Lagyo 15

Ahpyo-kuq Hpyit Hkyô Eq Sêng É Manghkáng

1Ahkuî, Yuda mau mâ é byù ra-am gi, Anti-oku wà mó má lé jé mù, gu-mang wuì lé, “Núngmòq gi, Mosheq é htûng târâ eq rajung za, ahpyo-kuq a hpyit é nghut jáng, hkyi yu é hui râ a nghut.” ga luî, mhoqshit bum akô. 2Hau é yánmai, myìt a huî lhûm é hkyô htoq lô mù, Poluq eq Baranaba nhik gi, haú bang eq gyai yhang myíng myô lhûm akô; haû mù luî, gu-mang wuì gi, Yerusalem wà mó má nyi é lagyô pé eq sûwún wui chyáng, haú hkyô lé ló hpyê lhum râ matú, Poluq, Baranaba nhik eq rahá, yhángmòq chyáng mâ é ra-am lé, nhang kat râ ga hkyin tô akô. 3Haû mù, hpúng byû wuì yhángmòq lé dé kat kôjáng, yhángmòq gi, Hpinisi mau eq Samariq mau gyoro mai sô laî ló uchyang, tûngbaù pé lhing wang lò bê hkyô lé taî kyô akô. Haú mâ é gu-mang wuì le gyai yhang gabú nhang akô nghut ri. 4Yhángmòq, Yerusalem wà mó má jé kô é hkûn, hpúng byû wuì, lagyô pé eq sûwún wuî gi, yhángmòq lé lhom hkûlum yù kô é nghut mù luî, yhángmòq gi, yhángmòq dông mai Garai Gasang kut é hkyô lhúnglháng lé, haú bang lé shit kyô akô.

5Haú hkûn, Hparishe hpúng mâ é lùmjíng bang ra-am gi, toq mù luî, “Tûngbaù pé lé, ahpyo-kuq hpyit nhâng râ eq, Mosheq é târâ dông cháng nhâng râ gi, ra yhang râ lhê.” ga taî bum akô nghut ri.

Yerusalem Wà Mó Má Kut É Byìn Tú Wàp Hpong

6Ahkuî, lagyô pé eq hpúng sûwún wuî gi, shí hkyô lé chôm myìt wú râ ga, zùp tô bum akô. 7Shí hkyô lé gyai yhang dang rhâng lhûm bùm kô é htâng má, Petiruq gi, toq mù luî, “Gu-mang wuì ê, Garai Gasang gi, ngá nhut mai taî é, haû gabú danglù lé, tûngbaù pé gyô yù mù lùmjíng kó sháng gàq ga, hí hkûn núngmòq chyáng mai ngo lé hkyin yù bê hkyô lé, núngmòq sé lùgù nghut bê. 8Haû mù, myìt nhiklhum lé sé byi sû Garai Gasang gi, ngá-nhúng lé byî é eq rajung za, yhángmòq lé le Chyoiyúng Sô byî é dông, yhángmòq lé hàp yù bê hkyô lé sàksé tûn shit bê nghut ri. 9Garai Gasang gi, yhángmòq lùmjíng luî, yhángmòq é myìt nhiklhum lé lhoqsan lhoqyúng byi bê nghut é yánmai, ngá-nhúng eq yhángmòq é gyoro má gamhkuî é hkyô a jòq nhâng lo nghut ri. 10Haû nghut le gi, îchyí îwâ pê èq le, ngá-nhûng èq le a ung é wòlai lé, haû chángzô pê é lìngzing má ke byî é dông mai, haî mù, ahkuî Garai Gasang lé chyam wú nyi akô lhú? 11Nghut kôlhang, ngá-mòq gi, yhángmòq eq rajung za, Yhûmsîng Yesuq é jeju mai za hkyi yu é huî é hkyô lé lùmjíng é bang nghut lhê.” ga luî, yhángmòq lé taî ri.

12Haú hkûn, zùp míng tô é bang lhúnglháng gi, zim za kut luî, Baranaba eq Poluq nhik mai, tûngbaù pê chyáng, Garai Gasâng èq yhángnhik é lòq dông maúhpo alhô agàn pé eq maúhpo múzó pé kut shit é hkyô, taî kyô nyi é lé chôm gyô nyi akô. 13Yhángnhik dang ban taí kôjáng, Yakuq gi, “Gu-mang wuì ê, ngá dang lé gyô wú keq. 14Garai Gasang gi, tûngbaù pê chyáng mai Yhâng mying é matú byù ra-myû hkyin yù râ ga, yhángmòq lé sânghi mai hkâsu kut lé kûm nyi é hkyô lé, Simun taî kyo bê nghut ri. 15-16Shí hkyô gi,

‘Hau é htâng má gi, ngò dum taû lò mù luî, lêng gyòp byùq bê Dawiq é yhûm#15:15-16 Dawiq é yhûm gâ é gi, Dawiq eq yhâng é awùt ashín pé ùp é hkyô lé gâ é nghut lhê. lé dum saí râ nghut lhê.

Haû byòq htên tô é pé lé saî saí mù, haû lé dum lhoqtoq râ nghut lhê.

17Haú hkûn shèq, ngá myîng mai ji yu é tûngbaù pé eq, myìt gyó tô é byù lhúnglhâng bang gi, Yhûmsîng Garai lé hô kôrâ nghut lhê ga,

18a‑nham mau htoq xâng hkun mai, shí hkyô pé lé sé nhang é Yhûmsîng Garai taî ri.’#Amo 9:11-12

ga myìqhtoî pé kâ tô é dang eq rajung za nghut ri.

19Haû mù luî, ngò taí nau é gi, tûngbaù pê chyáng mai Garai Gasâng shut lhing lo é bang lé, gótû haî le a lhoqwuî é za, 20hparà lhô pé lé kyáng byî é a sansêng é zoshuq pé lé le, ashop é dông gùngsho zùm yàp é hkyô lé le, lìngzing mai myhik sat é gaunyhaú sho lé le, sui lé zô é hkyô lé le, koi pyám râ matú za, yhángmòq lé, ngá-nhúng laiká mai wó shit kat lhê. 21Hkâsu mù gâ le, góhkûn mai yhang, Mosheq é târâ lé wà hkangmó má hko kyô ló kômù, Bánno Buìnyì hkangmó târâjong pé má nghap kyo kyo kut bûm kô é nghut lhê.” ga taî ri.

Lùmjíng É Tûngbaù Pê Chyáng Hun Kat É Laiká

22Haú hkûn, lagyô pé, sûwún wuî eq, hpúng byû wuì lhúnglhâng bang gi, Poluq, Baranaba nhik eq rahá Anti-oku wà mó shut nhang kat râ byù lé, yhángmòq chyáng mai hkyin yù râ matú chôm myìt hpyit akô. Haû eq rajung za, yhángmòq gi, gu-mang wui chyáng mâ é nhik bô sûwún nhik Barasaba gâ é Yudaq eq Sila lé hkyin yu akô nghut ri. 23Yhángnhik é lòq má, hun kat kô é laiká gi,

“Anti-oku wà mó, Suriq mau eq Kiliki mau pé má nyi é, tûngbaù gu-mang wuì ê, núngmòq é gu-mang wuì nghut é, ngá-mòq lagyô pé eq sûwún wuî gi, nguì ngón dang shit kyô kat lhê.

24Ngá-mòq nhang kat é le a nghut bang ra-am gi, ngá-mòq chyáng mai htoq lô mù, núngmòq lé dâng èq lhoqbyòk pyám luî, núngmòq é myìt lé lhoqnhúng byî nyi é hkyô lé, ngá-mòq wó gyo bê. 25Haû mù, ngá-mòq lhúnglhâng bang gi, byù ra-am lé hkyin yù mù, 26ngá-nhûng é Yhûmsîng Yesuq Hkrisidùq é matú, yhûmsing chyungxe lé lháng a hâ é ngá-nhúng chyitdàp é Baranaba, Poluq nhik eq rahá, núngmòq chyáng nhang kat râ matú chôm myìt hui bê. 27Haû mù luî, ngá-mòq gi, Yudaq eq Sila lé nhang kat lhê; yhángnhik gi, laiká má bo é eq rajung za, yhángnhik é nhut mai yhang taî kyo kôrâ nghut lhê. 28Núngmòq é matú gi, hparà lhô pé lé tîng byî é zoshuq eq sui, lìngzing mai myhik sat é gaunyhaú sho eq ashop é dông gùngsho zùm yàp é hkyô pé lé, koi pyám râ hkyô mai lai luî, gótû wòwùn hûn râ hkyô a jòq nghû luî, Chyoiyúng Sô le, ngá-mòq le, myìt huî to bê. 29Núngmòq haú pé lé koi pyâm nyì kôjáng gi, gè râ nghut lhê.

Nguì ngón wángzán nyî kó sháng gàq ô!” ga kâ tô ri.

30Yhángmòq lé nhang kat kôjáng, yhángmòq gi, Anti-oku wà mó má gyó jé lô kômù, hpúng byû wuì lé ji tsîng to kôluî, haû hûn kat é laiká lé àp byî akô nghut ri. 31Hpúng byû wuì gi, laiká haû lé ban nghap kôjáng, wum-o byî é danglù hau é yánmai, gabú nyi bum akô. 32Yudaq eq Sila gi, myìqhtoî nhik le nghut kômù luî, gu-mang wuì lé mungdang myo myô èq lhoqpun lhoqkying kômù, wum-o lhoqgîng to byî akô. 33Rayòq zo haú má nyi nyì kô é htâng má, gu-mang wuì gi, yhángmòq lé nhang kat é bâng chyáng, nguì nguì ngón ngón dum taû ló nhâng bekô nghut ri. 34(Sila kúm gi, yhang ô nau é dông nyi gyó tô ri.)#15:34 Bun zo shí lhum gi, Grik Chyúmlaiká myo myo má a bò nghut lhê. 35Poluq eq Baranaba kúm gi, Anti-oku wà mó má nyi gyó to kômù, Yhûmsîng Yesuq é mungdang lé, góbang myo myo eq, mhoq kyo hko kyô akô nghut ri.

Poluq Eq Baranaba Nhik Gâng Lhûm É Hkyô

36Hau htâng, buìnyì tsómra myáng jáng, Poluq gi, Baranaba lé, “Yhûmsing é mungdang hko kyô laî lo wú bê, wà hkyap hkangmó mâ é gu-mang wui chyáng taû lò luî, yhángmòq hkâsu dùt nyi é hkyô lé, ló dum kûm wú lo gòq.” ga taî ri. 37Baranaba gi, Marikuq gâ é Yohan lé le shuî chûng nau ri. 38Nghut kôlhang, Poluq gi, haú yùq lé a kâm shuî chûng naù nghut ri; hkâsu mù gâ le, yhang gi, Pamhpuli mau má yhángnhik lé tô pyâm to mù, yhángnhik eq rahá múzó a kâm xoq zui nau é sû nghut é yánmai nghut ri. 39Hau é yánmai, yhángnhik gi, gyai yhang taî shai lhum kômù, rayùq eq rayùq gâng lhum bekô nghut ri. Baranaba gi, Marikuq lé shuî chûng luî, lhaî ji mù Kupru zinlóng shut e ló byùq bê nghut ri. 40Poluq kúm gi, Sila lé hkyin yù mù, gu-mang wui èq yhang lé Yhûmsîng Garaî é jeju má àp kat kô é htâng má, yhángnhik gi, htoq e ló byùq bekô. 41Haû mù, Poluq gi, Suriq mau eq Kiliki mau mai sô laî ló uchyang, haú mâ é noqkuq hpûng pé lé wum-o lhoqkíng byî wún bê nghut ri.

Currently Selected:

Lagyo 15: znot

Highlight

Copy