Lagyo 18

Poluq, Korinhtuq Wà Mó Má Nyi É U Lhê Hkyô

1Hau htâng má, Poluq gi, Ahten wà mó mai htoq luî, Korinhtuq wà mó má jé lo ri. 2Haú má, yhang gi, Romaq wà mó mai Yudaq byù lhúnglhâng bang htoq ló byùq râ dùt lhê ga, hkóhkâm Kilodi èq hkunmó hkyô é yánmai, a myáng shi lé Itali ming mai yhang myi Prisikila eq htoq jé lo é, Pontuq mau byù nghut é, Akula gâ é Yudaq byù rayùq lé hui luî, yhángnhik chyáng e ri. 3Yhángmòq gi, pán zúm hkyup zo bang chyat nghut kô é yánmai, múzó pûng kôluî, Poluq gi, yhángnhik eq rahá nyi nyì mù, múzó chôm saî akô. 4Bánno Buìnyì hkangmó, Poluq gi, târâjong má Yudaq byù eq, Grik pé lé, taî sân kyo luî, lhoqpun lhoqkyîng yu ri.

5Ahkuî, Sila eq Timohti nhik Makedoni mau mai châng jé jáng, Poluq gi, mungdang hkô hkyô má za wum kat luî, haû Yesuq gi, Hkrisidùq yhang nghut lhê ga, Yudaq byu pé lé sàksé hkâm kyô ri. 6Nghut kôlhang, Yudaq byu pé gi, lhom he-ngìk pyám kômù, yhang lé rhoî dang taî pyâm akô; haû mù, Poluq gi, yhâng mèbu ko shit é dông yhángmòq lé a nau é hkyô tûn shit uchyang, “Núngmòq é sui mara gi, núngmòq é ulhum má jé sháng gàq, ngò eq haî a séng lo; ahkuî mai, ngò gi, tûngbaù pê chyáng e ló berâ nghut lhê.” ga luî, yhángmòq lé taî ri.

7Hau htâng, yhang gi, târâjong mai htoq luî, jong haû eq yhep nghut é, Garai Gasang lé noqkuq é Tituq Yusitu gá su é yhûm má wang ló ri. 8Krisipu gâ é târâjong má ùp sû gi, yhâng yhûmbyù lhúnglhâng bang eq rahá, Yhûmsîng lé lùmjíng akô. Korinhtuq wà mó byu pé myo myo le, Poluq é dang lé gyô yù mù, lùmjíng luî, wuìmyhup hkâm yu bum akô nghut ri.

9Ra-myìn lé, shing-rán ralhum má Yhûmsîng mai Poluq lé taî é gi, “Hkâgyùq, taí aq, zim za hkâ-nyî. 10Ngò nàng eq rahá nghut nyi lhê, nàng lé ó yùq èq le haî wó kut râ a nghut, hkâsu mù gâ le, wà mó shî má, ngá é byù myo myo nyi bum lhê.” gâ ri. 11Haû mù luî, Poluq gi, Garai Gasâng é mungdang mhoqshit uchyang, razàn èq lha-mó hkyuq hkyap yhang, haú wà mó má nyi nyi ri.

12Gali‑o ga sû, Ahkai-a mau mâ é ginwáng zau kut nyi é u lé, Yudaq byu pé gi, myìt rahkat zâ èq Poluq lé chôm chyup yû kôluî, târâ hpyit wàp má she háng kômù, 13“Byù shí yùq gi, jep é târâ eq shai lhûm é dông, Garai Gasang lé noqkuq râ matú, byu pé lé mhoq hpyoq wún ri.” ga mara hun akô.

14Haú hkûn, Poluq tû taí râ haq htung lò jáng, Gali‑o gi, Yudaq byu pé lé, “Yudaq byu pé ê, múzó shî gi, târâ lu laî é múzó, haû a nghut jáng, agè ashop é múzó mai, dùt lo é nghut le gi, núngmòq lé ngò gyo byi râ hkyô jòq lhê. 15Nghut kôlhang, múzó shî gi, núngmòq é târâ eq séng luî, dang eq séng luî, myìng eq séng luî, taî lhum kô é hkyô nghut é yánmai, núngmòq yhang ru ló hpyit lhum keq. Haû sû é múzó má, ngò gi, târâ agyì kut byi râ a nghut.” ga taí mù, 16târâ hpyit wàp mai yhángmòq lé hkat htoq pyám nhang ri. 17Haú hkûn, yhángmòq lhúnglhâng bang gi, târâjong má ùp sû Sositeni lé chyup yû mù, târâ hpyit wàp hí má chôm bàt akô. Gali‑o kúm gi, haû hkyô lé hai gùn a kut byi nghut ri.

Poluq, Anti-oku Wà Mó Má Dum Taû Jé É hkyô

18Poluq gi, Korinhtuq wà mó má buìnyì tsómra myáng shoq lùmjíng bang eq nyi nyi ri. Hau htâng, yhang gi, haú bang lé shi-kyâm to luî, Prisikila eq Akula nhik lé byìnzùm kut mù, lhaî ji luî Suriq mau shut e ló akô. Hau hí má, yhang gi, danghtum htûm tô é yánmai, Kenhkre‑a wà má xâm nyhâm pyâm ri.#18:18 Xâm nyhâm pyâm é gi, Yudaq htûng dông rajung jung kut râ matú danghtum htûm to luî, haû lé ban kut jáng, yhûmsing xâm lé nyhâm pyâm é nghut lhê. 19Yhángmòq Ehpesu wà mó má jé kô é hkûn, Poluq gi, Prisikila eq Akula nhik lé nyhi pyâm to luî, yhang baú târâjong má wàng mù, Yudaq byu pé lé taî sân kyo byî ri. 20Haú mâ é bang gi, yhángmòq eq rahá rayòq zo nyì shirâ dông yhang lé dung kô é nghut kôlhang, yhang gi, a nhô lo nghut ri. 21Haû mù, yhang gi, Ehpesu wà mó mai lhaî ji mù htoq ló uchyang, “Garai Gasang ô nau é hkyô nghut le gi, ngò núngmòq chyáng dum jé lé râ nghut lhê.” ga, yhángmòq lé danghtum htûm tô ri. 22Ahkuî, Poluq gi, Kesare wà mó má ló jé dàp jáng, Yerusalem wà mó shut dòq ló mù, noqkuq hpúng lé ló huî tô é htâng, Anti-oku wà mó má dum gyó ló ri.

23Yhang gi, haú wà má rayòq zo nyi é htâng, htoq ló mù, Galatiq mau eq Hprugi mau mai sô laî ló uchyang, rawa htâng rawà mâ é chángzô pé lé wum-o lhoqging byî ri.

Apolo Zui Saî É Múzó

24Ahkuî, Alesandri-a wà mó byù nghut é sû, Apolo gâ é Yudaq byù rayùq gi, Ehpesu wà mó má jé lé ri. Yhang gi, hpàqchyî bò sû nghut é htoq agó, Chyúmdang le gyai kûng é sû nghut ri. 25Yhang gi, Yohan é baptisima hkyô lé za sé sû nghut kôlhang, Yhûmsing é hkyô lé mhoq yû bê nghut luî, Yesuq é hkyô pé lé mhoq yu to bê eq rajung za wum zùq tung ga luî, hkyak hkyak mhoqshit byî ri. 26Ahkuî, yhang gi, gyùq kyûm myìt a bo é za târâjong má taî hi ló ri. Haú hkûn, Prisikila eq Akula nhik gi, haû lé wó gyo kôjáng, yhang lé ji yù mù, Garai Gasâng é mungdang hkyô lé azó tung taî sân kyo byî akô nghut ri.

27Apolo gi, Ahkai-a mau shut dàp e ló nau é hkûn, gu-mang wuì gi, yhang lé wum saî byi mù, yhang lé lhom hkûlum yù râ matú, chángzô pê chyáng laiká ká byî kat akô; yhang gi, jé jáng, Garai Gasâng jeju mai lùmjíng bê bang lé, gyai yhang wó garúm sû dùt bê nghut ri. 28Hkâsu mù gâ le, yhang mai, Yesuq gi, Hkrisidùq yhang nghut nyi ri ga luî Chyúmdang má tûn shit uchyang, byu pê hí má Yudaq byu pé lé, wum kat wó taî ung pyâm é yánmai nghut ri.

Currently Selected:

Lagyo 18: znot

Highlight

Copy