.’ ga ngo lé taî é Yhûmsîng Garai ê, 10Náng é duìnhâng zoshâng ngo lé, Nàng shit é jeju bànshoq eq le, Nàng shit é jujúm hkyô eq le, ngò a gíngdán. Ngò gi, Yodan lang shî gû laî é hkûn, dumbáng za rû chung é nghut lhê; nghut kôle, ahkuî, ngò gi, í hpúng mó dùt byùq bê nghut ri. 11Ngá mang Eso é lòq mai ngo lé hkyi yù laq nghû, ngò kyûdûng lhê; hkâsu mù gâ le, ngò gi, yhang lé mù, ngo lé le, zoshâng wuì eq yhángmòq é yhâng nû pé lé le, lé htim râ le gyùq ri. 12Nghut kôlhang, Nàng gi, ‘Ngò, nang lé teng teng wó lô sùt lò nhâng râ nghut é htoq agó, náng é awùt ashîn pé lé, a ung nghap loshoq, wuimau yàm mâ é se-muî su lhoqmyo byi râ nghut lhê.’ taî é nghut lhê.” gâ ri.

13Yhang gi, haú myîn haú má nô yù mù, yhang mang Eso é matú, yhâng chyáng bo lo é sùtzè mâ é chyûnghuq hkyin htoq yu é gi, 14bainám zîng 200 du eq bainám lo 20 du, sauzîng 200 du eq saulo 20 du, 15gola-uk zô pé le kut naú huq é gola-uk zîng 30 du, nojûng 40 du eq nohtó 10 du, loze zìng 20 du eq loze lo 10 du pé nghut ri. 16Yhang gi, haú pé lé yhâng a-myû eq yhang a hpúng hpúng kut luî, yhâng é duìnhâng zoshâng wuì lé wú gon nhâng mù, yhángmòq lé, “Rahpúng eq rahpúng ra-tsuí tsuí kyo lhum mù, ngá é hí má kôn so keq.” ga taî ri.

17Yhang gi, haú bang mâ é shuî-u sû yùq lé, “Ngá mang Eso, nang lé huî é hkûn, ‘Nàng gi, ó yùq é byù nghut lhê lhú? Hká shut e ló lhê lhú? Náng é hí mâ é shigu gaunyhaú bànshoq lé gi, ó yùq sing lhê lhú?’ ga nang lé myî lò jáng, 18nàng gi, ‘Haú pé gi, náng é duìnhâng zoshâng Yakup é nghut ri. Haú pé gi, ngá é yhûmsîng Eso lé dé byî é chyûnghuq nghut ri; yhang gi, ngá-mòq é htâng má châng lé lo ri.’ nghû taî aq.” ga châng sang kat ri.

19Yhang gi, htang hpúng mâ é yùq lé le, dum htang hpúng mâ é yùq eq shigu gaunyhaú kôn é góbang bànshoq lé le, “Núngmòq, Eso lé huî é hkûn, rajung za nghû taí keq. 20‘Náng é duìnhâng zoshâng Yakup gi, ngá-mòq é htâng má châng lé lo ri.’ nghû le hkyak taí keq.” ga châng pying kat ri. Hkâsu mù gâ le, yhang gi, “Ngò gi, ngá é hí má hun kat é chyûnghuq shí pê èq, yhâng é myìt lhoqzîm pyám byi râ nghut lhê; hau htâng, ngò, yhang lé myang é hkûn, yhang, ngo lé hàp yù âbe.” ga wó myìt é yánmai nghut ri. 21Haû mù, Yakup é chyûnghuq gi, yhâng é hí má e ló ri; nghut kôlhang, yhang gi, haú myîn zúm haú má nô yu ri.

Yakup Eq Garai Gasang Dap Lhûm É Hkyô

22Haú myîn, Yakup gi, toq luî, yhâng é yhûmsîng myhî nhik lé le, yhâng é duìnhâng zoshâng myhî nhik lé le, yhang zô pé raxe rayùq lé le, shuî yù mù, Yabok guhkan shuî gû dàp ri. 23Yhang gi, yhángmòq lé gû dàp nhang é htâng má, yháng sing é sùtzè bànshoq lé lhaî tap kat ri. 24Haû mù, Yakup gi, yhang baú myìt gyó to luî, byù rayùq gi, yhang eq maubó lô shoq dàp lhûm ri. 25Byù haú yùq gi, yhang wó ûng râ su a dùt lô é lé myàng jáng, Yakup é tangbaú pûn má záng byî é nghut mù, Yakup é tangbaú pûn gi, yhang eq dàp lhûm nyi é hkûn, lhoqhûn kat bê nghut ri. 26Haú hkûn, byù haú yùq gi, “Maubó lô bê nghut é yánmai, ngo lé nhang kat àq.” ga taî ri.

Nghut kôlhang, Yakup gi, “Nàng, ngo lé shimân byî é za a nghut jáng, ngò, nang lé ló nhâng râ a nghut.” ga tû taî ri.

27Byù haú yùq gi, yhang lé, “Náng myîng haî gâ lhê?” ga myi jáng, yhang gi, “Yakup gâ lhê.” ga tû taî ri.

28Haú hkûn, byù haú yùq gi, “Náng é myìng lé, Yakup ga lo râ a nghut; Isira-elaq#32:28 Isira-elaq gâ é gi, Garai Gasang eq htîm jón lhum gâ é lichyúm nghut lhê. shèq ga lo râ ru nghut lhê. Haî mù gâ le, nàng gi, Garai Gasang eq le, byù eq le htîm jón lhum mù, ûng bê sû nghut ri.” ga taî ri.

29Yakup gi, “Jeju mai náng myîng taî kyo laq.” ga taî ri.

Nghut kôlhang, yhang gi, “Nàng, haî mù ngá myîng myî lhê lhú?” ga tû taí mù, jowò haú má Yakup lé shimân byi bê nghut ri.

30Haû mù, Yakup gi, jowò haú lé Hpeni-ela#32:30 Hpeni-ela gâ é gi, Garai Gasâng é myòqdong gâ é lichyúm nghut lhê. ga myhîng ri; hkâsu mù gâ le, “Ngò gi, Garai Gasang eq myòqdong hkyúm myàng bê nghut kôle, ngá é chyungxe lùt tô ashî nghut ri.” ga taî é yánmai nghut ri.

31Yhang gi, Hpeni-ela pá mai sô laî ló é u lé, buì htoq bê nghut ri. Yhang gi, yhâng é tangbaú pûn lhoqhûn pyám bê nghut é yánmai, hkyî rheq byùq bê nghut ri. 32Haû mù, Isira-elaq byu pé gi, tangbaú pûn má záng tô é shogyi lé, hkû-nyí jé shoq a zo kó nghut ri; haî mù gâ le, Yakup é tangbaú pûn eq chyâng é shogyi nàm má záng byî é yánmai nghut lhê.

Currently Selected:

A-pûn Awang 32: znot

Highlight

Compare

Copy