Esita 2
2
1Lomba panuma pali fyefyo, ili uŵukali bwamfumu Ekasyuilusi bwanaka, eli alaŋgulucile Fasiti, nafyefyo ifi acitile, nefunde'lyo ili yamucitile. 2Peŋka aŵapyunjisi ŵamfumu aŵo aŵalukwipyunjila ŵalilaŵile ati, Ŋgeŵanakasi aŵasice aŵaŵulombe ŋgaŵaifwayafwailwe'mfumu; 3nemfumu nayo ŋgaisalulule ifilolo mutwalo twaiyo tonse utwaŵufumu, ati filoŋganisisye aŵanakasi aŵasice v'onse aŵaŵulombe, fiŵafisye kuSyusyani kukatanino, kunanda yaŵanakasi, ŵalamwe kuli Kegai impemba yamfumu, uwakulama aŵanakasi; kaŵili nefintu fyaŵo ifyelelwe ukuliswesya nafyo ŋgafipelwe kuli ŵo: 4popele uyomoye uitemwesya imfumu ŋgaawe musanu pamupunda wakwe Fasiti. Peŋka ico-cintu calitemwesye imfumu; nayo nekucita fyopele'fyo.
5Lomba pali umbi umuntu umuJuda uwaikele muSyusyani mukatanino, uyo isina lyakwe niModekai, umwana wakwe Jaili, umwana wakwe Simyai, umwana wakwe Cisi, umwina-Benjamini; 6uwatapilwe ukumufumya kuJelusalemi nekupintwa pamo naŵakaili aŵatwitwe pamo naJekonya imfumu yaŵaJuda, iyo Nebukadinesa imfumu yakuBabiloni atwite. 7Naye alilelele Kadasa eEsita, umwana waŵamwinsyo ŵakwe; pakuti ye tawakwete neli niŵawisi neli niŵanyina; kaŵili moye uyo waŵulombe ukwakuti; peŋka pakufwa ŵawisi naŵanyina, niModekai ewamupokele ati ekale mwana wakwe umwine.
8Popele, ili ukufunda kwamfumu nefunde lyaiyo lyaumfwanicile, napakuloŋganisiwa ŵamoye aŵenji pamo muSyusyani mukatanino kuli Kegai, paliŵele ati Esita waliinjisiwe muŋanda yamfumu, mukulamwa kuli Kegai uwalukulama aŵanakasi. 9Kaŵili moye uyo alimutemwesye, naye kaapoka iŋkumbu kuli ye; naye nekwaŋgufya ukumupela ifintu fyakwe ifielelwe ukumuswesya, nefyakwaŵana fyakwe, pamo naŵamoye ŵasanu naŵaŵili aŵaelelwe ukupelwa kuli ye, aŵakufuma kunanda yamfumu; naye alimukusisye ye pamo naŵamoye aŵaŵyakwe nekuŵatwala kumupunda ucilile ukuwama muŋanda yaŵanakasi. 10Kansi Esita taaŋgafisulula aŵena ŵakwe neli ŵakwaŵaŵo; pakuti kale Modekai amufundile ati tekufifisulula. 11Popele Modekai alukupita insiku syonse pamenso aluŵansa lwakunanda yaŵanakasi, ati esiŵe ifilukwikala Esita, nafyefyo ifiŋgaŵa kuli ye.
12Lomba pakufika impindi yaŵamoye ŵonse umo umo mukwinjila kumfumu Ekasyuilusi, ili fyacitwa kuli ye koti lifunde lyakuŵanakasi, imyensi ikumi naiŵili, (pakuti efi syali insiku syakuliswesya ukufika kukukonsiwa kwasisyo, ekweŵa imyensi isanu naumo iyakusufya amafuta amola, nemyensi isanu naumo nayo nefinuncile ifyanse, pamo nafimbi ifintu ifiŵaswesya aŵanakasi), 13koti nimumu emo aisile moye kumfumu: ifintu fyonse ici aŋgafwaya ukuya naco ukufuma kunanda yaŵanakasi, calipelwe kuli ye ati aye naco kunanda yamfumu. 14Iciŋgulo aliile, lomba ŋgamailo alibwelele kunanda yaŵusiŵili iyaŵanakasi, mukulamwa kuli Syaasigasi, impemba yamfumu, iyalukulama aŵanakasi ŵamfumu; taainjile kumfumu liŵili, apakuŵulo'kumutemwa imfumu iine, naye nekwitwa kwisina lyakwe.
15Lomba pakufika impindi yakwe Esita, umwana wakwe Abikayili ŵamwinsyo ŵakwe Modekai, uwamupokele ati ekale mwana wakwe umwine, ati enjile kumfumu, ye taafwaile-po akantu sombi ceŋke'co ici asalulwile Kegai impemba yamfumu iyakulama aŵanakasi. Kaŵili Esita alipokele uwupaŋga kuli ŵaŵo ŵonse awalukumutamba. 16Fyopelefyo Esita alitwitwe kumfumu Ekasyuilusi kunanda yaiyo iyaŵufumu pamwensi wekumi, emwensi waTebeti, pamwaka waŵuisanu naiŵili uwakwikalika kwaiyo. 17Popele imfumu kaitemwa Esita ukucila napaŵanakasi ŵonse; naye kaapoka uluse newupaŋga pamenso aiyo ukucila napali fyefyo ifyaŵamoye ŵambi ŵonse; fyopele'fyo yalimutwicile pamutwi umuntinya waŵufumu, nekumwalula ati musanu pamupunda wakwe Fasiti. 18Eli imfumu yaficitile icitenje icikulu ifileme fyaiyo fyonse pamo neŵapyunjisi ŵaiyo, ecitenje cakwe Esita; kaŵili yalifundile ati kaŵe kasuŵa kakutusya mutwalo, nayo nekupela ifyakupa lukoso koti ŵuŵile bwamfumu.
19Peŋka pakuwuŋganisiwa aŵanakasi aŵasice impindi yaŵusiŵili, eyeyompindi Modekai aikele mumusiko wamfumu. 20Kansi Esita taaŋgawafisulula aŵakwaŵaŵo neli ŵena ŵakwe; koti nifyefyo ifi amufundile Modekai; pakuti Esita alimumfwile nekucita koti nifyefyo amufundile Modekai, koti nifyopele'fyo ifi acitile pampindi iyo akulile nakwe.
21Lomba pansiku isyo isi aikele mumusiko wamfumu Modekai, ifilolo fiŵili fyamfumu, Bigatana naTelesi, ifyapali ŵaŵo aŵalukulama umulyaŋgo, fyalikalipile, nekwesya ukwikata imfumu Ekasyuilusi. 22Lomba ici-ceŵo caliisiŵilwe kuli Modekai, uwacilanjisye kuli Esita umusanu; naye Esita nekwiŵula imfumu ifyaceco mwisina lyakwe Modekai. 23Lomba pakulukwipusisya ifyaceŵo ico, naco pakuŵoneka ati cacine, ŵoŵilo ŵalikulicilwe pamuti nekufwa; peŋka iceŵe'co calilembelwe mwibuku lyafyeŵo pamenso amfumu.
Lamba Bible Version © United Bible Societies, 1959.