Amo 5
5
Ngaùhkyang Sâng Mù Myìt Lhîng Wó Râ Matú Ji Yu É Hkyô
1Isira-elaq byu pé ê, núngmòq eq séng luî ngò ngaùhkyang sang é dang shî lé gyo keq;
2“Zo-myi gyíng nghut é Isira-elaq gi, lêng gyòp bê nghut ri;
hkâ-nhám le dum wó toq râ a nghut lo;
yhang gi, ó yùq èq le tu toq é a hui loshoq,
yhûmsing é maumyî má dú pyâm tô é huî ri.” nghu é nghut lhê.
3Haû Ahko Ahkáng lhúnglháng wó Sû Yhûmsîng Garai gi, Isira-elaq byu pé lé shî su ga taî ri;
“Gyèzo rahkyîng yùq lhoqhtoq é wà mó gi,
rashô yùq za nyi myìt to râ nghut mù,
gyèzo rashô yùq lhoqhtoq é wà gi,
raxê yùq za nyi myìt to râ nghut lhê.” gâ ri.
4Haû Ahko Ahkáng lhúnglháng wó Sû Yhûmsîng Garai gi, Isira-elaq byu pé lé shî su ga taî ri;
“Ngo lé hô keq; haû jáng núngmòq chyungxe duì kôrâ nghut lhê;
5Behtela wà lé hkâhô kó;
Giligala wà shut hkâ-ê kó;
Berasheba wà shut gyung hkâhtoq kó;
hkâsu mù gâ le, Giligala wà bang gi, gè gè yhang shúm zung byùq é hui kôrâ nghut mù,
Behtela wà gi, haî le a dùt loshoq yom ló byùq râ nghut lhê.” gâ ri.
6Haû Yhûmsîng Garai lé hô keq; haû jáng, núngmòq chyungxe duì kôrâ nghut lhê;
haû a nghut jáng, Yhang gi, Yosep é a-myû up má myi su laî ló mù,
haú pé lé myui pyám râ nghut luî,
ó le a wó sat pyám loshoq Behtela wà lé nyhê hkyô pyám râ nghut lhê.
7Târâ ràp-rá hkyô lé, ladu lai shoq hpu zo hkyô kut pyám mù,
díngmán hkyô lé, myigùng má dú pyâm é bang nyi ri.
8Kyî wòqhkyún eq Bó kyî pé lé hpân Sû,
gùnggàm lé maubó nhâng mù,
nyí lé mauchut nhang é Sû,
wuìshuq lung-aû mâ é wuì lé wùt yù mù,
myigùng htoq má hut hkyô é Sû,
Yhâng é myìng gi, Yhûmsîng Garai gâ ri.
9Yhang gi, wúm htan é bang lé lhoqhtên pyám mù,
gingtîng é wà mó lé lhoqhkyop pyâm ri.
10Haú bang gi, wà hkum yàm má byù mhoqshit sû lé a nguì kut kômù,
tengmán hkyô taî é sû lé chaq pyâm akô nghut ri.
11Núngmòq gi, asho awuî é bang lé zìk zo mù,
yhángmòq é gùqzò lé zìk yu pyám byî akô nghut ri.
Haû mù, núngmòq gi, lùqgòk yhûm mó pé saí kôlhang,
haú má myang lúng kôrâ a nghut;
tsibyiq hkyâm pé hô yúng to kôlhang,
haú mâ é tsibyiq wing myàng shuq kôrâ a nghut.
12Hkâsu mù gâ le, Ngò gi, núngmòq lu laî é mara a-myû myû lé le,
núngmòq é mara hkâ-í kô é lé le sê lhê.
Núngmòq gi, mara a bò bang lé zìk zo zìk shuq mù,
lòqhkaû lang zê yù kôluî, wà hkum yàm má asho awuî é bang lé
târâ a ràp-rá é dông hpyit byî akô nghut ri.
13Haû mù, ahkyíng haú pé gi, agè ashop é ahkyíng pé nghut é yánmai,
nhik gying sû gi, haú ahkyíng pé má zim za nyi ri.
14Núngmòq chyungxe wó duî kó sháng gàq,
ge é hkyô lé hô mù, agè ashop hkyô lé koi pyám keq.
Haû jáng, núngmòq taî é eq rajung za,
Wum-o a-tsam dìk shoq bò Sû Yhûmsîng Garai Gasang gi,
núngmòq eq rahá nghut nyî râ nghut lhê.
15Agè ashop hkyô lé a nguì kut pyám mù, ge é hkyô lé chyitdàp luî,
wà hkum yàm má târâ ràp-rá é dông hpyit byi keq.
Haû jáng, Wum-o a-tsam dìk shoq bò Sû Yhûmsîng Garai Gasang gi,
nyi myìt tô é Yosep é byu pé lé shogyo nhikmyîn yù âbe.
16Haû mù, Wum-o a-tsam dìk shoq bò Sû Yhûmsîng Garai Gasang nghut é, haû Yhûmsîng shî su ga taî ri;
“Wà hkyô bànshoq má ngaùhkyûng ngaùyang dùt mù,
byù zîng é jowò hkangmó má dìk shoq no hpu zô é ngaù htê htoq râ nghut lhê.
Ngau garu râ matú, yò mú zui zo bang lé ji yù mù,
ngaùhkyûng ngaùyang kut râ matú,
yón ngaùhkyang dàt sâng bang lé wùt yù kôrâ nghut lhê.
17Ngò gi, núngmòq é agùng mai sô lai râ nghut é yánmai,
tsibyiq hkyâm bànshoq má ngaùhkyûng ngaùyang dùt râ nghut lhê.” gâ ri;
haû gi, Yhûmsîng Garai taî ri.
Yhûmsîng Garaî É Buìnyì
18Haû Yhûmsîng Garaî é buìnyì lé myìt tuî nyi é bang gi,
dingnyé wó ri!
Núngmòq gi, haî mù Yhûmsîng Garaî é buìnyì lé myìt tuî nyi akô lhú?
Buìnyì haû gi, maubó jòq râ a nghut, mauchut byùq râ shèq ru nghut lhê.
19Byù gi, hkanghkyî chyáng mai hpâng luî,
wàm eq htûng huî é su le,
yhûmsing yhúmhkaû má wàng mù,
xêwâm má nghe zung é hkûn,
lhângmui èq htê é su le, dùt râ nghut lhê.
20Haû Yhûmsîng Garaî é buìnyì gi, mauchut byùq mù,
maubó a jòq râ nghut lhê, a nghut lhí?
Gè gè yhang, tîng tîng nòq byùq mù, dùq bang é jòq râ a nghut.
21“Ngò gi, núngmòq é poî pé lé a nguì, chaq ri;
núngmòq zùp hpông é lé Ngò a ô nau é nghut lhê.
22Núngmòq gi, Ngá chyáng myi nyhé hkungga pé eq gùqzò hkungga pé yu lé byi kôlhang,
Ngò gi, haú pé lé lhom hàp yù râ a nghut.
Núngmòq gi, je réng é zùmhkaû hkungga pé yu lé byi kôlhang,
Ngò gi, haú pé lé haî su a ngàm râ nghut lhê.
23Núngmòq é garu garín gâ é mahkôn htê lé lhoqzîm pyám keq!
Núngmòq é tíng pê é myìng htê lé Ngò gyo râ a nghut.
24Nghut kôlhang, târâ ràp-rá hkyô gi, wuì mó lâng su,
díngmán hkyô gi, rû yui nyi é wuì zo làng su, yui nyì sháng gàq!
25Isira-elaq byu pé ê, núngmòq gi,
yòso má myi xê zàn yhang, shigu hkungga pé eq
gùqzò hkungga pé, Ngo lé nhông byi kô é nghut akô lhú?
26Núngmòq gi, yhûmsing é matú saî tô é,
núngmòq é hkóhkâm azòng lé le,
núngmòq é hparà hpôlhô zòng nghut é kyî lhô lé le,
tsung é zè mai wàq wún akô nghut ri.
27Haû mù, Ngò gi, núngmòq lé, Damasikuq wà lháng lai shoq shúm zûng nhâng râ nghut lhê.” ga,
haû Wum-o a-tsam dìk shoq bò Sû Garai Gasang ga myìng wó é Sû, Yhûmsîng Garai taî ri.
Currently Selected:
Amo 5: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
