Htoq Ló 35

Bánno Buìnyì Eq Sêng É Târâ Pé

1Mosheq gi, Isira-elaq byù hpûng gón lé zùp zing nhang to mù, yhángmòq lé, “A-ô mâ é dang pé gi, núngmòq kut râ matú, haû Yhûmsîng Garai hkunmó hkyô kat é dang pé nghut lhê. 2Hkyuq nyí yhang mú zui ji saí râ nghut lhê; nghut kôlhang, nyhit nyí nyí gi, núngmòq é chyoiyúng buìnyì nghut mù, haû Yhûmsîng Garaî é matú hkyak bánnô yu é buìnyì nghut lhê. Haú nyí má mú haî zui sû nghut kôle, shî ra râ nghut lhê. 3Núngmòq nyi é jowò hkangmó má, Bánno Buìnyì lé myi ge mùt râ a nghut.” ga taî ri.

Sàksé Zúm É Matú Râ É Zè Pé

4Hau htoq agó, Mosheq gi, haû Isira-elaq byù hpûng gón lé, “A-ô mâ é dang pé gi, haû Yhûmsîng Garai hkunmó hkyô kat é dang pé nghut lhê. 5Núngmòq wó é mâ é lé, haû Yhûmsîng Garaî é matú alû chyûnghuq hkyui yù keq. Byí nau é i-myìt mai byi râ sû ó yùq nghut kôle, haû Yhûmsîng Garaî chyáng ge yu lé byî é chyûnghuq pé gi, hîng, ngùn eq gyi; 6mauhkûng nyuì nyui é, mê é eq zam zam ne é hkyîng, nú nhâm é jihkyîng pán; bainám sho-maú, 7lhoqnhe tô é saulo sho-kuq, gótû gîng é sho-kuq, htángmó gâm sik, 8myi tuq râ matú tsanlun xû, namngón xû bùt râ matú eq namngón shôm nyhé râ matú namngón jung pé, 9hkyangjong bu-kó eq wànggò long má tap râ matú, nyhaú myòqjí su dùt jung lungsêng eq gótû lungsêng pé nghut râ nghut lhê.

10Núngmòq chyáng mâ é lòqmú kûng é bang bànshoq gi, haû Yhûmsîng Garai hkunmó hkyô é jung hkangmó lé le kut ra râ nghut lhê. 11Haú pé gi, sàksé zúm eq hau é zúmdan, zúmdan nghop pé, gòknghe pé, siklong pé, pyî râ sik yang pé, zìng pé eq hkoq pé; 12sàksé dò eq haú lé wàq é sik yang pé, jeju dò a-myhi eq haú lé kyô râ pán-gyang; 13mùkgyàp, haú lé wàq é sik yang pé eq haú mâ é zè bànshoq, Tô Shit é mùk; 14myi tuq râ matú myi-kok tsûngjang eq haú má chûng râ zè bànshoq, haú mâ é myibung eq myi tuq râ xû; 15namngón jung nyhé hkungga gyàp eq haú lé wàq râ sik yang pé, bùt râ namngón xû eq nyhé râ namngón shôm hkungga, sàksé zúm hkum má lhang râ pán-gyang; 16myi nyhé hkungga nhông râ hkungga gyàp eq haú má chyoî râ gyi zuî long, haú lé wàq râ sik yang pé eq haú mâ é chûngzè bànshoq, gyi lànghkang eq hau é zìng; 17wânghkaû gò râ pán-gyang pé eq hau é zìng pé hkoq pé, wâng hkum má lhang râ pán-gyang; 18sàksé zúm eq wâng mâ é matú sangchyam pé, haú pê é tui pé; 19hkyangjong Arun é matú chyoiyúng buhîng pé eq yhang zo yùqzô pé hkyangjong dông mú wùn wàq é hkûn wùt râ matú buhîng pé nghut é, sân-yúng jowò má dójaú é hkûn wùt râ wòq ge tô é buhîng pé nghut lhê.” ga taî ri.

20Haú hkûn, Isira-elaq byù hpûng gón gi, Mosheq é hí mai htoq ló kôluî, 21byí nau é myìt bò mù, byi râ myìt toq nyî sû yùq hkangmó gi, zùphpong zúm saí râ matú le, haú má dójaú é hkûn chûng râ bànshoq é matú le, chyoiyúng buhîng pê é matú le, haû Yhûmsîng Garaî chyáng alû chyûnghuq yu lé lo akô nghut ri. 22Byí nau é i-myìt bo é yùqgè myiwe bànshoq bang gi, hîng zè ajung jung nghut é, hîng gòknghe pé, no góng pé, lòqtsung pé eq gótû gùng mhón zê pé yu lé lo bum akô. Yhángmòq bànshoq bang gi, yhûmsing é hîng zè lé, wàq hê hkungga dông haû Yhûmsîng Garai lé lé byî akô nghut ri. 23Nyui é hkyîng, mê é hkyîng, zam zam ne é hkyîng, nú nhâm é jihkyîng, bainám sho-maú, lhoqnhe tô é saulo sho-kuq eq gótû gîng é sho-kuq wó é bang le, haú pé lé yu lé lo bum akô nghut ri. 24Haû ngùn eq gyi chyûnghuq byî é bang le, haú pé lé alû chyûnghuq dông haû Yhûmsîng Garaî chyáng yu lé lo bum akô; múzó haû eq sêng é htángmó gâm sik wó é bang yùq hkangmó le, haú lé yu lé lo akô nghut ri. 25Lòqmú kûng é myiwe wuì yùq hkangmó le, yhûmsing é lòq èq dui tô é nyui é hkyîng, mê é hkyîng, zam zam ne é hkyîng, nú nhâm é jihkyîng pé lé yu lé lo akô nghut ri. 26Haû lòqmú bò mù, yhûmsîng yhang myìt toq é myiwe wuì bànshoq le, bainám sho-maú lé wáng dui akô nghut ri. 27Haû ushuq kut bang gi, hkyangjong bu-kó eq wànggò long má kyûng tap râ nyhaú myòqjí su dùt jung lungsêng eq gótû lungsêng pé yu lé lo akô nghut ri. 28Hau htoq agó, yhángmòq gi, myi tuq râ matú le, namngón xû bùt râ matú le, namngón shôm nyhé râ matú le, namngón jung pé eq tsanlun xû yu lé lo akô nghut ri. 29Byí nau é myìt toq é Isira-elaq byù yùqgè myiwe wuì bànshoq gi, yhángmòq zui saí râ matú, haû Yhûmsîng Garaî èq Mosheq dông hkunmó hkyô tô é múzó pé bànshoq é matú, Yhûmsîng Garai lé byi naû chyûnghuq yu lé byî akô nghut ri.

Bezalela Eq Oholi-aba

30Haú hkûn, Mosheq gi, Isira-elaq byu pé lé, “Wú keq, haû Yhûmsîng Garai gi, Yudaq up mâ é Hura é yhang shu, Uri é yhang zo yùqzo Bezalela lé hkyin yù bê nghut mù, 31yhang lé, Garai Gasâng é Sô lhoqpyíng byi luî, hpàqchyî byéng-yá le, sê gyô é u-nuq le, hpàqchyî le, ajung jung dàt kut é lòqmú hpàqchyî pé bànshoq le wó nhâng bê nghut lhê. 32Haû gi, hîng, ngùn eq gyi pé lé ajà jà làklaí shoq dàt saî htoq râ matú le, 33haú pé kat râ lungsêng lé dàt hkoq dàt kyung râ matú le, sik lòqmú dàt zui saí râ matú le, gótû lòqmú ajà jà dàt saî htoq râ matú le nghut lhê. 34Haû Yhûmsîng Garai gi, yhang lé le, Dan up mâ é Ahisamak é yhang zo yùqzo Oholi-aba lé le, góbang lé mhoq byi râ a-tsam byi bê nghut ri. 35Hau htoq agó, Yhang gi, yhángmòq lé, kyûng é lòqmú zui saí bang dùt râ dông le, azòng pé dàt myìt htoq bang dùt râ dông le, mauhkûng nyuì nyui é, mê é eq zam zam ne é hkyîng eq nú nhâm é jihkyîng zá dàt htaû é bang dùt râ dông le, wòqgan dàt wòq bang dùt râ dông le, ajà jà dàt saî htoq râ hpàqchyî lhoqpyíng byi bê nghut ri; haû mù, yhángmòq bànshoq bang gi, zui saí kung bang eq azòng pé dàt myìt htoq kûng é bang nghut bum akô nghut ri.

Currently Selected:

Htoq Ló 35: znot

Highlight

Compare

Copy