A-pûn Awang 24

Isak Eq Rebeka É Hkyô

1Ahkuî, Abraham gi, chyungxe zànwut ko bê nghut mù, gyai mâng byùq bê nghut ri; haû Yhûmsîng Garai gi, yhang lé, hkyô hkat hkangmó má shimân byî ri. 2Yhang gi, yhang wó é bànshoq lé wú gon mù, yhâng yhûm mâ é duìnhâng zoshâng ushuq#24:2 Duìnhâng zoshâng ushuq gâ é lé, chyungxe zànwut je kô é duìnhâng zoshâng le wó gâ lhê. nghut sû yùq lé, “Náng é lòq, ngá é tangkyó má kat kat àq. 3-4Ngò gi, nàng, ngá zo lé, ngò bo nyi nyó tô é Hkanan byu pê é byìzo wuì mâ é myiwe a yù byî é za, ngá é mau, ngá é buìnùm wui chyáng ê mù, ngá zo Isak lé myiwe ê yû byi râ nghut lhê nghû, haû myìdam é Garai Gasang eq maúhkung é Garai Gasang nghut é, Yhûmsîng Garaî é myìng mai dakâm râ lé ô nau ri.” ga taî ri.

5Duìnhâng zoshâng haû gi, yhang lé, “Myiwe haû ngò eq rahá shí mau má a kâm châng lo é nghut jáng, hkâsu kut râ lhú? Haú hkûn, ngò gi, nungzo lé, nàng htoq lo é mau shut dum shuî taû ló râ lhú?” ga myî ri.

6Haú hkûn, Abraham gi, yhang lé, “Nàng gi, ngá zo lé, haú má a shuî taû ló râ matú myìt hpyit to aq. 7Ngá wâ é yhûm eq ngá é yhummau mai, ngo lé shuî htoq lô mù, ngo lé dang nyô luî, ‘Ngò, náng é awùt ashín lé maumyî shî byi râ nghut lhê.’ ga ngo lé dakâm dang taî é, maúhkung é Garai Gasang, haû Yhûmsîng Garai gi, nàng, ngá zo lé, haû mâ é myiwe wó yû byi râ matú, Yhâng é maumang lagyo lé, náng é hí má nhang kat râ nghut lhê. 8Myiwe haû nàng eq rahá a châng lò nho é nghut jáng, ahkuî nàng dâkam é mai lùt râ nghut lhê. Nghut kôlhang, nàng, ngá zo lé za haú má hkâshuî taû ló.” ga taî ri. 9Haû mù, duìnhâng zoshâng haû gi, yhâng é yhûmsîng hpó Abraham é tangkyó má, yhâng é lòq kat mù, haú hkyô eq séng luî, yhâng hí má dakâm dang taî ri.

10Hau htâng, duìnhâng zoshâng haû gi, yhâng é yhûmsîng hpô chyáng mai hpau kat zè gè jung hkangmó lé yu wùn mù, yhâng yhûmsîng hpô é gola-uk raxê du lé buí luî, htoq e ló bê nghut ri. Yhang gi, Aram Naharim#24:10 Aram Naharim gi, Mesopotami-aq maû é mautsûng buìwàng hkyam shut nghut ri. mau shut e ló mù, Nahora wà má ló jé ri. 11Yhang gi, wà yàm mâ é wuìhtúng nàm má, gola-uk pé lé hkyîhput htuq gòp nhang ri; Haú u gi, myínhtâng zó nghut mù, myiwe wuì, wuì hkâm râ matú htoq lé lo é ahkyíng nghut ri.

12Haú hkûn, yhang gi, “Ngá é yhûmsîng Abraham é Garai Gasang, Yhûmsîng Garai ê, hkû-nyí ngo lé hkyô nyàng nhâng laq; ngá é yhûmsîng Abraham lé chyitdàp shogyo myìt shit laq. 13Wú aq, ngò gi, wuìbúm yâm shî má yàp tô lhê; wà byu wui é byìzô pé gi, wuì hkâm kôrâ ga lé lo bum akô nghut ri. 14Ngò, myiwe zo rayùq lé, ‘Ngò, wuì shuq râ, náng é wuì yambú lé wàq hkyó laq.’ nghû taî é hkûn, yhang gi, ‘Shuq àq, ngò, náng é gola-uk pé lé le hkâm huq râ.’ ga taî lo é myiwe zo gi, Náng é duìnhâng zoshâng Isak é matú Nàng hkyin tô é sû nghut sháng gàq. Haú dông mai, ngò gi, ngá é yhûmsîng hpó lé, Nàng, chyitdàp shogyo myìt tûn shit bê hkyô lé wó sé râ nghut lhê.” ga kyûdûng ri.

15Yhang kyû haû a ban dung shi-má, Rebeka gi, yhâng é gòqsân má yhâng é wuì yambú wàq mù, htoq lé lo ri. Yhang gi, Abraham é yhang gu Nahora é yhûmsîng myhí Milihka é yhang zo yùqzo, Behtu-ela é yhang zo byìzo nghut ri. 16Myiwe zo haû gi, îhpyô wunbu yúng dik é htoq agó, yùqgè lé le a sé shî é, zo-myi gyíng nghut ri. Yhang gi, wuìbúm má gyó ê mù, yhâng é wuì yambú má wuì hkam pyíng luî dum dòq lo ri.

17Duìnhâng zoshâng haû gi, yhang lé hân za ê hui luî, “Jeju mai, náng é wuì yambú mâ é wuì ra-tsuí, ngo lé byi huq laq.” ga taî ri.

18Myiwe zo haû gi, “Ngá é yhûmsîng ê, shuq àq.” ga taí luî, yhâng é wuì yambú lé, yhâng é lòq má hân hân lhoqnyhum hkyô yù mù, yhang lé wuì byi huq ri.

19Yhang lé wuì byi huq é htâng má, myiwe zo haû gi, “Náng é gola-uk pé lé le, yhángmòq ban shuq gyi shoq, ngò, wuì hkâm huq râ.” ga taî ri. 20Haû mù, yhang gi, yhâng é wuì yambú mâ é wuì lé, lànghkang má hân hân hut kat pyám mù, wuìhtúng má dum din ê luî, wuì myo myo hkam lò lò kut mù, gola-uk pé bànshoq, lùq shuq shoq hkâm huq ri. 21Byù haû yùq gi, yhâng é hkyôwuì lé, haû Yhûmsîng Garai mai hkyô lhoqnyhâng byi râ lùq, a lhoqnyhâng byi râ lùq nghu é hkyô lé wó sé râ matú, dang rahkun le a taî é za, yhang lé chyáng yâm mai wú tsuq nyi ri.

22Haû gola-uk pé ban shuq gyî bùm kô é hkûn, byù haú yùq gi, rache kô bo é nhô lhang hîng góng eq rarung èq ngo che kô bo é hîng lòqhting razúm lé yu htoq ri. 23Hau htâng, yhang gi, “Nàng, ó yùq é byìzo nghut lhê? Jeju mai, ngo lé taî kyô wú aq; núnghpê wui é yhûm má, hkû-myîn ngá-mòq bíng yû râ jowò jòq ri lhú?” ga myî ri.

24Myiwe zo haû gi, “Nahora é yhûmsîng myhí Milihka hku é yùqzo Behtu-ela é yhang zo byìzo nghut lhê.” ga tû taî ri. 25Hau htoq agó, yhang gi, “Ngá-mòq yhûm má, hkôwá pé eq mhan pé lùqdùn shoq jòq lhê; hkû-myîn núngmòq bíng yû râ jowò le jòq lhê.” ga xoq taî ri.

26Haú hkûn, byù haú yùq gi, ngóm gòp mù, haû Yhûmsîng Garai lé noqkuq dang taî é gi, 27“Hkya-on kúngtôn hkyô gi, ngá é yhûmsîng lé chyitdàp shogyo myìt eq jujúm myìt a shit a kut nghut é, ngá é yhûmsîng Abraham é Garai Gasang, haû Yhûmsîng Garaî chyáng ru joq nyî sháng gàq ô! Haû Yhûmsîng Garai gi, ngo lé, ngá é yhûmsîng hpô é buìnùm wui é yhûm má jé shoq, hkyôwuì má shuî-û yù bê nghut ri.” gâ ri.

28Myiwe zo haû gi, din ló mù, yhâng nû é yhûmbyù wuì lé haú hkyô pé ló taî kyô ri. 29Rebeka gi, Laban gâ é mùng zo rayùq wó é nghut luî, haú yùq gi, wuìbúm nàm má nyi tô é byù haú yùq chyáng hân din htoq e ri. 30Yhang gi, nhô hkóng eq yhang gû é lòq mâ é hting lé myang é eq, byù haú yùq mai Rebeka lé lom taî é hkyô lé, Rebeka mai htòt taî kyô é lé wó gyô é hkûn yhang, byù haú yùq chyáng htoq ê mù, yhang lé, wuìbúm nâm mâ é gola-uk pê é ayàm má yàp tô é lé, ê myang ri. 31Haû mù, yhang gi, “Haû Yhûmsîng Garaî èq shimân byî é hui sû ê, lé lô àq; nàng, haî mù shî má yàp nyi lhê lhú? Ngò gi, yhûm le hen to bê; gola-uk pê é matú jowò le hen to bê nghut lhê.” ga taî ri.

32Haû mù, yhang gi, haú yhûm má ê bê nghut mù, gola-uk pé má buí tô é wò lé wàq hkyó bekô nghut ri. Gola-uk pê é matú hkôwá eq mhan pé wàq kat byi kômù, yhang eq yhâng é byu pé hkyî chi râ matú wuì wàq byi bekô nghut ri.

33Hau htâng zoshuq lé yhâng é hí má htûng byî akô; nghut kôlhang, yhang gi, “Ngò, núngmòq lé taî kyo râ é hkyô lé, a wó taî kyo kyo gi, zoshuq lé a zo shirâ nghut lhê.” ga taî ri.

Haú hkûn, Laban gi, “Haû jáng, ngá-mòq lé taî kyô wú aq.” ga taî ri.

34Haû mù, yhang gi, “Ngò, Abraham é duìnhâng zoshâng nghut lhê. 35Haû Yhûmsîng Garai gi, ngá é yhûmsîng lé agùn agó shimân byi bê nghut mù, yhang gi, sùtzè wó sû dùt bê nghut ri. Haû Yhûmsîng Garai gi, yhang lé, sau pé, no myang pé, ngùn htung hîng htung pé, duìnhâng zoshâng myiwe yùqgè pé, gola-uk pé eq loze pé lé byî to bê nghut ri. 36Ngá yhûmsîng hpô é yhûmsîng myhí Sara gi, chyungxe zànwut mang bê le yhâng é matú yùqzo rayùq bau byî é nghut mù, ngá yhûmsîng hpó gi, yùqzo haú lé, yhang sing é jung hkangmó byî to bê nghut ri. 37Ngá é yhûmsîng hpó gi, ngo lé, ‘Nàng gi, ngò bo nyi nyó tô é mau mâ é Hkanan byu pê é byìzo wuì mâ é, ngá zo lé myiwe a yù byî é za, 38ngá wâ é yhûmbyù wuì, ngá é a-myû koq chyáng ê mù, ngá zo Isak lé myiwe ê yû byi râ.’ ga dakâm nhang ri.

39Haú hkûn, ngò gi, ngá é yhûmsîng hpó lé, ‘Myiwe haû, ngò eq rahá a châng lo le, hkâsu kut râ?’ nghû myî é nghut lhê.

40Haû jáng, yhang gi, ‘Ngò châng sô nyi é haû Yhûmsîng Garai gi, nàng eq rahá Yhâng é maumang lagyo lé nhang kat râ nghut mù, náng é hkyôwuì lhoqnyhâng byi râ nghut lhê; haú hkûn, nàng gi, ngá é a-myû koq, ngá wâ é yhûmbyù wuì mai, ngá zo lé myi gê yù byi râ dùt lhê. 41Ngá é a-myû koq má nàng jé ê jáng, nàng gi, yhang lhom he-ngìk kôlhang, ngò, nàng lé dakâm nhang é dang mai lùt râ nghut lhê; nàng gi, ngò, nàng lé dakâm nhang é dang mai lùt râ za nghut lhê.’ ga tû taî ri.

42Hkû-nyí, ngò, wuìbúm má jé lé é hkûn, ngò gi, ‘Ngá é yhûmsîng Abraham é Garai Gasang, Yhûmsîng Garai ê, Nàng ô nau é nghut jáng, jeju mai, ngò lé bê nghut é hkyôwuì lé lhoqnyhâng byi aq. 43Wú aq, ngò gi, wuìbúm yâm shî má yàp tô lhê; zo-myi zo rayùq wuì hkâm lé é nghut jáng, ngò gi, haú yùq lé, “Jeju mai, náng é wuì yambú mâ é wuì, ngo lé ra-tsuí byi huq àq.” nghû taî é hkûn, 44yhang gi, ngo lé, “Shuq àq, ngò gi, náng é gola-uk pé lé le hkâm huq râ.” ga tû taî é nghut jáng, haú yùq gi, ngá é yhûmsîng hpô é yhang zo yùqzô é matú, haû Yhûmsîng Garaî èq hkyin to byî é sû nghut sháng gàq.’ nghû taî é nghut lhê.

45Ngò gi, ngá é myìt hkaû má kyû a ban dung shi-má, Rebeka gi, yhâng é gòqsân má yhâng é wuì yambú wàq mù, htoq lé lo ri. Yhang gi, wuìbúm má gyó ê mù, wuì ê hkam ri; haú hkûn, ngò gi, yhang lé, ‘Jeju mai wuì byi huq àq.’ nghû taî é nghut lhê.

46Haú hkûn, yhang gi, yhâng é gòqsân mai yhâng é wui yambú lé hân za wàq hkyó mù, ‘Shuq àq, ngò gi, náng é gola-uk pé lé le hut kat byi râ.’ ga taî ri. Haû mù, ngò gi, shuq bê; yhang gi, gola-uk lé le hut kat byî ri.

47Ngò gi, yhang lé, ‘Nàng, ó yùq é byìzo nghut lhê?’ nghû myi jáng, yhang gi, ‘Nahora é yhûmsîng myhí Milihka hku é yùqzo Behtu-ela é yhang zo byìzo nghut lhê.’ ga taî ri.

Haú hkûn, ngò gi, yhâng é nhô má nhôhkóng lhang byi mù, yhâng é lòq má hting hut byî luî, 48ngóm gòp mù, haû Yhûmsîng Garai lé noqkuq é nghut lhê. Ngò gi, ngá é yhûmsîng hpô é yhang zo yùqzo lé, yhang gû é yhâng gashu byìzo yù byi râ matú, ngo lé hkyô nyàng shuî sô é, ngá é yhûmsîng hpó Abraham é Garai Gasang, haû Yhûmsîng Garai lé jeju hkya-ôn é nghut lhê. 49Ahkuî, núngmòq ngá é yhûmsîng hpó lé, chyitdàp shogyo hkyô eq jujúm hkyô lé shit râ nghut jáng, ngo lé taî kyo keq; a shit kôrâ nghut jáng le, ngo lé taî kyo keq, haú hkûn, ngò hká hkyô shut tau râ nghut é lé wó sé âbe.” ga taî ri.

50Laban eq Behtu-ela hpe gi, “Shí hkyô gi, haû Yhûmsîng Garaî chyáng mai lo é nghut ri; ngá-mòq gi, nang lé, shí hkyô shèq, hé hkyô shèq nghû taí râ hkyô haî a jòq. 51Rebeka gi, shî nghut ri; yhang lé shuî ló aq; haû Yhûmsîng Garai hkyô shit é eq rajung za, yhang gi, náng é yhûmsîng hpô é yhang zô é yhûmsîng myhí ló dùt sháng gàq.” ga taî akô.

52Abraham é duìnhâng zoshâng gi, yhánghpe taî é lé wó gyo jáng, haû Yhûmsîng Garai lé, myigùng má ngóm gòp noqkuq ri. 53Hau htâng, duìnhâng zoshâng haû gi, hîng eq ngùn mhón zê, mhón râ mèbu pé lé yu htoq mù, Rebeka lé tsing byî ri; yhâng mùng zo lé le, yhâng nu lé le, gù bo jung chyûnghuq byî ri. 54Hau htâng, yhang eq yhâng htâng châng é bang gi, zo mù, shuq mù, haú myîn, haú má bíng yu akô.

Htang nàpkyó yhángmòq toq lô kô é hkûn, yhang gi, “Ngá é yhûmsîng hpô chyáng taû ló nhâng keq hkoi.” ga taî ri.

55Nghut kôlhang, Rebeka é mùng zo eq yhâng nu gi, “Zoshâng shî, ngá-mòq eq raxê nyí kô nyi yù shi sháng; haú hkûn shèq, yhang núngmòq htâng bo châng lò sháng gàq.” ga tû taî akô.

56Nghut kôlhang, yhang gi, yhángme lé, “Haû Yhûmsîng Garai gi, ngá é hkyôwuì lé, hkyô nyàng nhâng bê nghut mù, ngo lé hkâhkûm nyi lo kó. Ngò, ngá é yhûmsîng hpô chyáng ló râ matú, ngo lé nhang kat keq hkoi.” ga taî ri.

57Haú hkûn, yhángme gi, “Zoshâng lé wùt yù mù, haú hkyô yhang lé myî wú sháng.” ga taî akô. 58Haû mù, yhángme gi, Rebeka lé wùt yù mù, yhang lé, “Nàng gi, byù shí yùq eq bo ló râ lhú?” ga myî akô.

Yhang gi, “Ngò bo ló râ.” ga taî ri.

59Haû mù, yhángme gi, yhángmê é nhammó Rebeka lé, yhang lé wú gôn ko sû, Abraham é duìnhâng zoshâng eq yhâng é byu pé le mù, yhâng é hkyôwuì shut nhang kat bê nghut ri. 60Hau htoq agó, yhángme gi, Rebeka lé tôn byi mù, yhang lé, “Ngá-mòq é nhammó zo-myi ê, nàng gi, byù mun mun sen sên é înu dùt sháng gàq; náng é awùt ashín pé gi, yhángmòq é gye pê é wà wàng hkum lé sîng kó sháng gàq.” ga taî akô nghut ri.

61Haú hkûn, Rebeka eq yhang lé wú gon bang gi, zè món mù, yhángmòq é gola-uk pé má ji kó luî, byù haú yùq eq bo châng ló ri. Haû mù, duìnhâng zoshâng haû gi, Rebeka lé shuî chûng mù, htoq ló bê nghut ri.

62Haú u lé, Isak gi, Maupyî Mau shut nyi é nghut mù, Beri Lahai Roi mai taû lo ri. 63Yhang gi, myínhtâng zó lé, myìt lhîng hkyùq wú râ matú yò shut e ri. Yhang gi, tu wú kat le, gola-uk pé chyâng lo nyi é lé myang kat ri. 64Rebeka le, tu wú kat é hkûn, Isak lé myang ri. Haû mù, yhang gi, gola-uk mai gyó luî, 65duìnhâng zoshâng haú lé, “Ngá-nhúng lé tê râ ga yò má lé lo é sû gi, ó yùq nghut ri lhú?” ga myî ri.

Haú hkûn, “Yhang gi, ngá é yhûmsîng nghut lhê.” ga duìnhâng zoshâng haû tû taî ri. Haû mù, yhang gi, yhâng é myòqnghop lé yù mù, yhânggùng yhang nghop yû bê nghut ri.

66Hau htâng, duìnhâng zoshâng haû gi, yhang kut laî é hkyô bànshoq, Isak lé taî kyô ri. 67Isak gi, Rebeka lé, yhâng nu Sarâ é zúm hkaû má shuî wang ló mù, yhang lé hâng yù bê nghut ri. Haû mù, Rebeka gi, yhâng é yhûmsîng myhí dùt bê nghut luî, Isak gi, yhang lé chyitdàp ri; Isak gi, yhâng nu shi é mai nhik wó tîng yù bê nghut ri.

Currently Selected:

A-pûn Awang 24: znot

Highlight

Copy