Lagyo 16

Poluq Eq Sila Nhik Chyáng Timohti Châng É Hkyô

1Poluq gi, Deribe wà mó má jé é htâng, Lusitira wà mó má dum jé ri. Haú wà má, Timohti gâ é chángzo rayùq nyi ri. Yhâng nu gi, Yesuq lé lùmjíng é Yudaq myiwe myhí nghut ri; yhâng wa kúm gi, Grik a-myû nghut ri. 2Timohti gi, Lusitira wà mó eq Ikoni wà mó má nyi é gu-mang wui èq hkya-ôn é hui sû nghut ri. 3Poluq gi, hkyôwuì má yhang lé shuî chûng naù mù luî, ahpyo-kuq hpyit byî ri. Hkâsu mù gâ le, yhâng wa gi, Grik nghut é hkyô lé haû mâ é Yudaq byu pé lhúnglhâng bang sé kômù, haú bang lé myìt tê byî é yánmai nghut ri. 4Haû mù, yhángmòq gi, rawa htâng rawà mai laî ló uchyang, Yerusalem wà mó mâ é lagyô pé eq hpúng sûwún wuî, chôm myìt hpyit tô é hkyô lé, cháng kó sháng gàq ga, yhángmòq lé taî kyô akô. 5Haû mù luî, hpúng byû wuì gi, lùmjíng hkyô má wum-o bo lò kômù, ra-nyí èq ra-nyí byù du myô jàt lo nyi ri.

Makedoni Byù Rayùq Lé, Poluq Shing-rán Myang É Hkyô

6Ahkuî, yhángmòq gi, Asi-a mau má mungdang ê hko kyo râ hkyô lé Chyoiyúng So èq yhángmòq lé hkûm pyâm é yánmai, Hprugi mau eq Galatiq mau dông sô laî ló mù, 7Musi maukyo má jé ló kôjáng, Bihtuni mau shut wang ló râ haq htung akô; nghut kôlhang, Yesuq é Sô gi, yhángmòq lé ahkáng a byi nghut ri. 8Haû mù, yhángmòq gi, Musi mau mai sô laî ló luî, Tro‑a wà mó má gyó jé ló akô. 9Haú má, myín lé, Poluq gi, Makedoni byù rayùq lé yàp to mù, “Makedoni mau shut dàp lé luî, ngá-mòq lé le garúm yû làq.” ga luî, yhang lé dûng wùt nyi é shing-rán myang ri. 10Shing-rán haû lé Poluq myang é eq, Makedoni byu pé lé gabú danglù hko kyo râ matú, ngá-mòq lé Garai Gasang wùt yù bê nghut ri nghû myìt yù luî, haú hkûn yhang, ngá-mòq gi, Makedoni mau shut dàp ê râ matú rì rì kut ló bê nghut lhê.

Ludi-a Gâ É Myiwe Myhí Hpúng Byû Dùt Lo É Hkyô

11Haû mù luî, ngá-mòq gi, Tro‑a wà mó mai Samohtake zinlóng ang ang shut lhaî ji ê mù luî, htang nyí gi, Ne‑apoli wà má jé bê nghut lhê. 12Haû mai lai jáng, Makedoni mau má, Romaq byu pé xuq tô é, haú ginwáng mâ é ahkyàk wà mó nghut é, Hpilipi wà mó má ngá-mòq jé mù, haú má rayòq zo nyi nyi é nghut lhê.

13Bánno Buìnyì jé jáng, ngá-mòq gi, kyûdung jowò jòq nhô ngàm mù, wà hkum shinggan mâ é, wuìlàng yàm shut htoq ê luî, haú má zîng to láng é myiwe wuì lé, zung gyó mù nyo hi é nghut lhê. 14Haû dang gyô nyi é bang má, Garai Gasang lé noqkuq é, Htu‑atira wà mó byû, pán nê ung zo sû Ludi-a gâ é myiwe myhí rayùq bo ri; Yhûmsîng Garai gi, Poluq taî kyô é hkyô lé rago gyô yù sháng gàq ga, yhang lé myìt hkum hpóng byî ri. 15Yhang gi, yhang eq yhâng yhûmbyù wuì wuìmyhup ban hkâm yù kôjáng, “Núngmòq gi, ngo lé haû Yhûmsîng Yesuq má lùmjíng bê sû nghut é dông, myìt yù byi kô é nghut jáng, ngá yhûm má lé bíng keq.” ga luî, ngá-mòq lé zùq zùq ji yu ri.

Poluq Eq Sila Nhik Htóng Lúng É Hkyô

16Ra-nyí lé, ngá-mòq gi, haû kyûdûng é jowò shut e ló nyi le, nàt wang júng luî gumhpân hpan é jùn myhí rayùq ngá-mòq lé lhom huî ri. Haú yùq gi, gumhpân hpan é dông yhâng yhûmsîng wuì lé ngùnzè gyai yhang hô byî é sû nghut lhê. 17Myiwe haû gi, Poluq eq ngá-mòq htâng má châng to mù, “Shí bang gi, núngmòq lé hkyi yù hkyô taî kyô wún é, Myhang Htâng é Garai Gasâng é duìnhâng zoshâng wuì nghut bum akô ô!” ga wùt garû ri. 18Buìnyì myo myo haû su chyat châng garû wún é yánmai, Poluq gi, gyai yhang myìt hpêbu byùq mù, lhing wú kat luî, nàt haû lé, “Yesuq Hkrisidùq é myìng lang luî ngò nang lé hkunmó hkyô kat lhê, yhâng chyáng mai htoq ló byùq àq.” ga luî, nàt haû lé, nhik-yô kat ri. Haú hkûn jáng, nàt haû gi, yhâng chyáng mai htoq ló byùq bê nghut ri.

19Ahkuî, myiwe hau é yhûmsîng wuì gi, ngùnzè myàng zo râ myòqbyù jowò a jòq lô é hkyô lé sé kôjáng, Poluq eq Sila nhik lé chyup yû mù, gaì mâ é sûwún wui chyáng she hkyut e akô. 20Dum, yhángmòq gi, yhángnhik lé târâ agyi pê chyáng shuî ê mù, “Shí nhik gi, Yudaq byù nghut mù luî, ngá-mòq Romaq byu pé mai a ge châng é htûnghking lé mhoqshit byî nyi é dông, 21ngá-nhûng é wà mó lé gunjâng nyi akô nghut ri.” ga taî akô.

22Haû mù luî, shiwa byu pé gi, yhángnhik lé chôm htîm akô. Târâ agyì pé gi, yhángnhik é mèbu lé lâng hkyut pyám luî, wùmchûm hkat èq bàt râ matú, hkunmó hkyô kat akô. 23Yhángmòq gi, yhángnhik lé gyai yhang nhuq bàt yu é htâng, htóng má lhûng kat mù, rago za wú zúng râ matú htóng sûwún lé hkunmó hkyô tô akô. 24Htóng sûwún hpó gi, haû sû é hkunmó lé wó jáng, yhángnhik lé hkyî kyum hut luî, htóng mâ é, je ahtê wàp má lhûng tô ri.

Htóng Sûwún Hpó Hkyi Yù Huî É Hkyô

25Nghut kôlhang, gùnggàm yòq lé, Poluq eq Sila nhik gi, kyûdung luî, Garai Gasang lé mahkôn hkya-ôn nyì kô é hkûn, htóng byû góbang gi, yhángnhik é htê lé chôm gyô nyi bum akô. 26Haú hkûn, byò dàn ratung layàng mó nún lô mù htóng yhûm gón le nún lô luî, hkum pé bànshoq le radá dâm bóng hâ lo bum ri; dum nghut jáng, yùq hkangmó mâ é toqjâng tui pé le gyùt gyó byùq bê nghut ri. 27Htóng sûwún hpó gi, yhup bûn lò mù, htóng hkum pé bóng hâ tô bum é lé myang kat jáng, htóng byu pé ban hpang byùq bùm bekô râ nghut lhê ga myìt yù luî, shâm shê mù, yhânggùng yhang sat shî râ haq htung ri. 28Nghut kôlhang, Poluq gi, “Ê, náng gûng yhang nàng haû su hkâkut, ngá-mòq bànshoq shî má nyi tô lhê.” ga luî, htê mó èq wùt garû taî kat ri.

29Haú hkûn, yhang gi, dùq é myibung lé dûng yù mù, ahkaû shut din wang ló luî, Poluq eq Sila nhik é hí má gyùq nán é eq ngóm gòp tô ri. 30Hau htâng, yhang gi, yhángnhik lé shuî htoq yû luî, “Sará nhik ê, ngò hkyi yu é hui râ matú, haî kut ra râ lhú?” ga myî kat ri.

31Haú hkûn, yhángnhik gi, “Yhûmsîng Yesuq lé lùmjíng jáng, nàng eq náng yhûmbyù lhúnglhâng bang hkyi yu é hui râ nghut lhê.” ga taî akô. 32Hau htâng, yhángnhik gi, haû htóng sûwún hpó eq yhâng yhûmbyù lhúnglháng lé, Yhûmsing é mungdang hko kyô akô. 33Haú myîn haú u lé yhang, htóng sûwún hpó gi, yhángnhik lé shuî ê mù, yhángnhik é dàm pé lé tsing chî pyám byi luî, hau htâng, yhang eq yhâng yhûmbyù bànshoq bang wuìmyhup hkâm yù bekô nghut ri. 34Hau htâng, yhang gi, yhángnhik lé, yhâng é yhúmhkaû má shuî wang ló mù, zoshuq hkang byî ri. Yhang eq yhâng yhûmbyù bànshoq bang gi, Garai Gasang lé wó lùmjíng bekô nghut é yánmai, gyai gabú nyi bum akô nghut ri.

Haq Nhang Pyám Râ Lé A Dóng É Hkyô

35Ahkuî, maubó jáng, târâ agyì wuì gi, “Haú nhik lé nhang pyám aq.” ga, htóng sûwún hpô chyáng pyátá pé lé taí nhang kat akô. 36Haú hkûn, htóng sûwún hpó gi, “Núngnhik lé nhang pyám aq ga, târâ agyì wuì mai byù nhang kat ri; haû mù, ahkuî, núngnhik gi, ngón za htoq ló lo keq.” ga luî, Poluq lé taî ri.

37Poluq kúm gi, “Ngá-nhik gi, Romaq mîngdán byù shèq ru nghut le wá, myî gôn wú é hkyô le a bo é, byu pê hí má ngá-nhik lé nhuq bàt mù, htóng má hkyô kat kôluî nhîng, ahkuî tsik za haq nhang pyám râ haq htung akô nhung lhí? A wó dùt, yhángmòq yhang shèq lé shuî htoq yû kó sháng gàq.” ga luî, yhángmòq lé tû taî kat ri.

38Pyátá pé gi, târâ agyì wuì lé dang haú pé ló taî kyo kôjáng, târâ agyì wuì gi, Poluq eq Sila nhik Romaq mîngdán byù nghut é hkyô lé wó gyo kôjáng, gyô gyùq kôluî, 39yhángmòq yhang, yhángnhik chyáng lé mù, tôngbán luî, shuî htoq yû mù, wà haû mai htoq ló byùq râ matú chôm dûng akô. 40Haû mù, Poluq eq Sila nhik gi, htóng mai htoq ló é htâng, Ludi-a é yhûm má wang ló akô; haú má, gu-mang wuì eq le hui kômù, yhángmòq lé wum-o byi luî, htoq ló bekô nghut ri.

Currently Selected:

Lagyo 16: znot

Highlight

Copy