A-pûn Awang 25
25
Abraham Shi Ló Byùq É Hkyô
1Abraham gi, myiwe dum yu ri; haú yùq é myìng gi, Ketura gâ ri. 2Myiwe haû gi, yhâng é matú, Zimran, Yokshan, Medan, Midi-an, Ishibak, Shu-a pé lé hkû byî ri. 3Yokshan gi, Sheba eq Dedan nhiktâng lé hku ri. Dedan é awùt ashín pé gi, Ashuri byù, Letushim byù eq Le-umim byu pé nghut akô. 4Midi-an é yhang zo yùqzô pé gi, Ehpa, Ehpera, Hanok, Abida, Eleda nghut akô. Shí bang bànshoq gi, Ketura é awùt ashín pé nghut akô.
5Abraham gi, yhang sing é sùtzè lhúnglháng, Isak lé tô to byî ri. 6Nghut kôlhang, yhang gi, chyungxe dui nyi ashî u lé, yhâng é myi-ngê wui é yhang zo yùqzô pé lé chyûnghuq tsing byi mù, yhang zo Isak chyáng mai, buìhtoq hkyam mau shut nhang htoq pyâm ri.
7Abraham gi, 175 zân chyungxe dui ri. 8Haú hkûn, yhang gi, mang luî, chyungxe zànwut ló htáng mù, yhâng é kângsoq byìt bê nghut luî, u hpyû zuì ne u hkyak má yhang shi ló byùq bê nghut ri; haû mù, yhang gi, yhâng é îchyí îwâ pê chyáng jé ló bê nghut ri. 9Yhang zô nhiktâng Isak eq Ishima-elaq gi, yhang lé, Mamre nàm mâ é Makhpela lùqhkyûng má myhup tô akô; lùqhkyûng haû gi, Hiti byù Zohara é yhang zo yùqzo Ehprun é yòbun má nghut ri; 10Yò haú lé gi, Hiti byu pê chyáng mai Abraham wui hpyit yu é yò nghut ri. Abraham lé gi, yhâng é yhûmsîng myhí Sara eq rahá maumyî haú má myhup tô ri. 11Abraham shi byùq é htâng, Garai Gasang gi, yhang zo Isak lé shimân byî ri; Isak gi, Beri Lahai Roi wuìhtúng nàm má nyi nyi ri.
Ishima-elaq É Yhang Zo Yùqzô Pé
12A-ô mâ é gi, Abraham é matú, Sarâ é duìnhâng myiwe Egutuq byù Hagara mai hkû byî é yùqzo Ishima-elaq é awùt ashîn pê é hkyô nghut ri.
13Ishima-elaq é yhang zo yùqzô pê é myìng gi, yhángmòq hku é má cháng luî, a-ô mâ é eq rajung za nghut ri; Ishima-elaq é zo-mún yùq gi, Nebaiyut nghut ri; hau htâng mai gi, Kedara, Adebela, Mipsam, 14Mishima, Duma, Masa, 15Hadat, Tema, Yetura, Nahpisha, Kedema pé nghut akô. 16Haú bang gi, Ishima-elaq é yhang zo yùqzô pé nghut akô; haú bang gi, yhûmsing é nyì jowò eq wàp xuq é jáng má cháng mù wó é a-myû up é zau raxe í yùq é myìng pé nghut ri. 17Ishima-elaq chyungxe dui é zànwut bànshoq gi, 137 zân nghut ri; haú hkûn, yhâng é ló htâng é kângsoq byìt mù, shi ló byùq luî, yhâng é îchyí îwâ pê chyáng jé ló bê nghut ri. 18Yhâng é awùt ashín pé gi, Hawila mai Egutuq maukyo nàm mâ é Shura jé shoq nyi bum akô; Shura haû gi, Ashuri mau shut ròt ló é jowò nghut ri. Yhángmòq gi, yhang gu yhang mâng pé bànshoq eq gyè dông nyi#25:18 Yhang gu yhang mâng pé bànshoq eq gyè dông nyi gâ é lé, yhang gu yhang mâng pê é buìhtoq hkyam shut nyì ri le wó gâ lhê. akô nghut ri.
Yakup Eq Eso
19A-ô mâ é gi, Abraham é yhang zo Isak é hkyô nghut ri.
Abraham gi, Isak lé hku ri; 20Isak gi, Hpadan Aram#25:20 Hpadan Aram gi, Mesopotami-aq é mautsûng buìwàng hkyam shut nghut ri. mâ é Aram byù Behtu-ela é yhang zo byìzo eq Aram byù Laban é yhang gu nhammó nghut sû, Rebeka lé hâng yu é hkûn, chyungxe zànwut 40 zàn bò bê nghut ri.
21Isak gi, yhâng é yhûmsîng myhí baùdung dûng é yánmai, yhâng yhûmsîng myhî é gùnglik dông, haû Yhûmsîng Garai lé kyûdûng ri. Haû mù, Yhûmsîng Garai gi, yhâng é kyûdung dang lé gyo byi bê nghut mù, yhâng é yhûmsîng myhí Rebeka gi, zogûng wùn bê nghut ri. 22Haû zonú nhiktâng gi, ûnghkaû má chyûn htîng lhum kut nyî kô é nghut mù, Rebeka gi, “Haî mù ngá chyáng shî su dùt nyi lhê lhú?” ga taí luî, haû Yhûmsîng Garaî chyáng ê myî wú ri.
23Haû Yhûmsîng Garai gi, yhang lé,
“Náng é zoyhûm má gi, byù myû í myû lúng tô é nghut mù,
náng é ûnghkaû mai lháng byù myû í myû gam hkoq râ nghut lhê;
ra-myû gi, gó-myu htoq wum bô râ nghut lhê;
tiq sû yùq gi, ko sû yùq lé duìnhâng zô nyì râ nghut lhê.” ga taî ri.
24Yhang zohkû ahkyíng jé é hkûn, yhâng é zoyhûm má yùqzo zozûm wun tô ri. 25Sânghi hku htoq lo é yùq gi, showa nè mù, ragùngdû é, sho-maú èq wòq tô é buhîng su dùt tô ri; haû mù, yhángmòq gi, yhang lé, Eso#25:25 Eso gâ é gi, sho-maú baú baú gâ é lichyúm htoq lhê; yhâng é myìng lé gi, Edom le gâ lhê; hau é lichyúm gi, ne ri gâ é nghut lhê. ga myìng myhíng byî akô nghut ri. 26Hau htâng, yhang gu gi, yhâng é lòq èq Eso é hkyîhtáng la-nhik má kyaq zui mù, htoq lo ri; haû mù, yhâng é myìng lé gi, Yakup#25:26 Yakup gâ é gi, yhang, hkyîhtáng la-nhik má kyaq zui gâ é lichyúm nghut lhê. ga myhíng byî akô. Isak gi, zoshâng haú nhik lé Rebeka hku é hkûn, chyungxe zànwut 60 zàn bò bê nghut ri.
27Yùqzo haú nhik kô lò mù, Eso gi, sho hô lai bik kung sû dùt luî, yòso má myô nyi ri; Yakup gi, nûm é byù nghut mù, zúm má myô nyi ri. 28Isak gi, Eso ho lo é yòsô sho lé nhutmân myang mhân nyi é yánmai, Eso lé chyitdàp ri; Rebeka kúm gi, Yakup lé chyitdàp ri.
29Ra-nyí lé, Yakup gi, xun chyoq nyi é hkûn, Eso gi, zò-mut kyi luî, yòso mai jé wang lo ri. 30Haû mù, yhang gi, Yakup lé, “Hân àq, ngò zò-mut kyi bê; ngo lé, ne é xun haû byi zo laq!” ga taî ri. (Haû nghut é yánmai, yhang lé gi, Edom#25:30 Edom gâ é gi, ne é gâ é nghut lhê. ga le myhîng é nghut lhê.)
31Yakup gi, “Náng é zo-mún hkô hí ung byi aq.” ga tû taî ri.
32Haú hkûn, Eso gi, “Wú aq, ngò gi, shî râ za nghut bê; zo-mún hkô gi, ngá é matú hai a-kyû bo lo râ lhú?” ga taî ri.
33Nghut kôlhang, Yakup gi, “Haû jáng, hkû-nyí yhang ngá é hí má dakâm àq.” ga taî ri. Haû mù, Eso gi, Yakup é hí má dakâm mù, yhang lé zo-mún hkô ung byî pyám bê nghut ri.
34Hau htâng, Yakup gi, Eso lé, mùk eq nùq nè xun ra-tsuí tsuí byî ri; Eso gi, haú lé zo mù, toq luî, htoq ló bê nghut ri.
Haû dông, Eso gi, yhâng é zo-mún hkô lé haî su a ngàm kut pyâm ri.
Currently Selected:
A-pûn Awang 25: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
