AMÓS 1
1
YandeYa iporojäa tëtaguasu reta kotɨ
1Kuae jae ko Amós iñee reta. Jae ko Tecoa pegua vecha iyangarekoa reta güi metei, Tumpa güi ou chupe ñee Israel regua vae omoërakua, mókoi año ndei oime mbove ɨvɨkana, Uzías#2 R 15.1-7; 2 Cr 26.1-23. oiko yave mburuvicha guasurä Judá pe, jare Jeroboam#2 R 14.23-29. oiko yave mburuvicha guasurä Israel pe; Jeroboam ko Joás taɨ.
2Amós jei: YandeYa iñeeäta yave ɨvɨtɨ Sión güi, jae ko Jerusalén,#Jer 25.30; Jl 3.16.
kapii jenda opa ipiru jare ɨvɨtɨ Carmelo jee vae pe ñana opa vi ipiru.
3YandeYa jei körai:
“Damascoɨgua reta#Is 17.1-3; Jer 49.23-27; Zac 9.1. jeta yae iyoa jeko pegua,
mbaetɨta cheɨ̈ro chupe reta;
echa tëta Galaad#2 R 10.32-33. ipo opa oyuka reta tembiporu jiero pegua pe.
4Jáeramo mburuvicha Hazael jo re amoendɨta tata,
jókuae tata opata oapɨ mburuvicha guasu Ben-adad jo kavi reta.#2 R 13.3.
5Amopëta Damasco jöke reta oyeokenda tëi ñogüɨnoi pɨpe vae;
amboaita tëta ɨvɨtɨ päu Avén#1.5 Avén, oipota jei: Ɨvɨpe kavi mbaeyoa renda. pe yogüɨreko vae reta,
jare Bet-edén#1.5 Bet-edén, oipota jei: Yekou renda. pegua mburuvicha reta;
jare tëtaguasu Siria pegua reta opata oyereraja tembipɨɨrä tëta Kir#2 R 16.9. pe.”
Jei yandeYa.
6YandeYa jei körai:
“Gaza pegua reta iyoa yae jeko pegua, mbaetɨta cheɨ̈ro chupe reta,
echa opaetei oipɨɨ reta güɨraja
metei tëta ipo omee vaerä Edom pegua reta pe tembiokuairä.#2 Cr 21.16-17; Jl 3.4-8.
7Jáeramo Gaza ikësea re amoendɨta tata
jare jókuae tata opata oapɨ mburuvicha guasu jo kavi reta.
8Opata amokañɨtei tëta Asdod pegua reta jare mburuvicha reta Ascalón pegua.
¡Aitɨta vi chepo Ecrón pegua reta re;
opaeteita filisteo#Is 14.29-31; Jer 47; Ez 25.15-17; Jl 3.4-8; Sof 2.4-7; Zac 9.5-7. reta jembɨregüe ave omano!”
Jei yandeYa.
9YandeYa jei körai:
“Tiro#Is 23; Ez 26.1—28.19; Jl 3.4-8; Zac 9.1-4; Mt 11.21-22; Lc 10.13-14. pegua reta iyoa yae jeko pegua, mbaetɨta cheɨ̈ro chupe reta;
echa ïru tëta ndive oyapo reta tëi yemongeta kavi reve opa oipɨɨ reta güɨraja omee Edom pegua reta pe,
mbaetɨ imaendúa reta jókuae morogüɨrökuavee päve oyapogüe re.
10Jáeramo Tiro ikësea re amoendɨta tata,
jare jókuae tata opata oapɨ mburuvicha guasu jo kavi reta.”
11YandeYa jei körai:
“Edom#Is 34.5-17; 63.1-6; Jer 49.7-22; Ez 25.12-14; 35.1-15; Abd 1-14; Mal 1.2-5. iñemuña reta iyoa yae jeko pegua, mbaetɨta cheɨ̈ro chupe reta;
echa kɨsepuku pe omoña reta jëtara Israel iñemuña reta,
ombosɨrɨ reta iyeugüi mboroparareko;
iyarasɨ katu avei ikotɨ jare omotareɨ katu avei jeko pegua.
12Jáeramo tëta Temán re amoendɨta tata,
jare jókuae tata opata oapɨ mburuvicha guasu jo kavi reta tëta Bosra pe.”
13YandeYa jei körai:
“Amón#Jer 49.1-6; Ez 21.28-32; 25.1-5; Sof 2.8-11. iñemuña reta iyoa yae jeko pegua, mbaetɨta cheɨ̈ro chupe reta;
echa oipota reta iɨvɨ ombotuicha jeko pegua,
opa oipeka kuña Galaad pegua ipurúa vae reta jɨe.
14Jáeramo tëta Rabá ikësea re amoendɨta tata,
jare jókuae opata oapɨ mburuvicha guasu jo kavi reta,
jɨapu reve, ñeraro iara pe jare mbaesusere iara pe.
15Jare juvicha guasu ojota tembipɨɨrä opaete imborɨa reta ndive.”
Jei yandeYa.
Currently Selected:
AMÓS 1: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
