Ifyacitilwe 23
23
1Naye Paulu alitontomekele peŵuŋgano, nekulaŵila ati: Mweŵakwasu, nalukwikala pamenso aŵaLesa nacimaŋga wonse uweme ukufika nakukasuŵa kalelo! 2Popele umupapatilisi umukulu, Ananaya, aliŵaŵulile aŵo aŵaimakene pali ye, ati mupameni pakanwa. 3Peŋka Paulu alilaŵile kuli ye ati: ŴaLesa ŵakakupama weŵo, weciŵumba icitufisiwe; uliikele mukusololola naneŵo koti kesiŵilo kamafunde, nawe nekuŵaŵula ukumpama ukwakupulaisya amafunde? 4Lomba aŵo aŵaimakenepo ŵalilaŵile ati: Ulukutoŋgala umupapatilisi umukulu waŵaLesa? 5Kumfwa Paulu ati: Nsiisiŵile, mweŵakwasu, ati uyu mupapatilisi umukulu; pakuti palilembelwe ati: Tekumwefya umwikalicisi waŵantu ŵenu!
6Sombi Paulu, ili aisiŵile ati aŵantu aŵo ŵambi ŵaSadukayo, ŵambi naŵo ŵaFalisi, aliŵilicisye mwiwuŋgano ati: Mweŵakwasu, neŵo ndi muFalisi, mwana waŵaFalisi; nipakuti paceŵo icakucetekela necakuŵuka kwaŵafwile, epo naitilwa-mo kuno! 7Ili alaŵile'fyo, kwaliŵucile nekupicisya aŵaFalisi neŵaSadukayo; neŵumba nalyo lyalilekene umupaka. 8Pakuti aŵaSadukayo ŵalalaŵila ati: Takuli-po ukuŵuka-po pamfwa, neli niŋkalamba yakwiulu, neli mupasi wonse, koku; sombi aŵaFalisi eŵafisumina fyonse'fyo. 9Popele paliŵucile nekuyoŵela ukukulu; naŵo ŵambi aŵalembesi ŵaŵaFalisi ŵaliimakene, nekulukulwa, nekulaŵila ati: Tatufibwene-po ifyakuŵifya neli cimo mumuntu uyu! Mbanindo kani mupasi walawila nakwe, neli niŋkalamba yakwiulu? 10Popele kwaliŵucile ukupikansyanya ukukulu; naco icilolo icikulu, pakuti calukutina ati ŵeŋgamusaŵala Paulu, califiŵulile ifita ati selukeni, mumupokolole kuli ŵo, mumwinjisye mwiliŋga.
11Popele paŵusiku ŵaSikulu ŵaliimakene pali ye, nekulaŵila ati: Saŋgalala; pakuti koti nifyopele'fyo ifi wansimicila kuJelusalemi, fyopele'fyo ukukwelelwe ukunsimicila naku Loma.
12Peŋka'po, pakuca, aŵaJuda ŵalifundene, nekupikana icipikwa ati tatukalya-po neli kunwa-po, ili tatuŋgamwipaya Paulu, 13Kaŵili aŵo aŵafundene ukwalika uko ŵali ŵantu aŵakucila napamakumi ane. 14Popele ŵaliile kuŵapapatilisi aŵakulu, nakuŵakulu, nekulaŵila ati: Fweŵo twapikana icipikwa icikulu ati tatukomfwa-po akakulya neli panini, ili tatuŋgamwipaya Paulu. 15Popele namweŵo pamo newewuŋgano muciŵule icilolo icikulu, ati ŋgacikamuselusisye kuli mweŵo, mweŵe ati tulukufwayo'kusololola bwino umulandu wakwe; peŋka fweŵo, iyo-mpindi yopele akapalamina, tukalukupembelele ukumwipaya.
16Sombi umwana ŵaŋkasi yakwe Paulu alifyumfwile ifyakuŵelama kwaŵo, nekuya-kwinjila mwiliŋga, nekumuŵula Paulu. 17Naye Paulu aliitile icilolo cimbi icafito'mwanda, nekulaŵila ati: Mumutwale umusaŋkwa uyu kucilolo icikulu, pakuti ali neceŵo icakuciŵula. 18Naco calimutwite, nekumufisya kucilolo icikulu, nekulaŵila ati: Paulu uyo-kaili wanjita, nekuŋgewa ukuleta umusaŋkwa uyu kuli mweŵo; ali neceŵo icakumuŵuleni. 19Naco icilolo icikulu calimwikete kuminwe, nekuya kumpelo mukumwipusya kumfiso ati: Mbacisa-ceŵo uli naco icakumbula? 20Naye ati: AŵaJuda ŵasuminina ukumulombeni ati mukamuselusisye Paulu kwiwuŋgano mailo ukweŵa ati tulukufwayo'kwipusya bwino ifyakwe. 21Sombi mwewo tekuŵasumina; pakuti ŵalukumuŵelamina aŵantu aŵakucila napamakumi ane, aŵapikene icipikwa icakuwulo'kulya-po neli kunwa-po, ili taŵaŋgamwipaya: lomba ŵukumo ŵalukupembelela nekucetekela ukusumina kwenu. 22Naco icilolo icikulu calimutumine umusaŋkwa uyo, ili camufundile ati: Tekuŵula aŵantu ŵonse neli umo ati wambula ifi-fintu. 23Peŋka califiitile ifilolo fiŵili ifyafito'mwanda, nekulaŵila ati: Loŋgeni ifita imyanda iŵili ukuyakufika kuKaisalia, nefyapali ŵakafwalo amakumi asanu naaŵili, nefyamafumo imyanda iŵili, pampindi yasitatu iyaŵusiku! 24Nekufiŵula ati filete nenama mukumwikalika-po Paulu, nekumufisya uŵutende kuli Felisi impemba.
25Kaŵili calilembele neŋkalata iyakuŵe'fi ati:
26Klodyo Lusya kumpemba Felisi iyo iweme makosa, mitende! 27Umuntu uyu aliiketwe kuŵaJuda; ŵalukufwayo'kumwipaya, ili naficile pamo nefita kuli ŵo, nekumupulusya; pakuti naliumfwile ati ye muLoma. 28Peŋka pakuti pakufwayo'kwisiŵa iceŵo ico ici ŵalukumupinjila, nalimuselusisye kwiŵuŋgano lyaŵo. 29Popele naliisiŵile ati alukusininwa ifyeŵo fyamafunde aŵo, sombi ati taasininwe ifyelelwe imfwa neli minyololo. 30Lomba, ili ŵambulile ati eko kuli ukwalika ukwakumuntu uyu, eli napulilila ukumutuma kuli mweŵo; nakaŵili nekuŵaŵula aŵakumusinina ati ŵakalaŵilile umulandu kuli mweŵo.
31Nafyo ifita fyalimupintile Paulu, nekumufisya uŵusiku kuAntipatilo, koti nifyopele'fyo ifi fyafundilwe, 32Sombi ŋgamailo fyaliŵalekele aŵapali ŵakafwalo ati ŵaye nakwe, ifine nekubwelela kwiliŋga. 33Naŵaŵo, ili ŵaficile kuKaisalia, nekwipela neŋkalata impemba, ŵalimufisisye naPaulu pamenso aiyo. 34Nayo, ili yaipendele, yalimwipwisye Paulu ati cisa-calo wafumine-ko. Lomba, pakwisiŵa ati ali wakucalo caCilica, 35yalilaŵile ati: Ŋkaumfwa umulandu woŵe, pakufika naŵaŵo aŵalukukusinina. Nayo yaliŵaŵulile aŵantu ati ŋgaalukulamwa mwilawililo lyakwe Elode.
Currently Selected:
Ifyacitilwe 23: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
