Ifyakutaŋga 27

1Popele apo, ili acekwile makosa Isaci, nemenso akwe ili aŵele nekafinsi, fyopele'fyo ati ye taaisiŵile ukuŵona, lomba alimwitile Eso, umwana wakwe umukulu-ŵantu, nekulaŵila kuli ye ati: Wemwana wanji! Naye alilaŵile kuli ye ati: Nineŵo ŋkunot 2Naye ati: Wona ŵukumo, ndicekwile, nsikesi-po akasuŵa ako ŋkafwa. 3Lomba pakuti pali fyefyo, ndukukukombetela ati uŵule ifintu fyoŵe ifyakwipaya-ko, insumbilo yoŵe neŵuta ŵoŵe, uye mumpaŋga, ukanjipaile inama; 4lomba wakunjipicila ifinani ifilumbulucile, koti nifyefyo ifi ntemwa; wakundetela, ŋkalye: ati umutima wanji ukakusyucisye ili nsiŋgafwa.

5Lomba Libeka waliumfwile, ili alaŵile lsaci kuli Eso umwana wakwe. Popele Eso waliile mumpaŋga, ili enenda mukufwaye'nama ati ŋkailete. 6Popele apo Libeka walilaŵile kuli Yakobi umwana wakwe, ati: Ŵona, nali naumfwa ŵawiso ŵalukulaŵila kuli Eso umukwanu ati: 7Undetele inama iyamumpaŋga, unjipicile ifinani ifilumbulucile, ati ŋkalye, ŋkakusyucisye pamenso aŵaLesa ili nsiŋgafwa. 8Pakuti pali fyefyo lomba, wemwana wanji, umfwilisye'siwi lyanji koti nififi ifi ndukukuŵula. 9Koya pano kwitaŋga, undetele utwana twambusi tuŵili utuweme, lomba nakuŵepicila ŵawiso ifinani ifilumbulucile, koti nifyefyo ifi ŵatemwa; 10naweŵo eli wakufitwala kuli ŵawiso, ati ŵakalye, ŵakusyucisye ili tawaŋgafwa.

11Popele Yakobi walilaŵile kuli ŵaLibeka ŵanyina ati: Eso umukwasu muntu wamasako aenji, sombi neŵo nditesimine pamuŵili. 12Cipale ŵatata ŵakuŋumfwa, eli niŋgawoneka kuli ŵo koti wakutumpaika; nekuliletelesya ukufiŋgwa, ukuliletele'syuko teko. 13Popele ŵanyina ŵalilaŵile kuli ye ati: Ukufiŋgwa koŵe kuŵe pali neŵo, wemwana wanji: sombi ulukumfwisye' siwi lyanji, uye, ukandetele'fyo. 14Naye aliile, nekutupinto' twana, nekutuleta kuli ŵanyina: naŵo ŵanyina ŵaliipicile ifinani ifilumbulucile, koti nifyefyo ifi ŵalukutemwa ŵawisi.

15Popele Libeka waliŵulile ifyakufwala ifiweme ifyakwe Eso, umwana wakwe umukulu-ŵantu, nekumufwika Yakobi umwana wakwe umwaniceŵantu: 16kaŵili walimufwicile pamaŵoko akwe napamukosi wakwe apatesimine ifiseŵa ifyatwana twambusi: 17nakaŵili walimupele Yakobi umwana wakwe muminwe yakwe, ifinani ifilumbulucile nasiŋkwa uyo aipicile.

18Naye waliisile kuli ŵawisi, nekulaŵila ati: Tata! Naŵo ati: Nineŵo ŋkuno; mbawe niwenani, wemwana wanji? 19Popele Yakobi walilaŵile kuli ŵawisi ati: Neŵo nineEso, umwana wenu uwatanjile ukufyalwa; nacita koti nifyefyo ifi mwandaya: ndukumukombeteleni ati imeni, mwikale, mulukulye'finani fyanji ifyamumpaŋga, ati umutima wenu ukansyucisye. 20Popele lsaci walilaŵile kumwana wakwe ati: Mbasyani wafiŵona bwaŋgu, wemwana wanji? Naye ati: Nipakuti ŵaYawe Lesa wenu ŵantumino'kusyuka. 21Popele lsaci walilaŵile kuli Yakobi ati: Ndukukukombetela ati palamina, ŋkumfwe, wemwana wanji, ati kani cine uli mwana wanji Eso umwinenene, kani koku. 22Popele Yakobi walipalamine kuli ŵalsaci ŵawisi; naŵo ŵalimumfwile, nekulaŵila ati: Isiwi lisiwi lyakwe Yakobi, sombi amaŵoko maŵoko akwe Eso. 23Lomba taŵamwisiŵile, pakuti amaŵoko akwe ali amasako, koti maŵoko akwe Eso umukwaŵo: fyopele'fyo kaŵamusyucisya. 24Naŵo ati: Niwemwana wanji Eso umwinenene? Naye ati: Nineŵo. 25Naŵo ati: Fipalamisye kuli neŵo, nakulya kufinani fyamwana wanji, ati ukusyucisye umutima wanji. Popele alifipalamisye kuli ŵo, naŵo ŵalilile: kaŵili kaaŵaletela nemfaina, kaŵanwa. 26Popele ŵawisi ŵaIsaci ŵalilaŵile kuli ye ati: Palamina pano, umfyonte-po, wemwana wanji. 27Naye walipalamine, nekuŵafyonta-po: naŵo ŵaliumfwile ubwema bwafyakufwala fyakwe, nekumusyucisya, nekulaŵila ati:

Ŵona, ubwema bwamwana wanji ŵuli koti bwema bweŵala ili ŵasyucisye ŵaYawe.

28Lomba ŵaLesa ŋgawakakupele icime icakwiulu,

Nemafuta amucalo capansi,

Nekufula kwamasaka nekwamfaina:

29Aŵantu ŋgaŵakupyunjile,

Nemikoka yaŵantu nayo ŋgaikwinamisye;

Ukaŵe niwisikuluŵo aŵakwanu;

Aŵana ŵaŵanoko aŵalalume ŋgaŵakwinamisye:

Ŋgaŵakafiŋgwe ŵonse aŵakukufiŋga,

Ŋgaŵakasyuke ŵonse aŵakukusyucisya.

30Lomba apo, ili ŵasilile ukumusyucisya Yakobi ŵalsaci, lomba Yakobi wapelo'kufuma-po pamenso aŵaIsaci ŵawisi, eli ainjile Eso umukwaŵo, uwasilo'kwenenda. 31Naye kaŵili waliipicile ifinani ifilumbulucile, nekuŵaletela ŵawisi; naye kaalaŵila kuli ŵawisi ati: Watata ŋgaweme, ŋgaŵakalye kufinani fyamwana waŵo, ati ukansyucisye umutima wenu. 32Popele ŵalsaci, ŵawisi ŵalilaŵile kuli ye ati: Niwenani? Naye ati: Ninemwana wenu, uwatanjile ukufyalwa, neEso. 33Lomba ŵalsaci kaŵatutumo'kwakuti, kaŵalaŵila ati: Ninani uyo uwaŵule'finani ifyamumpaŋga, nekundetela, naneŵo kandya-po fyonse, lomba tauŋgesa, kaŵili kamusyucisya? Icine naye ukusyuka akasyuka! 34Ili aumfwile amasiwi aŵawisi, lomba Eso walililile nekulila ukukulu ukwansoni syakuti, nekulaŵila kuli ŵawisi ati: Ŋgamunsyucisye naneŵo, Tata. 35Naŵo ati: Umukwanu wali waisa nekutumpaika, wapokolola ukusyuka koŵe. 36Naye ati: Kansi telyelelwe isina lyakwe ati niYakobi? pakuti wancenjelela isi-mpindi syoŵilo: walimpokolwele uŵupyani bwanji; lomba ŵoneni pano wampokolola ukusyuka kwanji. Kaŵili kaalaŵila ati: Tamundamine ukusyuka naneŵo?

37Popele ŵaIsaci ŵalimwasucile Eso ati: Ŵona, namwikalika ati niwisokulu, kaŵili namupela aŵakwaŵo ŵonse ati ŵakalukuli ŵantu ŵakwe; nakaŵili namukosya nemasaka nemfaina: lomba ŋkucitile'ndo weŵo, wemwana wanji?

38Popele Eso walilaŵile kuli ŵawisi ati: Muli nekusyucisya kumo kweŋka, Tata? Munsyucisye naneŵo, Tata! Popele Eso ukulila walililile neminsosi.

39Popele ŵaIsaci ŵawisi ŵalimwasucile ati:

Ŵona, pamafuta amucalo capansi pakalukuli pakwikala poŵe,

Napacime camwiulu icakufuma kwiulu;

40Kaŵili ukalukuli nemweo kumakosa ampoko yoŵe,

Nakaŵili ukalukupyunjilo'mukwanu;

Popele apo pantanjile,

Ili ukakakuluka ukakunte'cikoŋkoli cakwe ukucifumya pamukosi poŵe.

41Popele apo Eso walukumufitilwa Yakobi, pakuti pakusyuko'ko uku ŵamusyucisye ŵawisi: kaŵili Eso walilaŵile mumutima wakwe ati: Insiku isyakuŵalila ŵatata syapalamina; eli ŋkamwipayo'mukwasu Yakobi. 42Popele ŵalimuŵulile Libeka amasiwi ayo amwana wakwe umukulu-ŵantu; naye walitumine umuntu mukumwita Yakobi umwana wakwe umwanice-ŵantu, nekulaŵila kuli ye ati: Ŵona, umukwanu Eso alukulisaŋgalasya ifyakuli weŵo, ati ŋkamwipaye. 43Pakuti pali fyefyo lomba, wemwana wanji, umfwe'siwi lyanji; wime, ukafyuke ukulukuya kuli Labani umukwasu kuKalani; 44ukalukwikele nakwe insiku isice, ili tawuŋgafutata uŵukali bwamukwanu; 45ili takuŋgakufutatila ukufitwa kwamukwanu, naye ili taaŋgaluwa-ko ifyo ifi wamucita: eli ŋkatuma aŵantu mukukuleto'ko: mbanindo niŋgafwililwa mweŵilo akasuŵa kantu kamo?

46Popele apo Libeka walilaŵile kuli lsaci ati: Nacimwa pakuti paŵana ŵakwe Yeti aŵanakasi: kani Yakobi akope umbi umwanakasi umwana wakwe Yeti, uwakuŵe'fi, uwapaŵana aŵanakasi aŵamucalo, umweo wanji ukambela syani?

Currently Selected:

Ifyakutaŋga 27: AAL59

Highlight

Copy

Compare