Ifyacitilwe 20

1Lomba, ili casilile icipupa, Paulu aliŵetile aŵasambile, nekuŵacenjesya; eli aŵalaile, nekukumbuluka ukuya kucalo caMakedonya. 2Popele, paku pita pamitala iyo, nekuŵacenjesyo' kwakuti aŵantu, alificile kucalo caŵaEla. 3Lomba, ili aikele kopele uko imyensi itatu, aŵaJuda ŵalimwalicile, pakufwaya ye ukwimo'lwendo mubwato ukuya kucalo caSilya; naye alilifundile ati ŋkabwelela-ko pansila iyamucalo caMakedonya. 4Popele Sopata uwakuBeloya, umwana wakwe Pulo, alimusindicisye ukufika nakucalo caAsya; naŵo aŵaTesalonike, Alisitako naSekundo; naGayo uwakuDabe, naTimote; neŵaŵakuAsya, Tuciko naTilofimo. 5Sombi aŵo eŵatanjile, nekutupembelela kuTilowa. 6Popele twaliimine ulwendo mubwato ukufuma kuFilipoi, pakusila insiku syafimpwampwa ifyakuwulo'musuŋga, nekufika kuli ŵo kuTilowa pansiku sisanu; kopele uko eko twaikele insiku sisanu nasiŵili.

7Popele pakasuŵa akakutatiko'muluŋgu, ili twawuŋgene mukukumala siŋkwa, Paulu alukwambala naŵo, ati akakumbuluke ŋgamailo; naye alitalimfisye ukwambala kwakwe ukufika napakati kaŵusiku. 8Kaŵili emo syali inyale isinji munande'yo iyapeulu, iyi twawuŋgene-mo. 9Kansi pakambeluka pali ikele umusaŋkwa umbi, isina lyakwe niYutuko, alilemenwe utulo. Peŋka, ili acambala nafimbi Paulu, alilemenwe utulo Yutuko, nekuponena pansi ukufuma kunanda iyaŵusitatu peulu, nekumwimyo' fwile. 10Naye Paulu aliselucile, nekwifunama pali ye, nekumufukatila, nekulaŵila ati: Mwicite'cipupa; pakuti umweo wakwe emo uli.

11Popele Paulu, ili aninine nekukumala siŋkwa nekulya, alukwambala naŵo impindi itali, ukufika nakumaca; fyopele'fyo alikumbulucile. 12Naŵo ŵalimuletele umusaŋkwa uyo mulaŵi, nekusaŋgalalo'kwakuti.

13Sombi fweŵo twalitanjile ukuya kubwato, nekwima ukulukuya kuAso, ati tukamupoke Paulu kopele uko: pakuti ifyo efi aansicile, ati akaye umwine pamutunta. 14Popele, ili atukumenye kuAso, twalimupokele, nekuya-kufika nakuMitulene. 15Pakufumo'ko, ŋgamailo twalificile ukusiŋkamana paCiyo; kaŵili ŋgamasesi nekusumpa-po lukoso paSamo; nakaŵili ŋgamasosi matali twalificile nakuMileto. 16Pakuti Paulu alilandakenye ukusesya Efesa, niŋgakokola mucalo caAsya; pakuti alukwendesya ati mbe nemakosa akulukuli kujelusalemi pakasuŵa kaPentekosite.

17Popele kuMileto, alitumine aŵantu kuEfesa mukuŵeta aŵakulu aŵamwikelesya. 18Peŋka, ili ŵaisile kuli ye, alilaŵile kuli ŵo ati:

Mweŵo mweŵene muliisi, ukufuma kukasuŵa ako nanyantile mucalo caAsya, ifyakwikala kwanji uku nali namweŵo impindi yonse, 19ili mbapyunjila ŵaSikulu nekulicefya ukwamumutima, neminsosi, nefyakwesya ifyamponene pakuti pakwalika kwaŵaJuda: 20ati nsinatinine-po ukumuŵulisisyeni ifintu fyonse ifyesyuko, nekulukumusambisyeni apaswetele, namumananda onse, 21ili ndondolosya kuŵaJuda nakuŵaEla ukulapila kuli ŵaLesa, nekucetekela kuli ŵaSikulu ŵesu Yesu Klistu. 22Ŵukumo ŵoneni, ndukuya ukacilwe muMupasi kujelusalemi, newakuŵulo'kwisiŵa-po ifintu ifyo ifikesa kuli neŵo kopele uko; 23sombi ati Umupasi Uswetelele ulukunsimicila mumisi yonse, ati ifyakukaka nemapensyo alukumpembelela. 24Sombi nsilukuweŵa kantu umweo wanji ati euntemenwe, ati ŋkesiŵe ukukonsya ulwendo lwanji, nemilimo iyo napokele kuli ŵaSikulu Yesu, iyakusimika leeŵo Iciweme icaluse lwaŵaLesa. 25Ŵukumo ŵoneni, ndiisi ati mweŵo mwense, muli mweŵo emo nalukwenda-enda ili ntulisya Uŵufumu, tamukambona-po liŵili pamenso. 26Pakuti pali fyefyo ndukusimika kuli mweŵo lelo, ati nsikwete neli keŵo akamilopa yaŵantu ŵonse. 27Pakuti nsinatinine-po ukumuŵuleni amafunde aŵaLesa onse. 28Kamucenjela mweŵo mweŵene, nakaŵili pakuti petaŋga lyonse, muli Iyelyo emo wamwikalicileni ŵucilolo Umupasi Uswetelele, mukuteŵeta ikelesya lyaŵaLesa, ilyo ili ŵaulile kumilopa yaŵo aŵene. 29Ndiisi ati, pakufuma-po neŵo, imimbulu ikali ikenjila pakati pali mweŵo, itaikalileka itaŋga. 30Nakaŵili pali mweŵo mweŵene pakema aŵantu aŵakalukulaŵila ifintu ifisendeme, mukuwoŋgola aŵasambile ati ŵaŵalonde. 31Pakuti pali fyefyo, mulukulaŋga-laŋga, nekulukulaŋguluka ati imyaka itatu nsinalekele ukulukuŵacenjesya ŵonse paŵusiku napakasuŵa neminsosi. 32Pano ndukumusisyeni kuli ŵaLesa nakwisiwi lyaluse lwaŵo, iliisi ukumwiŵakeni, nekumupeleni uŵupyani pamo naŵaŵo ŵonse aŵaswesiwe. 33Nsinali newuŋkumbwa bwakwisilifa neli ligolide neli fyakufwala ifyaŵantu ŵonse neli umo. 34Mweŵo mweŵene muliisi ati iminwe iyi yalukuntaŵataŵilila ifyakupeŋga kwanji, nefyaŵaŵo aŵo nali naŵo. 35Mufintu fyonse nalimupeleni icakutuntulula-mo, ati, pakupyunjisya ukwakuŵe'fyo, ukumwelelweni ukulukuŵofwa-ko aŵafila, nekulaŋguluka amasiwi aŵaSikulu Yesu, ayo ŵalaŵile aŵene ati: Ukupela kuli nesyuko ilyakucila napakupoka.

36Popele, ili alaŵile'fyo, alifukeme, nekutembela naŵo ŵonse. 37Popele ŵonse ŵalililile ukwakuti, nekulukumukumbete Paulu mumukosi, nekulukumufyonta, 38ili ŵaŵombomana tanje cine pakuti pesiwi ilyo alaŵile ati: Tamukambona-po liŵili pamenso. Naŵo ŵaJimusindicisye ukumutwala kubwato.

Currently Selected:

Ifyacitilwe 20: AAL59

Highlight

Copy

Compare