NYENSANG CHIA 19
19
Kümbüyaübüa Mühghaüeibü Soneikangbü
1Müh shuongei Mühghaü soneikangbü ngetida,
hoba müh tuan phobüei haoeibü ikkümiklei lenda.
2Chalou angboua ngüh longda,
hoba langyang weko songsido lenda.
3Ngühyem ayingsi ngühlang ai aki;
haoeneibü ngüh ditla athükda.
4Khei yingasikei haoeneibü ngüh kaodak pendou ae hauda;
hoba haoeneibü ngühlang kaodak thonbü sühko hauda.
Mühnyua haoei chanyu shanga neichem che danga.
5Hao chemkanbou chem maang ka longbü tegü ki,
hoba hau kibü müt tegü takletbü lama laangda.
6Hao longshang mühthon thinei kia,
hoba thon sühko tuda,
hoba hao aubü ka ai huan aki.
Bunyuboueibü Ngühkhüm
7 Bunyuboueibü ngühkhüm kho benbüsoubü,
hoei hau kitida, kho janbümubü,
songlanbü shuong la songsido kuda.
8 Bunyuboueibü ngühkhüm kho maimaitham
hoba khoei maangpon olintida.
Bunyubouei sakkubü kho tangbü hoba ditenbü maibü kuda.
9 Bunyubou to hatbü kho hinseibü hoba ponpen kida;
Bunyuboueibü soumo kho chongchingbü,
kho lepde mudonga saopobü ki.
10Hon tokei kho aei maangdühlabü.
haü, hon maibü juong tokei maikubou;
naodei hoba hap tokei teibou.
11Tokei khübü kho jungeibüei
kaibü sambou maangsangtida;
khübü kho jungeibüa jongsak yaang kia.
12Aoei haoeibü shedbü chühenkei?
Huan kibü shedbü ka ngo saüenkushi.
13Jembü apubangbü shedbü shabü ka no khangenbou senetshi;
khübü khoei ngo tejungeiti.
Khei yingsi ong ngo tangan kilabü;
hoba ngo ayingbü kümsilei yaangbü ka satenan kilabü.
14O Bunyubou, ngeibü laangnyu hoba ngo khümenbou,
kü sembung ka longbü ngüh hoba kü maangponei
damanchühbü nyi sungletenlabü lele yingtishi.
Currently Selected:
NYENSANG CHIA 19: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
