SAN MATEO 13
13
Jesús ombojaanga omaetɨ vae re
(Mc 4.1-9; Lc 8.4-8)
1Jókuae ara Jesús oë o güi, ojo oguapɨ ɨguasu jembeɨ pe. 2Jare jeta vae oyemboatɨ jae oïa pe. Jáeramo jae oyeupi metei barco raɨ ɨguasu pe oï vae pe, jare oguapɨ pɨpe.#Lc 5.1-3. Jare yatɨ vae reta ñogüɨnoi ɨguasu jembeɨ pe. 3Jare Jesús omboe reta jeta mbaembae re ombojaanga reve. Jei chupe reta: “Metei kuimbae omaetɨ vae, oë omaetɨ. 4Jare omaetɨ yave omoai temitɨ, jare amogüe oa tape rupi. Jayave yogüeru güɨra reta opa jou. 5Mbovɨ temitɨ oa itatɨ rupi, ɨvɨ jetambaea pe. Kuae oë ɨmambae, mbaetɨ jeta ɨvɨ güɨnoi ramo. 6Ërei kuaraɨ jasɨ yave, opa ipiru; japo matɨä ɨ́vɨkotɨ ojo ramo, otini. 7Ïru temitɨ oa yuu pɨte rupi. Jare yuu okuakuaa yave, opa oyuka jókuae temitɨ. 8Ërei ïru temitɨ oa ɨvɨ kavi pe. Kuae reta okuakuaa kavi jare ia. Amogüe cien jäɨ, amogüe sesenta jäɨ jare amogüe treinta jäɨ. 9Oipota oyeapɨsaka vae, toyeapɨsaka kuae re.”
Maera Jesús oporomboe ombojaanga reve
(Mc 4.10-12; Lc 8.9-10)
10Jayave Jesús jemimboe reta oyakatu jese jare oparandu reta chupe:
—¿Maera pa nemiari chupe reta rembojaanga reve?
11Jesús jei chupe reta: “Tumpa oikuaauka peve araɨgua mborookuaía peikuaambae vae. Ërei chupe reta mbaetɨ. 12Echa güɨnoi vae pe oñemoïruta, jeta güɨnoi vaerä. Ërei mbaetɨ güɨnoi vae güi, jókuae mbovɨ yae güɨnoi ave oñepɨ̈rota chugüi.#Mt 25.29; Mc 4.25; Lc 8.18; 19.26. 13Jáeramo chemiari chupe reta ambojaanga reve, echa yepe tëi oecha reta, ërei mbaetɨ oecha kavi reta, jare yepe tëi oendu reta, ërei mbaetɨ oikuaa reta. 14Jökorai oyembopo jese reta ñeemombeúa Isaías jei vae. Echa jei körai:
‘Peendu tëita, ërei ngaraa peikuaa.
Peecha tëita, ërei ngaraa peecha kavi.
15Echa kuae reta ipɨa täta,
jare iyapɨsa pe oendu tëi,
jare osapɨmiño,
agüɨye vaerä oecha jesa pe,
agüɨye vaerä oendu iyapɨsa pe,
agüɨye vaerä oikuaa ipɨa pe,
agüɨye vaerä oyerova chekotɨ,
okuera reta vaerä.’#Is 6.9-10.
16Ërei pe reta peyerovia ko. Peecha jare peendu jeko pegua. 17Añete che jae peve, jeta ñeemombeúa reta jare jupi vae reta oipota tëi oecha pe reta peecha vae, ërei mbaetɨ oecha. Jaeramiño vi jae reta oipota tëi oendu pe reta peendu vae, ërei mbaetɨ oendu reta.”#Lc 10.23-24.
Jesús omombeu kavi omaetɨ vae re oyembojaanga vae
(Mc 4.13-20; Lc 8.11-15)
18“Peyeapɨsaka cheré chemiari peve ambojaanga reve kuimbae omaetɨ vae re vae. 19Kia oyeapɨsaka Tumpa iporookuaía re jare mbaetɨ oikuaa kavi yave, jae ko jókuae temitɨ tape rupi oa vae rami. Echa ou voi jókuae ikavimbae iyapoa#Mc 4.15; Lc 8.12. jare omoakañɨ Tumpa iñee güi. 20Jökoraiño vi jókuae temitɨ oñeotɨ itatɨ rupi vae oyembojaanga jókuae Tumpa iñee oendu vae re. Jupiveiño omboresive oyerovia reve. 21Ërei kuae temitɨ japo mbaetɨ mombɨrɨ ojo ɨ́vɨkotɨ ramo mbaetɨ ɨma oiko. Echa, oime mbɨatɨtɨ ani tembiporara Tumpa iñee jeko pegua yave, jupiveiño ogüɨapi. 22Jökorai vi jókuae temitɨ oa yuu pɨte rupi vae oyembojaanga Tumpa iñee oendu vae re. Ërei omboɨpɨ oyemoambeko ɨvɨ pegua mbaembae re, jare oyembotavɨ, oipota oikokatu jeko pegua, jare omoakañɨ ye Tumpa iñee güi. Jáeramo jae reta jókuae temitɨ iambae vae rami ko. 23Ërei jókuae temitɨ oa ɨvɨ kavi pe vae oyembojaanga Tumpa iñee oendu jare oikuaa kavi vae re. Jare jókuae metei temitɨ güi, amogüe cien jäɨ, amogüe sesenta jäɨ jare amogüe treinta jäɨ vae rami ko.”
Trigo jare trigoraanga
24Jesús imiari ye ombojaanga reve, jei: “Araɨgua mborookuaía, metei kuimbae temitɨ ikavi vae iko pe oñotɨ vae rami ko. 25Ërei kuimbae reta oke ramboeve, jovaicho ou oñotɨ trigoraanga trigo ipɨte rupi, jare ojo ye. 26Trigo okuakuaa jare ia yave, oyekuaa vi trigoraanga trigo ipɨte rupi. 27Jare ko iya jembiokuai reta yogüeru jei chupe: ‘¿Reñotɨukaä pa ko trigo ikavi vae ndeko pe? ¿Këraiägua pa oyekuaa trigoraanga?’ 28Jayave ko iya jei chupe reta: ‘Metei cherovaicho oyapo kuae.’ Jayave jembiokuai reta jei chupe: ¿Reipota pa rojo opa roapomondoro jókuae trigoraanga? 29Ërei ko iya jei: ‘Agüɨye peapomondoro. Echa peapomondoro yave trigoraanga, güɨramoi peapomondoro vi trigo trigoraanga ndive. 30Tokuakuaa päve mókoi reve trigo yaipoo regua. Jare yaipoo ma yave, jaeta ombaepoo vae reta pe: Pemboatɨ räri trigoraanga peyokua peapɨ vaerä. Ërei pemboɨru trigo cheavatío pe.’ ”
Mostaza jäɨgüe
(Mc 4.30-32; Lc 13.18-19)
31Jesús jekuae imiari ye ombojaanga reve, jei: “Araɨgua mborookuaía, metei mostaza jäɨgüe kuimbae güɨraja oñotɨ iko pe vae rami ko. 32Kuae jäɨgüe jae ko michi yae opaete ïru temitɨ reta jäɨgüe güi vae. Ërei okuakuaa ma yave, tuicha yae opaete ïru temitɨ metei año peguaño okuakuaa vae reta güi. Oyeapo metei ɨvɨra, jare güɨra reta yogüeru oyapo jaitɨrä jäka re.”
Mbɨyape imbovúa
(Lc 13.20-21)
33Jesús jekuae imiari ye ombojaanga reve. Jei: “Araɨgua mborookuaía, mbɨyape imbovúa rami ko. Kuña omboyea jókuae mbɨyape imbovúa veinte kilo trigokúi ndive yave, opaetei ombovu vae rami ko.”
Maera Jesús oporomboe ombojaanga reve vae regua
(Mc 4.33-34)
34Opaete kuae jei Jesús ombojaanga reve. Mbaetɨ imiari chupe reta ombojaangambae reve, 35oyembopo vaerä ñeemombeúa jei vae. Echa jei körai:
“Chemiarita ambojaanga reve.
Amombeuta ɨvɨ oyeapo güive#Sal 78.2. oyekuaambae vae.”
Jesús omombeu kavi trigoraanga regua
36Jayave Jesús opa güire omondo ye opaete vae reta, oike o pe. Jare jemimboe reta oya katu jese, jei reta chupe:
—Emombeu kavi oreve rembojaanga reve rere trigoraanga re vae.
37Jayave Jesús jei chupe reta: “Temitɨ ikavi vae oñotɨ vae, oyembojaanga che Kuimbaerä ayeapo vae re. 38Jókuae, ko, oyembojaanga opaete ɨvɨ re. Trigo ikavi vae oyembojaanga Tumpa iporookuaía pegua reta re. Ërei trigoraanga oyembojaanga ikavimbae vae oyapo vae reta re. 39Jókuae, ko iya jovaicho trigoraanga oñotɨ vae oyembojaanga aña guasu re. Mbaepoo oyembojaanga kuae ɨvɨ iyapɨta vae re. Ombaepoo vae reta oyembojaanga araɨgua reta re. 40Jókuae trigoraanga oyemboatɨ jare ókai tata pe. Jökorai oasata kuae ɨvɨ iyapɨ pe. 41Che Kuimbaerä ayeapo vae ambouta chearaɨgua reta, omboatɨ reta vaerä opaete iyoa vae reta jare ikavimbae iyapoa reta cheporookuaía güi. 42Jare omombo retata tata guasu pe. Joko pe oyaeo retata jare jäi ombokɨrɨrɨuta. 43Jayave jupi vae reta oyekuaata Tu iporookuaía pe kuaraɨ jembipe rami.#Dn 12.3. Oipota oyeapɨsaka vae, toyeapɨsaka kuae re.
Korepoti oñeotɨgüe vae regua
44Araɨgua mborookuaía, korepoti oñeotɨgüe rami ko. Echa metei kuimbae oväe yave jókuae korepoti oñeotɨgüe, oñotɨ pɨau ye, jare oyerovia reve ojo omee korepoti re opaete imbaembae ogua vaerä jókuae ɨvɨ.
Ita ipöra yae vae regua
45Araɨgua mborookuaía, metei omaemee vae ita ipöra yae vae reta jekaa rami ko. 46Oväe metei ita ipöra yae vae yave, ojo omee opaete imbaembae ogua vaerä jókuae ita ipöra yae vae.
Pɨsa re oyembojaanga vae
47Araɨgua mborookuaía, metei pɨsa rami ko. Echa kuimbae reta omombo ipɨsa ɨguasu pe yave, omboa oipotagüe jevae ɨ rupigua. 48Jare pɨsa tɨnɨe ma yave, kuimbae reta güeru ɨguasu jembeɨ pe. Jayave oguapɨ oiparavo, jare omboɨru jevae ikavigüe kanata pe, ërei omombo jevae ikavimbae reta. 49Jökoraita oyeapo kuae ɨvɨ iyapɨ yave. Araɨgua reta yogüeruta jare ombosɨrɨta ikavimbae iyapoa reta jupi vae reta ipɨte güi. 50Jare omombo retata tata guasu pe. Joko pe oyaeo retata jare jäi ombokɨrɨrɨuta.”
Mbaembae ipɨau vae jare indechi vae
51Jesús oparandu chupe reta:
—¿Peikuaa kavi pa opaete kuae mbaembae reta?
—Roikuaa kavi ma, oreYa —jei reta chupe.
52Jayave Jesús jei chupe reta:
—Opaete mborookuai re oporomboe vae ipoki yae ma araɨgua mborookuaía pegua pe vae, metei o iya rami ko. Echa jae mbaembae oñovatugüe oikatu güɨnoe ipɨau vae jare indechi vae.
Jesús Nazaret pe
(Mc 6.1-6; Lc 4.16-30)
53Jare Jesús opa ma imiari ombojaanga reve vae yave, ojo joko güi. 54Jare ojo oväe iɨvɨ pe yave, oporomboe judío reta itupao pe, jare oyeapɨsaka jese vae reta ipɨakañɨ jare jei:
—¿Kia pe ra oväe kuae kuimbae iyarakuaa yae vaerä?, jare ¿mɨakañɨ reta oyapo vaerä? 55Jae ko ɨvɨra pegua mbaravɨkɨ iyapoa taɨ. Ichɨ jae ko María. Jare Jacobo, José, Simón jare Judas jae ko tɨvɨ reta. 56Jare opaete jeindɨ reta yogüɨreko yandepɨte pe. Jáeramo, ¿kia pe ra oväe ipuere vaerä oyapo opaete kuaekuae?
57Jáeramo mbaetɨ etei güɨrovia reta Jesús. Ërei Jesús jei chupe reta:
—Opaete rupi imboetea yae metei ñeemombeúa. Ërei jëtaɨgua reta jare jo pegua reta mbaetɨ omboete.#Jn 4.44.
58Jare joko pe mbaetɨ oyapo jeta mɨakañɨ reta, jae reta mbaetɨ güɨrovia jese ramo.
Currently Selected:
SAN MATEO 13: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
