Htoq Ló 36

1Haû mù, Bezalela, Oholi-aba eq, haû Yhûmsîng Garaî èq zui saí kung râ hpàqchyî eq sân-yúng jowò saî é múzó bànshoq lé hkâsu kut saí râ wó sê é a-tsam byî to huî é lòqmú kung bang yùq hkangmó gi, haû Yhûmsîng Garai hkunmó hkyô tô é eq rajung za zui saí ra kôrâ nghut lhê.” ga taî ri.

2Mosheq gi, Bezalela eq Oholi-aba lé le, haû Yhûmsîng Garaî èq a-tsam byî é hui luî, múzó haú lé zui saí nau é myìt toq é lòqmú kung bang yùq hkangmó lé le tsîng yu ri. 3Haú bang gi, sân-yúng jowò saî é múzó wó kut râ matú Isira-elaq byu pé yu lé é zè bànshoq lé, Mosheq chyáng mai hàp yu akô nghut ri. Haû mai lai luî, shiwa byu pé gi, byi naû hkungga lé nàp wuì yu lé lo bum akô nghut ri. 4Haû mù, sân-yúng jowò mâ é múzó bànshoq lé zui saî nyi é lòqmú kung bang bànshoq gi, yhángmòq zui saî nyi é lòqzó mai htoq luî, 5Mosheq lé, “Shiwa byu pé gi, haû Yhûmsîng Garai hkunmó hkyô tô é múzó pé kut râ htoq chyân shoq yu lé nyi bum akô nghut ri.” ga taî akô nghut ri.

6Haú hkûn, Mosheq gi, “Yùqgè nghut nghut, myiwe nghut nghut, haû sân-yúng jowo é matú alû chyûnghuq a yu lé ra lo.” ga hkunmó hkyô é nghut luî, yhángmòq gi, xuq tô é wàp jàm shoq dang haú lé taî pyô bekô nghut ri. Haû mù, shiwa byu pé gi, xoq luî a yu lé lo kó nghut ri. 7Haî mù gâ le, yhángmòq wó tô é zè pé gi, múzó haû bànshoq zui saí râ matú râ é htoq chyan to bê nghut ri.

Sàksé Zúm

8Mú zui bang mâ é lòqmú kung bang bànshoq gi, pán-gyang raxê long lé sàksé zúm saî akô. Pán-gyang haú pé lé gi, wáng dui tô é nú nhâm é jîhkying èq le, mauhkûng nyuì nyui é, mê é eq zam zam ne é hkying èq le wòq é htoq agó, wòqgan wòq kûng é byu èq hkerubim lé le wòq tap tô akô nghut ri. 9Pán-gyang haú pé bànshoq gi, rawuí wuí za dùt râ matú, hîng hpyang í xe shit dúng, làm hpyang myi dúng dúng chyat bo ri. 10Yhángmòq gi, pán-gyang ngo long lé ralong eq ralong hkyup xoq lhûm to mù, gótû ngo long lé le ralong eq ralong hkyup xoq lhûm tô akô. 11Yhángmòq gi, hkyup xoq tô é pán-gyang lông é ahtâng má, mauhkûng nyuì nyui é pân èq kyindong tsing hkyup dúng tô akô. Hkyup xoq tô é pán-gyang gólông é ahtâng má le haû eq rajung za kut akô nghut ri. 12Hau htoq agó, yhángmòq gi, hkyup tô é pán-gyang long ralong má gi, kyindong ngo xê dong, pán-gyang gólong mâ é ahtâng má gi, kyindong ngo xê dong kut, haû í long mâ é kyindong pé rahá hkyúm hkyúm kut tô akô nghut ri. 13Hau htâng, yhángmòq gi, sàksé zúm haû ralhum za wó dùt to râ matú, hîng gòknghe ngo xê lhum saí mù, pán-gyang haû í long lé nghê zing lhúm nhang tô akô nghut ri.

14Yhángmòq gi, sàksé zúm má mau râ matú, bainám sho-maú pán-gyang raxe ralong saî akô. 15Pán-gyang haû raxe ralông é bànshoq gi, rawuí wuí za hîng hpyang sum xê dúng, làm hpyang myi dúng dúng chyat bo ri. 16Yhángmòq gi, pán-gyang ngo long lé ralong za dùt shoq xoq to mù, gótû hkyuq long lé le ralong za dùt shoq xoq tô akô nghut ri. 17Hau htâng, yhángmòq gi, pán-gyang xoq lhûm tô é hî lông é hkyupsui htâng cháng luî le, gólông é hkyupsui htâng cháng luî le, kyindong ngo xê dong dong htông dúng tô akô nghut ri. 18Yhángmòq gi, zúm ralhum za dùt shoq nghê zìng râ matú, gyi gòknghe ngo xê lhum saî akô nghut ri. 19Hau htâng, yhángmòq gi, zúm haú lé maû nghop râ matú, lhoqnhe tô é saulo sho-kuq lé ralong, hau é ahtoq má puq nghop râ gótû gîng é sho-kuq ralong saî akô nghut ri.

20Yhángmòq gi, sàksé zúm lé wàm râ matú, htángmó gâm siklong pé lé saî akô nghut ri. 21Siklong hkangmó gi, hîng hpyang raxê dúng, làm hpyang radúng èq rahtô htô chyat bo ri. 22Sàksé zúm é siklong pé bànshoq lé, long hkangmó má, rawuí wuí zâ é baùhtuq rashut ralhum kut tsing tap tô akô. Yhángmòq gi, sàksé zúm é siklong bànshoq lé haú dông chyat saî akô nghut ri. 23Yhángmòq gi, sàksé zúm maupyî hkyâm é matú siklong í xê long saí mù, 24siklong ralông é baùhtuq í lhum lhum mâ é achuq má kat râ matú, ngùn hkoq myi xê hkyap lé le saî akô nghut ri. 25Haû eq rajung za, sàksé zúm é góhkyam nghut é mautsûng hkyam shut é matú le, siklong í xê long saí kômù, 26siklong hkangmó é baùhtuq achuq pé má kat râ matú, ngùn hkoq myi xê hkyap le saî akô nghut ri. 27Yhángmòq gi, sàksé zúm é nùnghtâng hkyam nghut é buìwàng hkyâm é matú, siklong hkyuq long saí kômù, 28haû nùnghtáng hkyam í chyûn mâ é matú, siklong í long saî akô nghut ri. 29Achyûn haû í chyûn mâ é siklong lé gi, achuq mai ahpyo mâ é sânghî nghegóng jé shoq puq tap tô akô; í lông é lé haú dông chyat kut tô akô nghut ri. 30Haû mù, siklong shit long bò luî, long hkangmó é matú ngùn hkoq í hkyap hkyap kut, raxe hkyuq hkyap bo ri.

31Yhángmòq gi, í hkyam shut lé kyâng tap to râ htángmó gâm sik yang lé le saî akô. Sàksé zúm rahkyam shut mâ é siklong pê é matú sik yang ngo yang saí kômù, 32góhkyam shut mâ é matú ngo yang saí kôluî, sàksé zúm é nùnghtâng hkyam nghut é buìwàng hkyam mâ é siklong pê é matú ngo yang saî akô nghut ri. 33Yhángmòq gi, siklong pê é agùng mai hé htâng shí htâng hpyot wó kyâng ròt râ matú, agùng má kyáng râ sik yang saî akô nghut ri. 34Yhángmòq gi, siklong pé má hîng shup kômù, sik yang pé kyáng râ matú hîng góng pé saî akô. Hau htoq agó, kyáng râ sik yang pé lé le hîng shup akô nghut ri.

35Yhángmòq gi, wòqgan wòq kûng é byu èq hkerubim le wòq tap tô é, mauhkûng nyuì nyui é, mê é eq zam zam ne é hkyîng eq wáng dui tô é nú nhâm é jîhkying èq wòq tô é pán-gyang lé saî akô nghut ri. 36Yhángmòq gi, pán-gyang hau é matú htángmó zîng myi zîng saí kômù, hîng shup kôluî, zìng haú pê é matú hîng gòknghe pé saí kômù, ngùn hkoq myi hkyap saî htoq yu akô nghut ri. 37Yhángmòq gi, zúm má wàng râ hkûm é matú, mauhkûng nyuì nyui é, mê é eq zam zam ne é hkyîng eq wáng dui tô é nú nhâm é jihkyîng lé rago dàt htaû é byù dông mai pán-gyang htau kômù, 38haú pê é matú, gòknghe dàp é zìng ngo hkat lé le saî akô. Yhángmòq gi, zìng nyuq eq haú pê é pyîyang lé hîng shup kômù, gyî èq haú pé tsûng râ hkoq ngo hkyap saî akô nghut ri.

Currently Selected:

Htoq Ló 36: znot

Highlight

Compare

Copy