Ifyacitilwe 19

1Paliŵele ati, ili aciikele Apolo kuKolinto, Paulu, pakupita pacalo icakuntulo, alificile kuEfesa, nekusaŋgana neŵasambile ŵambi: 2nekuŵepusya ati: Mwalipokele Umupasi Uswetelele ili mwacetekele? Naŵo ŵalilaŵile kuli ye ati: Koku, tatwaumfwile neli panini ati epo uli Umupasi Uswetelele. 3Naye ati: Kansi nimundo mwaŵatisisiwe? Naŵo ati: Mukuŵatisya kwakwe Yoane. 4Kumfwa Paulu ati: Yoane alukuŵatisya nekuŵatisya ukwakulapila, ili alaŵila kuŵantu ati: Ukwelelwa ukucetekela muli woyo ukesa munuma yanji: wopele eŵa Yesu. 5Peŋka, ili ŵafyumfwile'fyo, ŵaliŵatisiwe mwisina lyaŵaSikulu Yesu. 6Lomba, ili aŵatintile-po Paulu iminwe yakwe, Umupasi Uswetelele waliisile pali ŵo; naŵo ŵalukulaŵila nemini, nekulukusimika. 7A ŵo ŵonse pamo ŵali aŵantu ikumi naŵaŵili.

8Naye aliinjile mwisunagoge, nekulukulaŵilisya nemutima ukosele imyensi itatu, ili apicisya nekulukuŵatekenesya ifyafintu fyaŴufumu bwaŵaLesa. 9Sombi, pakukosa mumitima nekulukupulaisya ŵambi aŵantu, nekulukutoŋgala lnsila pamenso amaŵumba aŵantu, alifumine kuli ŵo, nekuŵalekanya aŵasambile, nekulukupicisya insiku nansiku mwisukulu lyakwe Tulano. 10Ifyo fyalicitilwe imyaka iŵili; fyopele'fyo ŵonse aŵalukwikala mucalo caAsya, aŵaJuda neŵaEla, ŵaliumfwile lsiwi lyaŵaSikulu. 11Kaŵili ŵaLesa ŵalicitile ifimpelampela ifyakucila, muminwe yakwe Paulu; 12fyopele'fyo ŵalitwite kuŵalwasi ifitambala netwakufwalila utwafulile kumuŵili wakwe; nao amalwasi nekuŵaleka, nemipasi iŵipile nekufuma-mo.

13Sombi ŵambi aŵaJuda aŵakwenda-enda, aŵalaye, ŵaliikete imilimo iyakusimbula isina lyaŵaSikulu Yesu pali ŵaŵo aŵali nemipasi iŵipile, nekulaŵila ati: Ndukukufunda kuli ŵaYesu, aŵo aŵa atulisya Paulu! 14Kaŵili eko ŵali aŵana ŵasanu naŵaŵili aŵalalume ŵamuntu umbi Sikefa, umuJuda, umupapatilisi umukulu, aŵacitile'fyo. 15Popele umupasi uŵipile waliŵaasucile ati: WaYesu ndiŵesi, naPaulu naye ndimwisi! Sombi mbamweŵo nimweŵani? 16Popele umuntu uyo uwali nemupasi uŵipile, alifukucile pali ŵambi ŵaŵili, nekuŵacila ŵoŵilo amakosa, nekuŵanasya, fyopele'fyo ŵaliŵutucile kunanda iyo ubwalondwa, nefiweŋga. 17Lomba ifyo fyalisiŵilwe kuŵantu ŵonse, aŵaJuda neŵaEla, aŵalukwikala muEfesa; naŵo ŵonse ŵaliŵele nemwenso, nesina lyaŵaSikulu Yesu nalyo lyalikusiwe. 18Nakaŵili ŵambi naŵo aŵenji, aŵacetekele, ŵaliisile ili ŵafisulula nekuŵulisisya ukucita kwaŵo. 19Naŵambi aŵenji aŵakuŵuka ŵaliloŋganisye amabuku aŵo, nekuoca pamenso aŵantu ŵonse; popele ŵalipendele umuulo wao, nekuŵona ati nindalama syesilifa amasausande amakumi asanu. 20Fyopele'fyo lsiwi lya ŵaSikulu lyalikulile makosa nekucila.

21Pakusile'fyo-fintu, Paulu alifwaile mumutima ati, pakupita pafyalo fyaMakedonya naAkaya, ŋkaye kuJelusalemi; nekulaŵila ati: Ili ŋkapito'ko, fikelelwa neŵo ukuŵona naLoma. 22Lomba, ili atumine kuMakedonya ŵambi ŵaŵili aŵalukumupyunjila, Timote naElasito, ye umwine alisyele impindi mucalo caAsya.

23Impindi iyo caliŵucile necipupa icikulu icapaNsila. 24Pakuti umbi umuntu uwailicilwe ati niDemetilo, umufusi wesilifa, uwalukufula utuluŵi utupalene Atemi, aliletele imilimo iinji kuli ŵamasili: 25aŵo aliwawuŋgenye pamo neŵantu aŵamilimo yopele'yo, nekulaŵila ati:

Mweŵame, muliisi ati fweŵo tulaŵa nemaŵoni esu pakuti pamilimo iyi. 26Kaŵili mulukuŵona nekumfwa ati takuli kweŋka kuEfesa, sombi monse mucalo caAsya ukusyala-ko panini, uyuPaulu atekenesya nekwalucila aŵantu aŵenji, ili alaŵila ati aŵo aŵacitilwe kuminwe taŵali niŵalesa. 27Lomba taili milimo yesu veŋka ilukupalamina ukupufiwa; sombi netempuli lyakwe lesa umwanakasi umukulu Atemi likaŵa lyalukoso; nakaŵili umwine akasulwa kuŵuleme bwakwe, uyo ŵonse aŵamucalo caAsya neŵamucalo conse icapansi eŵacindika.

28Popele, ili ŵafyumfwile'fyo, ŵalikalipile ukwakuti, nekuŵilicisya ati: Atemi waŵaEfesa emukulu!

29Popele nemusi wonse waliŵele nekupiliŋgana; neŵantu ŵaliŵutucile nemutima umo kuluŵansa, ili ŵaŵekete Gayo naAlisitako, aŵaMakedonya, aŵalwendo aŵaŵyakwe Paulu. 30Popele, ili alukufwaya Paulu ukwinjila kuŵantu, aŵasambile taŵamusumine. 31Nakaŵili naŵambi, ifilolo ifikulu ifyamucalo caAsya, ifiŵusa fyakwe, fyalitumine aŵantu kuli ye, nekumukombetela ati tekulukulitakatila muluŵansa. 32Pakuti pali fyefyo ŵambi ŵalukuŵilicisya fimbi, ŵambi naŵo fimbi nafyo: pakuti iŵumba ilyo lyalipiliŋgene; naŵo aŵenji aŵakucila taŵaciisiŵile-po iceŵo iciŵaŵuŋganine-po. 33Peŋka ŵalimufumisye Alecisanda mwiŵumba, aŵaJuda eŵamusindicile-ko. Popele Alecisanda alicilicile kukuŵoko ati ndilaŵilile kuŵantu. 34Sombi ili ŵabwene ati ye muJuda, ŵonse ŵalukuŵilicisya nesiwi limo ukupisya impindi siŵili ati: Atemi waŵaEfesa emukulu!

35Peŋka, ili alikalicile icisinsi iŵumba, umulembesi wamumusi alilaŵile ati: Mweŵantu ŵakuEfesa, mbawisamuntu utesi ati umusi waŵaEfesa eulame'tempuli lyakwe Atemi uyo umukulu, nacikaluŵi ico icaponene kuli Seu? 36Pakuti ifi-fintu tafiisi ukuleŋgululwa, ukumwelelweni ukulukwikele celele, nekuŵulo'kucito'ŵuluya neli panini! 37Pakuti mwaleta aŵantu aŵa, aŵataŵali ŵaŋo ŵamumatempuli, neli ŵakucoŵola lesa wesu umwanakasi. 38Pakuti pali fyefyo, kani Demetilo naŵamasili aŵo ali naŵo ŵali nemulandu pamuntu umbi, lomba kufilye kuliiswilwe, neŵakusololola naŵo eko ŵali; ŋgawasininansyanye! 39Sombi kani mulukufwaya akantu akafyeŵo fimbi nafyo, kakasolololwa mwiwuŋgano lyansiku syonse. 40Pakuti icine tulukulikulika mukusininwa pakuti pacipupa calelo, pakuti tapali iceŵo icakucicitila-po; nakaŵili ifyacici tatukesiŵa ukuŵulisisya bwino iŵumbe'li. 41Popele, ili alaŵile'fyo, alipalaŋgenye iŵumba.

Currently Selected:

Ifyacitilwe 19: AAL59

Highlight

Copy

Compare