Esita 3
3
1Panuma pali fyefyo-fintu imfumu Ekasyuilusi yalisuntwile Amani umwana wakwe Amedata umwina-Agaji, nekumutesya kuntanjile, nekwikalika umupando wakwe peulu patufumu tonse uto yali nato. 2Popele aŵapyunjisi ŵamfumu ŵonse aŵali mumusiko wafumu, ŵaliinamisye nekumucitila umucinsi Amani; pakuti ifyo efunde lyamfumu ilyapali ye. Sombi Modekai ye taamwinamisisye neli kumucitila umucinsi. 3Peŋka aŵapyunjisi ŵamfumu aŵali mumusiko wamfumu, ŵalilaŵile kuli Modekai ati: Mbanindo wapulaisisya ifunde lyamfumu? 4Lomba ili ŵalukwambala nakwe insiku syonse, naye nekuŵulo'kuŵomfwa, paliŵele ati ŵalimuŵulile Amani, mukuŵona kani ifyakwe Modekai fiŋgekala; pakuti ye aliŵaŵulile'kale ati ninemuJuda. 5Lomba Amani pakuŵona ati Modekai taalukunjinamisisya neli kuncitilo'mucinsi, eli akalipile Amani ukwakucila. 6Sombi ye alilaŋgulucile ati calukoso ukwikata Modekai eŋka: pakuti kale ŵamulanjisye aŵantu ŵakwe Modekai; pakuti pali fyefyo Amani alifwaile ukuŵonala aŵaJuda ŵonse aŵali muŵufumu ŵonse bwakwe Ekasyuilusi, eŵantu ŵakwe Modekai.
7Mumwensi wakutaŋga, emwensi waNisani, pamwaka wekumi naiŵili uwakwe Ekasyuilusi, ŵaliposele Puli, ecipa, pamenso akwe Amani insiku nansiku, nemwensi namwensi ukufika kumwensi wekumi naiŵili, ekumwensi waAdali. 8Popele Amani alilaŵile kumfumu Ekasyuilusi ati, Ekwali aŵantu ŵambi aŵapalaŋganisiwe nekuseleŋgana pakati paŵantu mutwalo tonse utwamuŵufumu bwenu; kaŵili amafunde aŵo niambi apusene naayo amuŵantu ŵambi ŵonse; kaŵili taŵalama amafunde amfumu, ŵaŵa; pakuti pali fyefyo takuli kwesyuko kumfumu ukuŵasumina ati ŵekale. 9Kani fikatemwesya imfumu ŋgaisumine ati palembwe ati ŵakonalwe; naneŵo eli ŋkaŵika amatalanto esilifa amasausande ikumi muminwe yaŵaŵo aŵalama imilimo yamfumu, ati akalundwe-mo mufilamino fyamfumu. 10Popele imfumu yalifumisye insalamo yaiyo kuminwe yaiyo, nekwipela kuli Amani umwana wakwe Amedata umwina-Agaji, umupate waŵaJuda. 11Nemfumu nayo nekulaŵila kuli Amani ati: Isilifa lyapelwa kuli weŵo, pamo neŵantu, ati muŵacitile'fyo ifyelelwe kuli weŵo.
12Eli ŵaŵetile aŵalembesi ŵamfumu pakasuŵa kekumi nasitatu, pamwensi wakutaŋga: peŋka palilembelwe koti nifyefyo fyonse ifi Amani afifundile ifilolo fyamfumu, neŵekalicisi ŵatwalo tonse, nefileme fyaŵantu ŵonse; kutwalo tonse koti malembo atuko, nakuli ŵo ŵonse aŵantu koti milaka yaŵo; mwisina lyamfumu Ekasyuilusi kwalilembelwe, kaŵili kwalicincilwe nensalamo yamfumu. 13Popele iŋkalata syalituminwe kuminwe yaŋkalamba mutwalo tonse twamfumu, ati ŵonale, ŵepaye, ŵaleŋgesye ukufwa, aŵaJuda ŵonse, aŵana neŵakulu, netwanice neŵanakasi, pakasuŵa kantu kamo, epakasuŵa kekumi nasitatu akamwensi wakuleŋga ikumi naiŵili, epamwensi waAdali; nakaŵili ati ŵapokolole ifintu fyaŵo fyonse, fyakutapwa. 14Lomba ukutuntulula kwamalembo, akweŵa'ti amafunde aŋgapelwa mutwalo tonse, kwalitulisiwe kuŵantu ŵonse, ati ŵaliansike ifyakasuŵa'ko. 15Iŋkalamba syaliile, ili siaŋgufisiwe kwifunde lyamfumu; nefunde nalyo lyalipelwe kuli ŵaŵo aŵali muSyusyani akatanino. Popele imfumu pamo naAmani ŵaliikele mukulukunwa; sombi umusi waSyusyani walikaŋkamicilwe.
Lamba Bible Version © United Bible Societies, 1959.