APOCALIPSIS 6

Tembikuatía imboyaa reta

1Jare aecha Vecha kuimbae taɨrusu vae oipea metei jókuae tembikuatía imboyaa. Jayave aendu metei oikove vae reta güi jei: “Eyu” ara jɨapu vaeecha oyeendu iñee. 2Amae jare aecha metei kavayu tïi vae,#Zac 1.8; 6.3,6. jare opo kavayu re vae güɨnoi güɨrapa. Jare oñemee chupe äka-regua, oë oporomoamɨri vae oporomoamɨri vaerä.

3Jare Vecha kuimbae taɨrusu vae oipea tembikuatía imboyaa mokoía yave aendu mokoía oikove vae jei: “Eyu.”

4Jare aecha oë metei kavayu pɨ̈taasɨ vae.#Zac 1.8; 6.2. Jare opo kavayu re vae pe oñemee mbaepuere omoñerarouka vaerä ɨvɨ pegua reta, oyoyuka reta vaerä; jare oñemee vi chupe metei kɨsepuku tuicha yae vae.

5Jare Vecha kuimbae taɨrusu vae oipea tembikuatía imboyaa mboapɨa yave, aendu mboapɨa oikove vae jei: “Eyu”, jare aecha metei kavayu jüu vae.#Zac 6.2,6. Jare opo kavayu re vae güɨnoi ipo pe mbaejäaka. 6Jare aendu ñee jókuae irundɨ oikove vae reta ipɨte pe jei: “Metei kilo trigo jepɨ metei denario, jare mboapɨ kilo cebada jepɨ metei denario. Ërei agüɨye erokomegua asaite jare vino.”

7Jare Vecha kuimbae taɨrusu vae oipea tembikuatía imboyaa irundɨa yave, aendu irundɨa oikove vae jei: “Eyu.” 8Amae jare aecha metei kavayu iyu vae. Jare opo kavayu re vae jee ko Mano. Jare Omanogüe reta jenda oiko Mano jaɨkue. Jare oñemee chupe reta mbaepuere jeta yeyé ɨvɨ pegua reta re, ipuere vaerä oyukauka reta ñeraro rupi, karuai pe, mbaerasɨ pɨ̈chɨi pe jare mɨmba pochɨ vae#Ez 14.21. reta pe.

9Jare Vecha kuimbae taɨrusu vae oipea tembikuatía imboyaa pandepoa yave, aecha mɨmba oyeyukagüe oñemeea iyɨpɨ pe Tumpa iñee jeko pegua oyeyukauka vae reta jekove, jare omombeu Tumpa iñee ïru vae reta jeko pegua. 10Jae reta iñeeäta reve jei: “OreYa iyoambae jare añetete vae. ¿Kërai yave pa rejäata jare reiporaraukata ɨvɨ pegua oreyuka vae reta pe?” 11Jare temimonde tïi vae oñemee metei ñavo pe, jare oñemee chupe reta oputuu reta vaerä michi pegua, echa oyeyukaukata vi räri Tumpa pe oyeokuai jae reta rami vae, oupitɨ regua tembipapa.

12Jare aecha Vecha kuimbae taɨrusu vae oipea tembikuatía imboyaa ovaa yave, ɨvɨ täta okana.#Ap 11.13; 16.18. Jare kuaraɨ oyembopɨtumimbi#Is 13.10; Jl 2.10,31; 3.15; Mt 24.29; Mc 13.24-25; Lc 21.25. metei tarapo jüu vae rami, jare yasɨ moropɨ̈ta tugüɨ#Jl 2.31. rami, 13jare yasɨtata reta oa ɨvɨ pe, metei ɨva ia oa jäka güi ɨvɨtu täta omokana yave vae rami. 14Jare ara opa yapúa tupapire rami;#Is 34.4. jare opaete ɨvɨtɨ reta jare ɨguasu päu pegua ɨvɨ reta oyembosɨrɨ jenda güi.#Ap 16.20. 15Jare mburuvicha guasu reta ɨvɨ pegua, mburuvicha reta, oikokatu vae reta, sundaro ruvicha reta, mbaepuere güɨnoi vae reta, jare opaete tembiokuai reta jare opaete tembiokuaimbae reta oñemi ɨvɨkua reta rupi jare itakua ɨvɨtɨ rupigua reta rupi;#Is 2.19,21. 16jare jei reta ɨvɨtɨ reta jare ɨ̈vavira reta pe: “¡Pea oreré,#Os 10.8; Lc 23.30. oreomi pea mburuvicha iguapɨa pe oguapɨ vae jóvai güi jare Vecha kuimbae taɨrusu vae iyarasɨ güi!” 17Echa oväe ma ara Vecha kuimbae taɨrusu vae iyarasɨ yae vaerä, ¿kia pa ipuereta güɨropɨa?#Is 13.6; Ez 30.2-3; Jl 1.15; 2.11; Am 5.18-20; 8.9-14; Sof 1.14-18; Mal 3.2.

Currently Selected:

APOCALIPSIS 6: GUABD

Highlight

Copy

Compare