Lagyo 22

1“Gu-mang wuì eq îwâ pé ê, ahkuî, ngò mara a bò nghû taî é dang lé gyô wú shi keq.” gâ ri.

2Yhángmòq gi, yhang Hebre myíng dông taî é dang lé wó gyô bùm kôjáng, gyai yhang zîm byùq bekô. Haû mù, Poluq xoq taî é gi, 3“Ngò gi, Yudaq byù rayùq nghut lhê. Kiliki mau Tashu wà mó má choq hpyit kôlhang, wà mó shî má nyi kô lò sû nghut lhê. Ngò gi, ngá-nhûng îchyí îwa pê é jep é târâ lé, Gamalela é lòq má jíhkúm nùqgùq mhoq yû luî, hkû-nyí lhê é núngmòq lhúnglhâng bang su, Garai Gasang lé gyai myìt zìng zùq é sû nghut lhê. 4Ngò gi, shí Hkyô cháng bang lé shi é jé shoq, zing-rî wú é sû eq, myiwe yùqgè ó yùq lé nghut kôlhang, chyup yû mù htóng má lhûng pyâm wú bê sû nghut lhê. 5Hkyangjong mó eq byìn tú wàp sûwún wuî lhúnglhâng bang gi, ngá é sàksê pé nghut akô. Ngò gi, Damasikuq wà mó má nyi é yhángmòq é Yudaq gu-mang wuì lé byi râ laiká yhángmòq chyáng mai wó yu chûng luî, haú mâ é bang lé le Yerusalem wà mó má dam byi râ matú, chyup tuî ló râ nghû, Damasikuq wà mó shut e é nghut lhê.

6Nyígûng tû zó lé, ngò Damasikuq wà mó shut sô chyâng ló nyi é hkûn, maubó gi, ngá é lhînghkyùq má mauhkûng mai byò dàn tung dùq bó to bê nghut ri. 7Haû mù, ngò myigùng má lêng gòp tô le, wó gyô kat é danghtê gi, ‘Sholuq, Sholuq, nàng ngo lé haî mù zing-rî nyi lhê lhú?’ gâ ri.

8Ngò le, ‘Yhûmsîng ê, nàng ó nghut lhê lhú?’ nghû myî kat jáng, ‘Ngò gi, nàng zing-rî wún é sû, Nazaret wà byù Yesuq nghut lhê.’ ga luî, Yhang tû taî kat ri. 9Ngò eq rahá e ló é bang kúm gi, maubó lé myàng kôlhang, ngo lé taî é danghtê lé a sê gyo kó nghut ri.

10Dum, ngò gi, ‘Yhûmsîng ê, ngò haî kut ra râ lhú?’ nghû myi jáng, haû Yhûmsîng gi, ‘Toq mù, Damasikuq wà mó má wang ló aq, nàng kut râ matú wò byî tô é hkyô pé lhúnglháng, nang lé haú má lhom taî kyo berâ nghut lhê.’ ga ngo lé dum taî ri. 11Haû maubó é shingkâng é yánmai, ngò myòqjìt byùq mù, ngá é byìnzùm wuì gi, Damasikuq wà mó shut ngo lé lòq mai she wang ló akô.

12Haú hkûn, Anani gâ é yùqgè rayùq ngá chyáng lé huî ri. Yhang gi, jep é târâ lé gyùq hkúnggâ é eq, haú má nyi é Yudaq byù lhúnglhâng bâng é hí má myòqdong gyai wó é sû nghut ri. 13Yhang gi, ngá nâm má yàp to luî, ‘Gu-mang Sholuq ê, náng myòq myàng àq hkoi!’ ga taî ri. Haú hkûn jáng yhang, yhang lé ngò wó myang kat bê nghut lhê.

14Yhang dum xoq taî é gi, ‘Ngá-nhûng îchyí îwa pê é Garai Gasang gi, nang lé, Yhang ô nau é hkyô sé sháng gàq ga luî le; Díngmán Sû lé wó myâng luî, Yhâng é nhut mâ é mungdang lé wó gyo sháng gàq ga luî le, hkyin to bê nghut ri. 15Haû mù, nàng gi, nàng myang é eq wó gyô yu é hkyô pé lé, byù lhúnglhâng bâng é hí má, Yhâng é matú sàksé hkám byi râ sû dùt râ nghut lhê. 16Ahkuî, nàng haî lé láng nyi ashî lhú? Toq àq, Yhâng é myìng lé lang luî wuìmyhup hkâm yu é eq, náng é yubàk mara pé lé chî sân pyám aq.’ gâ ri.

17Hau htâng, ngò gi, Yerusalem wà mó má dum taû jé ló mù, noqkuq yhûm má kyû ê dûng nyi le, mòq byùq ló mù, 18‘Nàng, ngá é hkyô lé sàksé hkám râ dang lé, yhángmòq a lhom hàp yù kôrâ nghut é yánmai, Yerusalem wà mó mai hân htoq ló aq.’ ga Yhûmsîng ngo lé taî nyi é lé, myòqwùp shing-rán dông myang ri.

19Haû mù, ngò gi, ‘Yhûmsîng ê, târâjong ralhûm htâng ralhum má nang lé lùmjíng bang lé, htóng má chyup lhûng pyâm é eq, hkat bàt lhing wún é hkyô lé, yhángmòq sê bum akô. 20Náng é sàksé Sitehpan sat hui luî suí shun u lé, ngò nàm má yhang yàp to mù, haú hkyô lé myìt bo hui luî, yhang lé sat pyám bâng é mèbu lé zúng byî é nghut lhê.’ nghû tû taí bê.

21Haú hkûn, Yhûmsîng gi, ‘Ê àq, ngò, nang lé, wê gâng é tûngbaù pê chyáng nhang kat râ.’ ga, ngo lé taî ri.” gâ ri.

Poluq, Romaq Mîngdán Byû Nghut É Hkyô

22Shiwa byu pé gi, dang haú hkun jé za gyô yù kômù, “Shî sû é byù gi, myigùng htoq má nyì a gíng, sat pyám keq.” ga, htê mó èq garû bum akô.

23Yhángmòq gi, haû su garu uchyang, yhûmsing buhîng lé hkyut dú pyâm lhê, hpuílhup lé mauhkûng shut kyaq tâng lhê, kut nyî kôjáng, 24dàp ùp zau hpó gi, Poluq lé gyèwap má shuî hâng yù nhâng mù, yhang lé shiwa byu pé haî mù shî su ga garû bùm kô é hkyô lé wó sé shoq ga, nhuq bàt nhâng luî, myî choq nhang ri. 25Nhuq bàt râ matú sho-kuq tuî eq tui kôjáng, Poluq gi, nàm má yàp tô é shô ùp gyèzau lé, “Romaq mîngdán byû ru nghut sû lé nhîng, lháng a jéyáng shi-má, núngmòq nhuq bàt le gi, târâ wang akô lhú?” ga taî ri.

26Rashô ùp gyèzau gi, dang haû lé wó gyo jáng, dàp ùp zaû chyáng ló mù, “Nàng haî kut râ haq htung nyi lhê lhú? Shí yùq gi, Romaq mîngdán byû shèq ru nghut ri.” ga luî, yhang lé ló taî kyô ri.

27Haû mù, dàp ùp zau gi, Poluq chyáng ê mù, “Nàng gi, Romaq mîngdán byû nghut lhê lhú? Taî kyô wú làq.” ga myî ri.

Poluq gi, “Ngò, Romaq mîngdán byû nghut lhê.” ga tû taî ri.

28Haú hkûn, dàp ùp zau hpó gi, “Ngò lháng ahpau myo myo byî pyám luî shèq, Romaq mîngdán byû ru wó dùt é nghut lhê.” ga tû taí jáng, Poluq gi, “Ngò kúm gi, Romaq mîngdán byû dùt gû hku lé lo é sû nghut lhê.” ga taî ri.

29Yhang lé myî choq wú râ gâ é bang gi, haú hkûn jáng, yhâng chyáng mai huî zùt ló bûm bekô. Gyèdap ùp zau hpó le, Poluq gi, Romaq mîngdán byû nghut é lé sé jáng, yhang lé tuî pyám bê nghut é yánmai, gyùq byùq bê nghut ri.

Yudaq Byìn Tú Wàpdòq Sûwún Wuî Gam Hkoq Byùq É Hkyô

30Htang nyí, dàp ùp zau hpó gi, Yudaq byu pé mai Poluq lé hun é mara haî nghut é hkyô lé hkyak wó sé shoq ga, Poluq lé tuí hpyi pyám byi mù, hkyangjong agyi pé eq Yudaq byìn tú wàpdòq sûwún wuî lhúnglháng lé ji tsîng to luî, yhángmòq é gung gûng má Poluq lé shuî wàng mù, shap to bê nghut ri.

Currently Selected:

Lagyo 22: znot

Highlight

Copy