NYENSANG CHIA 22
22
Maangnoubüa Ngekbü hoba Nyensangbü Chia
1Kü Mühghaü, kü Mühghaü, aila nyi ngo apyoda?
Kü to thuilabü ka hoba ngo wibü ngüh ka
no aila halokche bangan kida?
2O kü Mühghaü, ngei changea ngekda,
lausikei nyi ajongaida;
tokei nangnakkei, lausikei hakso ühüpda.
3Lausikei no Saopobou ki,
Israelbü nyensang Choba setshanga setan.
4 #
Mt 27.46 küneibü pisibousi shuongei ka to mailembei;
haoenei mailembei hoba nyi haoen khümenkei.
5Haoenei ka to ngekkei hoba haoen khümenkei.
6Lausikei ngo yangbem, müt aying;
mütei nyikubü hoba mütei shoeinakeibü.
7Ngo hapbü pendouei ngo attiko nyikuda;
haoenei sembung sungda,
haoenei khu ngombo lauda.
8“Haoei Bunyubou la khümbo kukei;
haoei hao nakhümen.
Haoei hao khümentiashi,
aieilausi haoei hao to maang haida.”
9Lausikei ngo nasetshang ka sungenbou kho no ki;
ngo künyueibü khukua kijinei nyi ngo khümenan phokei.
10Bukjinei thama ngo ka la jinkukei,
Anyuei bukbüyam no kü Mühghaü ki.
11kü ka bangan teki, aieilausi khonsak nyangko kia;
hoba thuibü ao aki.
12Masu pongsu juongei ngo kailepa.
hau kibü Bashanbü masu pongsuei ngo komlepa.
13Haoenei, haiyeibü hoba ngühbü
molosaonyuei tegü, kü la haakouan litikuda.
14Ngo dei tegü jonan apda;
hoba ngeibü küksihuo pendou lusaka.
Ngeibü maangpon naolep tegü kia;
maangaenei ho tühyinda.
15Ngeibü hau chakkok tegü yeia;
hoba ngeibü lishang ngeibü ngeia khanglepda;
hoba nyi ngo haibü thamngu to sungbaa.
16 #
Jn 19.24 Aieilausi kei shuongei ngo komlepa;
amaibü kümbü tan cheei ngo komlepa;
haoenei ngeibü ik hoba youa sua.
17Ngei ngeibü lo pendou wela thükakei,
haoenei kü to chühda,
hoba nyeklang menmentham chühda.
18Haoenei ngeibü neisimei haoen yoa janyoda,
hoba ngeibü neisimei shanga phaang pakda.
19Lausikei no bangan teki, O Bunyubou,
ngeibü hau, ngo panteiko thuikai.
20Ngeibü soushou inlou ka khümenshi.
Ngeibü langkei kei shuong ka khümenshi.
21Molosaonyueibü sembung ka ngo khümenshi;
hoba yamkabü masu pongsuei thenbü ka nyi ngo püetshi.
22Ngei ngeibü jaisinasi shuong la kaibü nyen ngetikho,
shuongsiphang yoa ngei no sangkho.
23Kan Bunyubou to souhatbü shuongei hao sangshi;
kan Jakobeibü lilabüei hao soneikangtiashi,
hoba Israelbü lilabü pendouei hao to souhatko laushi.
24Aishanga naklepbüa kibü khonkubü haoei
amangsen ayingsi awailet,
hoba haoei haoeibü thenyek hao ka ahu;
lausikei haoei hao to ngekjinei haoei ditkei.
25Shuong yaangbü yoka ngeibü nyensang ka ka louda,
aoyouei ka to soumo hatda haoen thedanga ngei ka la
ngeibü thebülanbü kulabü.
26Eaaoabüei shaulabü hoba senyühshemlabü;
aoyouei Bunyubou lamda haoenei hao sanglabü;
kaibü maangpon ponpen langkei kitishi!
27Kaodak thonbü pendouei damenlabü
hoba Bunyubou jungto sepeilabü;
hoba phang si chung pendouei hao thedanga lemlabü.
28Aieilausi sangle kho Bunyubou shangabü;
hoba phangshuong thüka haoei songdakda.
29Haü, kaodaka lilibü shuong pendouei khüpetlabü
hoba lemlabü;
thamla yeibü pendouei hao junga khüpetlabü;
khei jembü lolo langkei akienbü shangakei.
30Loulabü metenei hao khangenlabü;
loulabü meten to mütshuongei Bunyubou shanga lenlabü.
31Hobaje abukko kibü phang to haoeibü khümenbü
haoei küma dogo ngekletkulabü.
Currently Selected:
NYENSANG CHIA 22: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
