Lagyo 3

Hkyî Hten Sû Rayùq Lé, Petiruq Lhoqgê Byî É Hkyô

1Ahkuî, Petiruq eq Yohan gi, myínhtâng zó sum hkyíng lhê é kyûdung nám má, noqkuq yhûm shut dòq e ló akô. 2Haú hkûn, înû ûnghkaû mai hkyî hten lùgù dùt é byù rayùq lé, noqkuq yhûm má wang lé lô bâng chyáng mai dung zo sháng gàq ga, Yúnglhó hkum ga myhîng é hkúmdong má nyí hkang nyí mó wàq lé lô mù, lé nyhi to to kut akô. 3Yhang gi, Petiruq eq Yohan, noqkuq yhûm haú má wang e ló é lé, myàng luî, lhom dûng nyi ri. 4Petiruq eq Yohan kúm gi, yhang lé chôm wú tsuq to mù, “Ngá-nhik lé tu wú aq.” gâ akô. 5Haû mù, yhang, yhángnhik chyáng mai rajung jung wó yû râ lé myìt myòqbyù luî, yhángnhik lé rago za saî wú tô ri.

6Petiruq kúm gi, “Ngùn, hîng gi, ngò a wó; nghut kôlhang, ngò wó é nang lé byi lé: Nazaret wà byù Yesuq Hkrisidùq é myìng mai toq sô ló aq.” ga taí uchyang, 7yhâng é lòqyo lòq má zui mù lâng toq kat ri; haú hkûn jáng, yhâng é hkyî kôchangchap pé wúm bo lò bê nghut ri. 8Haû mù, yhang gi, radá dâm toq yàp mù sô kat luî, so uchyang, byàm uchyang Garai Gasang lé hkya-on mù, yhángnhik eq rahá noqkuq yhûm má wang ló ri. 9Yhang sô e ló nyi é eq Garai Gasang lé hkya-on kúngton nyi é lé, lhúnglhâng bang chôm myang akô. 10Haú yùq gi, noqkuq yhum é Yúnglhó hkum gâ é hkúmdong má zung to mù, dung zo sû nghut é lé yhángmòq xûm to kô é nghut mù luî, yhâng chyáng dùt lò bê hkyo é yánmai, maú hong byùq bum akô nghut ri.

Petiruq Hko Kyô É Mungdang

11Petiruq eq Yohan chyáng haû dung zo sû byìn châng tô é hkûn, shiwa byu pé gi, wú maú uchyang, Sholumon jiròp shut, yhángmòq chyáng din yán wang lé lo bum akô. 12Petiruq haû lé myàng jáng, shiwa byu pé lé taî é gi, “Isira-elaq byu pé ê, shí yùq é hkyô lé haî mù luî maú nyi akô lhú? Ngá-nhik é díngmán hkyô eq wum-o a-tsâm èq, shí yùq lé wó so nhang é su ngàm luî, ngá-nhik lé wú tsuq bum akô lhú? Haú dông a nghut. 13Abraham, Isak eq Yakup pê é Garai Gasang, ngá-nhûng é îchyí îwa pê é Garai Gasang gi, Yhâng é duìnhâng zoshâng Yesuq lé hpungwup shingkang lhoqhtoq byî é nghut ri; núngmòq kúm gi, Yhang lé sat hui shoq ga àp pyám kômù luî, Pilat zau hpó mai Yhang lé nhang pyám râ ga myìt to bê lé, núngmòq gi, Yhâng é hí má yhang, Yhang lé he-ngìk pyâm akô nghut ri. 14Haû chyoiyúng díngmán é Sû lé núngmòq he-ngìk pyám kômù, byù sat sû lé shèq dûng htoq yû kôluî, 15Chyungxe Yhûmsîng lé gi, sat pyám bekô. Garai Gasang kúm gi, haú yùq lé shi é mai lhoqdui toq yû bê nghut ri; ngá-nhik gi, haú hkyo é sàksé nghut nyi lhê. 16Yesuq é myìng lé lùmjíng é yánmai, haû lùmjíng myìt mai za, shî núngmòq myang é sê é sû lé wum-o lhoqpyíng byi bê nghut ri; nghut bê, Yesuq lé lùmjíng é yánmai, shí yùq lé, núngmòq bànshoq bâng é hí má, gúmjùp shoq lhoqge to byi bê nghut ri.

17Ahkuî, gu-mang wuì ê, núngmòq é ùphkâng bang kut é su, núngmòq le haú hkyô lé a sé mù kut pyâm é hkyô lé ngò sê nyi lhê. 18Nghut kôlhang, haú hkyô gi, Garaî é Hkrisidùq shî‑nò jamjau hui râ nghut lhê ga luî, myìqhtoi bànshoq bang lé hí hí mai taí nhang tô é Garai Gasang yhang, lhoqdìk é nghut ri. 19Hau é yánmai, haû Yhûmsing chyáng mâ é nguì ngón é ahkyíng yàm yòq jé lô râ matú le, 20núngmòq é matú hkyin tô é Hkrisidùq nghut é Yesuq lé, Yhang nhang kat byi râ matú le, núngmòq é yubàk mara hkyut pyám byî é hui râ matú le, núngmòq gi, myìt lhîng mù Garai Gasâng chyáng lhing lò keq. 21Garai Gasang gi, a‑nham pyàt mai, Yhâng é chyoiyúng myìqhtoî pê é nhut mai, taí nhang to bê eq rajung za, nyì mî-nyî, jòq mîjòq lé asik dum saî é pyàt jé shoq, Yesuq lé mauhkûng htoq má nyì nhang to râ nghut lhê. 22Hkâsu mù gâ le, Mosheq taî tô é le, ‘Haû Yhûmsîng náng é Garai Gasang gi, núngmòq é yhang gu yhang mâng pê chyáng mai, núngmòq é matú ngò sû é myìqhtoi rayùq nyi htoq lô nhâng râ nghut lhê; haú yùq taí mîtaí núngmòq gyo ra râ nghut lhê. 23Myìqhtoi hau é dang pé lé a gyo sû ó yùq nghut kôlhang, yhûmsing é byù myû mai chyung hpyit pyâm é hui râ nghut lhê.’#Târâ Pun 18:15, 18-19 gâ ri.

24Gè gè yhang, Samu-elaq mai, yhâng é htâng má châng nyi htoq lo é myìqhtoî pé bànshoq bang hko kyô lo é má le, buìnyì shí pé eq séng mù taî to bekô nghut ri. 25Núngmòq gi, haû myìqhtoî pê é dang silî wunlî eq, Garai Gasang mai, Abraham lé, ‘Náng é awùt ashîn é yánmai, mingkan htoq mâ é byù myû chângjup hkungsô wó kôrâ nghut lhê!’#A-pûn 22:18, 26:4 gâ é eq rajung za, núngmòq é îchyí îwâ pé eq danghtum htûm tô é lé wó hkam yù râ bang nghut akô. 26Garai Gasang gi, núngmòq yùq hkangmó lé yhûmsîng agè ashop é hkyô mai wó lhing taû lò nhang é dông, shimân byi râ matú, Yhâng é duìnhâng zoshâng lé nyi htoq lô nhâng luî, núngmòq chyáng hí nhang kat byi bê nghut ri.” gâ ri.

Currently Selected:

Lagyo 3: znot

Highlight

Copy