Ifyacitilwe 22

1Mweŵakwasu namweŵawisifwe, mumfwe ifyakulilaŵilila ifi ndukumuŵuleni!

2Popele, ili ŵaumfwile ati alukulaŵila kuli ŵo mumulaka waŵaEbeya, ŵalikutumene lukoso popo; naye ati:

3Neŵo ndi muJuda, uwafyalilwe muTaso uwamucalo caCilica, sombi nalisambile muno mumusi muceni cakwe Gamalyeli, nekufundwa koti mitondo ikatesye iyamafunde aŵawisifwe, nekwikala nemuŋkonsya kuli ŵaLesa, koti nifyopele'fyo ifi muli namweŵo mwense lelo. 4Nalukuŵapensya aŵaNsila iyi ukufika nakukuŵepaya, ili mbakaka nekuŵaloŵela mumakati neŵalalume neŵanakasi. 5Nefintu ifi kaŵili alansimicila umupapatilisi umukulu, pamo neŵakulu ŵonse. Kaŵili kuli ŵo nalipokele iŋkalata isyakuŵakwasu, nekwenda ukulukuya kuDamasiko, ati ŋkawakake aŵo aŵali-ko, mbalete kuJelusalemi, mukuŵacite'milandu. 6Paliŵele ati, pakulukwenda nekupalamina nakuDamasiko, akasuŵa pakati, lomba nekutuŵa ukukulu ukwafumine kwiulu kwalipulilile ukumbyatila. 7Nane naliwilile pansi, nekumfwa nesiwi lilukulaŵila kuli neŵo ati: Saulu, Saulu, mbanindo ulukuŋkululusisya? 8Nane naliasucile ati: Mbanimweŵanani, mweŵaSikulu? Naŵo ŵalilaŵile kuli neŵo ati: NineŵaYesu ŵakuNasaleti, aŵo ulukupensya. 9Kansi aŵo aŵo nali naŵo ŵalibwene icine ukutuŵa, sombi tawaumtwile-po isiwi lyaŵaŵo aŵalukulawila kuli neŵo. 10Neŵo ati: Ncite syani, mweŵaSikulu? Naŵo ŵaSikulu ŵalilaŵile kuli neŵo ati: Ima, ukenjile muDamasiko; mopele umo fikalaŵilwa kuli weŵo ifintu fyonse ifyansicilwe ati ukacite! 11Popele, pakuŵulo'kwisiŵo' kulaŵa pakuti paŵuleme bwakutuŵa uko, nalikulicilwe kuli ŵaŵo aŵo nali naŵo, nekwinjila muDamasiko. 12Peŋka umuntu umbi, Ananaya, utekenye koti mafunde, uwali nempupo isiweme kuŵaJuda ŵonse aŵalukwikalo'ko, 13aliisile kuli neŵo, nekwimakana pali neŵo, nekulaŵila kuli neŵo ati: Wemukwasu Saulu, upoke ukulaŵa koŵe! Impindi iyo yopele nalimubwene. 14Naye ati: WaLesa ŵaŵawisifwe eŵakusalulwile weŵo ati wisiŵe ukufwaya kwaŵo, uŵone Aŵo Awaluŋgeme, umfwe nesiwi lyakufuma mukanwa kaŵo. 15Pakuti ukaŵa nimboni yaŵo iyakuŵantu ŵonse ifyafyefyo ifi wabwene nekumfwa. 16Ŵukumo mbanindo ulukukokwela? Ima, uŵatisiwe, ufisambe ifyakuŵifya fyoŵe, ili ulilile'sina lyaŵo.

17Peŋka'po, ili nabwelele kuJelusalemi, pakulukutembela mwitempuli, nalilesucile, 18nekuŵaŵona ŵalukulaŵila kuli neŵo ati: Aŋgufya, ufume-mo bwaŋgu mujelusalemi, pakuti ŵakano'kupoka kuli weŵo ŵumboni ubwakuli neŵo. 19Kumfwa neŵo ati: MweŵaSikulu, aŵene ŵaliisi ati nalukuŵaposa mwikati, nekuŵapama mumasunagoge onse aŵo aŵacetekele kuli mweŵo. 20Kaŵili, pakupokomoka imilopa yakwe Stefano imboni yenu, naneŵo naliimakene-po nekusumina, nekulama nefyakufwala fyaŵaŵo aŵamwipeye! 21Naŵo ŵalilaŵile kuli neŵo ati: Koya, pakuti ŋkakutuma ukutali kuŵenafyalo!

22Naŵo aŵantu ŵalimumfwile ukufika nakwisiwi ilyo; eli ŵaŵilicisye, nekulaŵila ati: Mufumyeni mucalo uyumuntu, muŋgwa! telelwe ukwikala nemweo! 23Popele, pakuti ŵalukuŵilicisya, nekufula nefyakufwala fyaŵo, nekulukutukwila nekuŋgu mwiulu, 24icilolo icikulu califiŵulile ifita ati mwinjisyeni mwiliŋga, mulukumwipusisya pakulukumupama; ati njisiŵe iceŵo ici ŵalukumuŵilicisisya. 25Peŋka, ili ŵamukacile kunsiŋga, Paulu alilaŵile kucilolo cafito'mwanda icaimakene apo, ati: Kani ukumwelelweni mweŵo ukumupumoʼmuntu umuLoma, utaaŋgasininwa? 26Popele icilolo ico, ili caumfwile'fyo, caliile kucilolo icikulu, nekuciŵula ati: Mbamulukufwayo'kucite'ndo? Pakuti uyu-muntu muLoma! 27Peŋka necilolo icikulu caliisile nekulaŵila kuli ye ati: Umbule, kani uli muLoma? Naye ati: Inya! 28Popele icilolo icikulu caliasucile ati: Neŵo, pakwinjila mumukoka uyu, naliposele indalama isinji! Sombi Paulu ati: Sombi neŵo nalifyelwe ndi muLoma. 29Popele apo aŵo aŵalukufwayo'kumwipusisya ŵalifumine-ko kuli ye; kaŵili necilolo icikulu naco calitinine, ili caisiŵile ati ye muLoma, pakuti calimukacile.

30Sombi ŋgamailo, pakuti pakufwayo'kwisiŵa icine iceŵo ici ŵamupindile aŵaJuda, calimukakulwile, nekuŵaŵula aŵapapatilisi aŵakulu newewuŋgano ŵonse ati ŵaŵuŋgane; lomba calimuselusisye Paulu, nekumwikalika pamenso aŵo.

Currently Selected:

Ifyacitilwe 22: AAL59

Highlight

Copy

Compare