Lagyo 2
2
Chyoiyúng Sô Jé Gyó Lo É Hkyô
1Penteko-ti#2:1 Penteko-ti gâ é gi, Lhoqlhai Poî laî é htâng ngo xê nyí jé é buìnyì má, kut é poî lé gâ lhê. buìnyì jé jáng, lùmjíng bang bànshoq gi, jowò ralhum má za, chôm zùp míng nyi tô akô. 2Haú hkûn, laìdun mó lo é su gâ é htê gi, byò dàn ratung, mauhkûng mai mying htoq lô mù luî, yhángmòq zîng tô é yhûm byíng shoq dùt to bê nghut ri. 3Myishâm su dùt é le byò myín htoq lô mù, yhángmòq yùq jùp é ahtoq má jé tô bùm bê nghut ri. 4Yhángmòq lhúnglhâng bang gi, Chyoiyúng Sô byíng lo bùm kômù, So èq taí nhang é eq rajung za, làklaí dang dông nyo lo bum akô.
5Haú u lé, mauhkûng ô má jòq é mîngdán hkangmó mâ é, târâ hkúnggâ é Yudaq byu pé gi, Yerusalem wà mó má bíng nyi bum akô. 6Haû mying é htê lé wó gyo kôjáng, byù rajùm rayò zîng lé lô kômù, ó le ô é myíng dông sê gyô yù kô é yánmai, maú uq-ô byùq bùm kôluî, 7maú bûm uchyang taí kô é gi, “Wú keq, ahkuî dang taî nyi é byù shí bang lhúnglháng gi, Galile byu pé chyat a nghut kó lhú? 8Haû nghut é wá, hkâsu mù ngá-nhúng ó le ô é yhûmsing mau mâ é myíng dông sê gyô yu lhê lhú? 9Parihti, Medi, Elam mau mâ é bang eq Mesopotami-aq mau, Yuda eq Kapadoki-a mau, Pontuq eq Asi-a, 10Hprugi eq Pamhpuli, Egutuq ming má nyi é bang eq Kuruni wà mó nâm má nyi é Libya ming mâ é bang, Romaq wà mó mai lé bíng nyi é Yudaq byu pé eq Yudaq noqkuq htûng má lhing wang lò bang, 11Kireti zinlóng eq Arabi mau mâ é bang, ngá-nhúng gi, yhángmòq hko kyô é Garai Gasâng é maúhpo múzó hkyô lé, yhûmsing mau mâ é myíng dông yhang wó sê gyô yu rî-nhung.” gâ ri. 12Yhángmòq bànshoq bang gi, maú uq-ô byùq kômù, “Shî gi, haî wá nghut lhê lhú?” ga le, rayùq eq rayùq myî lhûm bum akô.
13Nghut kôlhang, byù ra-am gi, “Shí bang gi, î shuq wùt é bang nghut akô.” ga luî, taî jihpoî bum akô nghut ri.
Petiruq Hko Kyô É Mungdang
14Haú hkûn, Petiruq gi, lagyo góbang raxe rayùq eq toq yàp mù, htê mó èq byù haú bang lé taî é gi, “Yudaq byu pé eq Yerusalem wà mó má nyi nyi é lhúnglhâng bang ê, rago gyô wú keq! Ngò, núngmòq lé, shí hkyô taî kyo kôlé. 15Shí bang gi, núngmòq sû‑ngam é dông, shuq wùt é bang a nghut; hkâsu mù gâ le, ahkuî gi, nàpkyó gau hkyíng za ru nghut ashî. 16Shí hkyô kúm gi, myìqhtoi Yo-ela taî tô é eq rajung za dùt é nghut ri. 17Yhang taî tô é gi,
‘Garai Gasang îsu gâ ri: Ló htâng é buìnyì pé má, Ngò Ngá é Sô lé byù lhúnglhâng bâng é ahtoq má hut gyun râ nghut lhê.
Haû mù, núngmòq é yùqzo byìzô pé gi, myìqhtoi htoi kôrâ; núngmòq é zorâm wuì gi, myòqwùp shing-rán pé myàng kôrâ; núngmòq é hpaû mâng pé gi, yhupmòq myàng kôrâ nghut lhê.
18Buìnyì haú pé má, Ngá é duìnhâng zoshâng hpô pé eq duìnhâng zoshâng myhî pê é ahtoq má lháng, Ngò Ngá é Sô lé hut gyun mù luî, yhángmòq gi, myìqhtoi htoi kôrâ nghut lhê.
19Ngò gi, ahtoq mauhkûng htoq má maúhpo múzó pé lé, a‑ô myigùng htoq má, alhô agàn pé lé, sui eq, myi eq, myihkau dùm pê èq kut mù tûn shit râ.
20Haû Yhûmsing é kô hkìkhkam é buìnyì a jé shi-má, buì gi, mauchut byùq, lha-mó gi, sui dùt byùq é hí dùt râ nghut lhê.
21Haú hkûn, Yhûmsing é myìng lé lâng é bang yùq hkangmó gi, hkyi yu é hui kôrâ nghut lhê.’#Yol 2:28-32
gâ ri.
22Isira-elaq byu pé ê, dang shî lé gyô yù keq, núngmòq sê é eq rajung za, Nazaret wà byù Yesuq núngmòq é hí má tûn shit é, làklaí alhô agàn, maúhpo múzó eq alhô agàn pé gi, Yhang lé Garai Gasang nhang kat é sàksé dùt bê nghut ri. 23Shí yùq gi, Garai Gasang myìt hpyit tô é hkyô eq, hí te sê é hpàqchyî dông, núngmòq chyáng àp pyâm é hui mù, núngmòq gi, agè ashop byu pê é lòq èq, Yhang lé tapzîng má jén sat pyám nhâng bekô nghut ri. 24Nghut kôlhang, haû shî‑nò hkyô gi, Yhang lé wó hkûm zing jung a nghut é yánmai, Garai Gasang gi, Yhang lé shî‑nò jamjau mó mai, lhut pyám byi luî lhoqdui toq yû bê nghut ri. 25Dawiq gi, shí yùq eq séng luî taî é má,
‘Haû Yhûmsîng gi, ngá é myòq hí má hkâ-nhám le nyi nyi é lé ngò myàng bê.
Yhang ngá é lòqyo hkyam má nyi nyi é yánmai, ngo lé wó lhoqnhún râ a nghut lo.
26Haû mù, ngá é i‑myìt nhiklhum gi, gabú nyî luî, ngá nhut shô gabú hkya-ôn nyi ri;
ngá é gùngdu le, myìt myòqbyù jowò má ngón za wó nô yù râ nghut lhê.
27hkâsu mù gâ le, Nàng gi, ngá é sô lé, mosumhkung má tô pyâm to râ a nghut é htoq agó, Náng é Chyoiyúng Sû lé bùp byùq nhâng râ a nghut.
28Nàng, ngo lé chyungxe dui é hkyô sé nhâng bê.
Náng é myòq hí má, nàng, ngo lé gabú hkyô lhoqpyíng byi râ nghut lhê.’#Hkya-on 16:8-11
gâ ri.
29Gu-mang wuì ê, ngá-nhûng é îchyí îké Dawiq kâng byìt mù, myhup pyám hui bê hkyô lé le, yhâng é lùp gi, hkû-nyí jé shoq ngá-nhûng chyáng jòq tô é lé le, ngò, núngmòq lé a gyùq a kyûm wám taî lhê. 30Dawiq gi, myìqhtoi rayùq nghut é yánmai, yhâng é awùt ashín mâ é rayùq lé, yhâng é hkóhkâm tánghkuq má zùng nhâng râ ga Garai Gasang danghtum htûm tô é lé sê to mù, 31‘Hkrisidùq #2:31 Grik dông, Hkrisidùq gâ é gi, xû bùt hui Sû gâ é lichyúm nghut mù, Hebre dông, Mesai‑a gâ é eq rajung za nghut lhê. gi, mosumhkung má pyâm to a hui râ eq, Yhâng é gùngsho a bùp byùq é za, dum dui toq ló râ nghut lhê.’ gâ é hkyô lé te sê to luî taî tô ri. 32Garai Gasang gi, haû Yesuq lé lhoqdui toq yù bê. Ngá-mòq bànshoq bang gi, haú hkyo é sàksê pé nghut nyi ri. 33Haû mù, Garai Gasang gi, Yesuq lé Yhâng é lòqyo hkyam má lhoqtoq to bê. Yesuq gi, Garai Gasang danghtum htûm tô é Chyoiyúng Sô lé hkam yù mù, hut hkyô kat bê nghut é yánmai, ahkuî núngmòq shî su wó myâng, wó gyo bekô nghut ri. 34-35Hkâsu mù gâ le, Dawiq gi, mauhkûng htoq tsáng myhâng má a dòq ló wú kôlhang, yhang gi,
‘Haû Yhûmsîng Garai gi, ngá é Yhûmsîng lé,
“Ngò, náng é gye pé lé, náng é hkyî nang tánghkuq kut pyám byî é hkyíng jé shoq,
Ngá é lòqyo hkyam shut zung nyì shi aq.” gâ ri.’#Hkya-on 110:1
ga luî, taî ri.
36Hau é yánmai, Garai Gasang gi, núngmòq èq tapzîng má jén sat pyâm é haû Yesuq lé, Yhûmsîng eq Hkrisidùq dùt nhang é hkyô, Isira-elaq byu pé lhúnglhâng bang hkyak sê nyì kó sháng gàq ô.” gâ ri.
Sânghi Lùmjíng É Bang
37Yhángmòq gi, haú lé wó gyô bùm kôjáng, yhángmòq é i‑myìt má záng kô é nghut mù luî, “Gu-mang wuì ê, ngá-mòq hkâsu kut lo râ lhú?” ga luî, Petiruq eq lagyo góbang lé myî akô.
38Petiruq gi, “Núngmòq yùq hkangmó myìt lhîng mù, Yesuq Hkrisidùq é myìng mai wuìmyhup hkâm yù keq; Haû jáng, núngmòq é yubàk hkyut pyám byî é hui kôrâ nghut lhê. Haú hkûn, Chyoiyúng Sô gâ é chyûnghuq lé, núngmòq wó yû kôrâ nghut lhê. 39Hkâsu mù gâ le, danghtum htûm tô é haû gi, ngá-nhûng é Yhûmsîng Garai Gasang ji yù râ bang bànshoq nghut é, núngmòq eq núngmòq é yhang zo yhang shû pé eq le, mau we má nyi é lhúnglhâng bang eq le, sêng lhê.” ga luî, yhángmòq lé taî kyô ri.
40Yhang gi, dang gótû myo myô èq le sàksé hkám mù, “Shî agè ashop é a-myû mai wó lùt htoq lô keq ô!” ga luî, yhángmòq lé lhoqpun lhoqkyîng ri. 41Dang haú lé gùq yu é bang gi, wuìmyhup hkâm yu bùm kôluî, haú nyí má byù sum hkyîng kô jàt wàng lo bùm bekô nghut ri.
Lùmjíng Bang Zùm Yàp É Hkyô
42Haú bang gi, lagyô pé mhoqshit é hkyô, zùm yàp é hkyô, mùk hpê gam é hkyô#2:42 Mùk hpê gam hkyô gâ é lé lichyúm í dông wó yu lhê - radông gi, rahá chôm zo chôm shuq é lé gâ lhê; radông gi, Poído chôm zô é lé gâ lhê. eq a-kyû dûng é hkyô má, i‑myìt rahkat za chôm châng nyi akô. 43Lagyô pé kut shit é maúhpo múzó eq maúhpo alhô agàn pé myo myô é yánmai, lhúnglhâng bang gi, gyùq maú nyi bum akô nghut ri. 44Lùmjíng é lhúnglhâng bang gi, rawò má za zùp zîng to mù, azíng zê bànshoq lé chôm chung nyi akô. 45Yhángmòq gi, yhûmsing é sùtzè pé lé, ûng pyám mù, yùq hkangmó lé, yhang râ tô é eq rajung za gàm byî akô. 46Yhángmòq gi, nyí wuî myìt rahkat zâ èq noqkuq yhûm wàng má nyi nyi akô. Yhûmsing é yhûm pé má le mùk hpê gam é hkûn, 47Garai Gasang lé hkya-on kúngtôn uchyang, gabú é eq myìt huî é èq chôm zo chôm shuq nyi bum akô; byù bànshoq bâng é hí má le myòqdong wó bum akô. Haû Yhûmsîng gi, nyí wuî yhángmòq chyáng hkyi yù hui bang jàt lò nhang ri.
Currently Selected:
Lagyo 2: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.