Lagyo 1

Yesuq, Mauhkûng Má Shuî Yù Huî É Hkyô

1Htohpiluq ê, Yesuq yhang hkyin yu tô é lagyô pé lé, Chyoiyúng Sô wum-ô èq dang ban pying tô é htâng má, Garai Gasang yhang lé mauhkûng shut shuî yu é buìnyì jé shoq, 2Yhang kut shit é hkyô pé eq, mhoqshit é hkyô pé bànshoq lé, hí lhê é laiká bùk má ngò kâ kat bê nghut lhê. 3Yesuq gi, shî hkâm é htâng má, Yhang dui toq bê hkyô lé, lùm gíng é sàksé myo myô èq yhángmòq lé tûn shit mù, buìnyì myi xê nyí gyoro má yhángmòq chyáng lé htoq shit shit kut luî, Garai Gasâng é mîngdán hkyô lé hko kyô ri. 4Yhang, yhángmòq eq rahá zùp tô é hkûn, hkunmó hkyô é gi, “Núngmòq gi, Yerusalem wà mó mai a htoq é za, ngá chyáng mai wó gyô yu é, Ngá wa danghtum htûm tô é chyûnghuq lé láng nyî keq. 5Hkâsu mù gâ le, Yohan gi, wui èq wuìmyhup hkám byî é nghut lhê; nghut kôlhang, núngmòq kúm gi, buìnyì hkâ-myháng a myáng má, Chyoiyúng Sô mai wuìmyhup wó hkam#1:5 Wuìmyhup wó hkam gâ é lé gi, baptisima hkam yu é lé gâ lhê. yù kôrâ nghut lhê.” gâ ri.

6Lagyô pé gi, Yhang eq rahá chôm zùp míng tô é hkûn, Yhang lé, “Yhûmsîng ê, nàng, haû Isira-elaq byu pé lé mîngdán dum xuq byi râ gi, ahkuî yhang nghut bê lhú?” ga myî akô.

7Yesuq gi, “Âwa gi, Yhâng é ahkáng ayá èq kut to bê é ahkyíng yàm-yòq pé lé, núngmòq sé nó a ra. 8Nghut kôlhang, Chyoiyúng Sô núngmòq chyáng jé jáng, núngmòq gi, wum-o a-tsam wó yû mù luî, Yerusalem wà mó eq Yuda mau bànshoq, Samariq mau eq maumyî htáng shoq, ngá é sàksê pé dùt kôrâ nghut lhê.” ga luî, yhángmòq lé taî ri.

9Dang haû ban taî é htâng má, yhángmòq wú nyi le, Yhang gi, mauhkûng shut shuî yu é hui mù, yhángmòq hí mai Yhang lé a myàng loshoq, mhut èq htup ló byùq bê nghut ri.

10Yesuq dòq ló nyi é u lé, yhángmòq mauhkûng shut ru wú tsuq nyi bum ashî le, hpyu é mèbu wùt é byù í yùq gi, radá dâm yhángmòq nàm má htoq yàp lò mù, 11“Galile byu pé ê, haî mù luî mauhkûng shut wú tsuq nyi akô lhú? Núngmòq é hí mai mauhkûng shut shuî yù huî é, haû Yesuq mauhkûng shut dòq ló é u lé, núngmòq myang kat é su, Yhang dum jé lé râ nghut lhê.” ga taî akô.

Yudaq É Jowò Má, Mahti‑aq Lé Hkyin Kat É Hkyô

12Hau htâng má, yhángmòq gi, Tsanlun bùm mai, Yerusalem wà mó shut taû ló bekô.#1:12 Tsanlun bùm eq Yerusalem wá mó gyoro gi, déng rawuí gû kô wê ri. Haú gyoro gi, Bánno Buìnyì má ge sô é í za wê ri. 13Yhángmòq jé ló kôjáng, yhángmòq nyi nyì kô é yhûm ahtoq pyâm mâ é wàp shut dòq ló akô; haú bang gi, Petiruq, Yohan, Yakuq, Andire, Hpilip eq Htomaq, Barihtolume eq Mahte, Alahpe é yhang zo Yakuq, Zelutuq dùt é Simun, góyùq Yakuq é yhang zo Yudaq pé nghut akô. 14Yhángmòq lhúnglhâng bang gi, myiwe wuì le, Yesuq é yhâng nu Mariq le, yhang gû pé le kut mù, i‑myìt rahkat za kyû chôm dung dung kut nyi akô.

15Buìnyì haú yòq má, Petiruq gi, lùmjíng é gu-mang gu-nhá#1:15 Gu-mang gu-nhá gâ é lé, Grik má gi, gu-mang za gâ tô lhê. wuì rasho í xê yùq kô zùp zîng tô é gung gûng má, toq yàp mù, 16“Gu-mang gu-nhá wuì ê, Yesuq lé chyup é bang lé hkyô shuî hî é sû Yudaq eq séng luî, hí hpyang Dawiq é nhut mai Chyoiyúng Sô taî tô é Chyúmdang gi, dìk byùq bê nghut ri. 17Yhang gi, ngá-nhúng má nghap lhôm é hui mù, hpúng sará ayá wó bê sû nghut kôlhang shí hkyô dùt bê nghut ri.” ga taî ri.

18(Yudaq gi, yhang kut é agè ashop é múzó mai wó é ahpaû èq myigùng ratóng wui yu é htâng, haú má yhang, a‑nghop dông byìt gyó mù wam bùq gòq luî, û bànshoq bùq myín byùq bê nghut ri. 19Haú hkyô lé Yerusalem wà mó má nyi é lhúnglhâng bang wó gyo kôjáng, myigùng haû lé yhángmòq é myíng dông, “Akeladama” ga myhîng akô; haû gi, “Sui myigùng” gâ é nghut ri.)

20Petiruq xoq taî é gi, “Hkâsu mù gâ le, Hkya-on Kúngtôn Laiká má,

‘Yhâng é jowò chamchyuîyuì dùt byùq sháng gàq; haú má ó le a nyì kó sháng gàq.’#Hkya-on 69:25

ga luî le, dum

‘Yhang wó é ayá lé byù góyùq wó yu pyám byi sháng gàq.’#Hkya-on 109:8

ga luî le, bo tô ri. 21-22Haû mù luî, Yohan wuìmyhup hkám byî hi é hkûn mai, Yesuq lé ngá-nhûng chyáng mai shuî yu é buìnyì jé shoq, Yhûmsîng Yesuq ngá-nhúng eq rahá htoq htoq wàng wàng kut nyi é buìnyì bànshoq pé má, ngá-nhúng eq yhang zum nyì sû rayùq lé, hkyin kat râ dùt ri. Haú yùq gi, Yesuq dum dui toq é hkyô lé ngá-nhúng eq rahá sàksé dùt râ sû nghut lhê.” gâ ri.

23Haú hkûn, yhángmòq gi, Yusitu ga le myhîng é, Barasaba gâ é Yosep eq Mahti‑aq nhik lé hkyin tô akô. 24-25Haû mù, yhángmòq kyûdung kô é gi, “Byù bànshoq é i‑myìt lé sê é Yhûmsîng ê, Yudaq Isikarut gi, yhang ló gíng é jowò shut ló râ ga, tô pyâm tô é yhâng é lagyo ayá é matú shí nhik mâ é nàng hkyin tô é sû lé tûn shit laq ô.” gâ akô. 26Hau htâng, yhángmòq, byù hkyîn shosé she le, Mahti‑aq chyáng ang bê. Haû mai, Mahti‑aq lé gi, haû lagyo raxe rayùq má jàt kat bê nghut ri.

Currently Selected:

Lagyo 1: znot

Highlight

Copy