Ifyacitilwe 17

1Ili ŵapitile paAmfipoli naApolonya, ŵalificile nakuTesalonike, uko eko lyali nesunagoge lyaŵaJuda. 2Naye Paulu, koti kwisiŵila kwakwe, aliinjile muli ŵo, nekulukupicisya naŵo ifyamumalembo utusuŵa twasabata tutatu, 3ili aŵulisisya, nekuŵaŵula ati ukuŵelelwa ŵaKlistu ukusomenwa, nekuŵukapo liŵili paŵafwile; nakaŵili ati: AŵaŵaYesu aŵa ndukutulisya kuli mweŵo niŵaKlistu. 4Popele ŵambi naŵo ŵalitekenesiwe, nekukumaŋkana naŵaPaulu naSilasi; nakaŵili neŵumba ilikulu ilyaŵaEla aŵatekenye, neŵanakasi aŵacindeme aŵenji. 5Sombi aŵaJuda ŵaliŵele necikani, nekuŵapoka ŵambi aŵoŋgwa aŵakuŵantu ŵalukoso, nekuŵuŋganya iŵumba, nekucite'cipupa icikulu mumusi; naŵo ŵaliŵuŋgulucile kunanda yakwe Yasoni, nekwesya ukuŵafumisya pamenso aŵantu. 6Lomba, ili taŵaŵabwene-po, ŵalimukulumwine Yasoni newana-ŵaŋkasi ŵambi pamenso ampemba syamumusi, ili ŵaŵilicisya ati: Aŵo aŵaalwile icalo conse icapansi ŵaliisile nakukuno konse; 7ŵopele aŵo Yasoni aliŵapokele; aŵa ŵonse ŵalukupulaisya amafunde akwe Kaisa, nekulaŵila ati: Epo ili imfumu imbi, eYesu! 8Peŋka neŵumba lyaŵantu nempemba syamumusi syaliŵele nekamanamu, pakufyumfwe'fyo-fintu. 9Lomba, ili ŵapokele umukole kuli Yasoni naŵambi naŵo, ŵaliŵakakulwile.

10Popele apo awana-ŵaŋkasi ŵalipulilile ukutuma Paulu na Silasi uŵusiku kuBeloya; naŵo, ili ŵafidie uko, ŵaliinjile mwisunagoge lyaŵaJuda. 11Sombi aŵaJuda aŵo ŵali nemucinsi uwakucila napali ŵaŵo aŵakuTesalonike, pakuti ŵalipokele lsiwi nemitima iyansicilwe, ili ŵasalala amalembo insiku nansiku, ukwesya ati kani ifi-fintu fyacine. 12Pakuti pali fyefyo, aŵenji ŵalicetekele; nakaŵili neŵanakasi aŵaEla aŵamucinsi aŵacindeme, neŵalalume aŵenji. 13Sombi aŵaJuda aŵakuTesalonike, ili ŵaisiŵile ati lsiwi lyaŵaLesa lilukutulika kuli Paulu nakuBeloya nako, ŵaliile uko naŵo, ili ŵasuŋgwila nekwakatasya amaŵumba aŵantu. 14Peŋka aŵana-ŵaŋkasi ŵalipulilile ukumutuma Paulu ati akafike nakucisiŵa; sombi Silasi naTimote waciikele kopele uko. 15Sombi aŵo aŵamutanjilile Paulu, ŵalimufisisye nakuAtenai; popele, ili ŵapokele ifunde ilyakuli Silasi naTimote ati ŋgawese bwaŋgu kuli ye, ŵalikumbulucile.

16Kansi naPaulu, pakulukuŵapembelela kuAtenai, umupasi wakwe walikalipile muli ye, pakuŵono'musi uliiswile ifiŵumbwaŵumbwa. 17Fyopele'fyo alukupicisya mwisunagoge neŵaJuda neŵantu aŵatekenye, napaluŵansa ulwakuulila-po insiku syonse naŵaŵo aŵo alukukumana naŵo. 18Popele naŵambi aŵaEpikuleyo neŵaSitoici aŵatemenwe amano ŵalikumene nakwe. Popele ŵambi ati: Mboyu-waŵulaka, aŋgalawile'ndo? Naŵambi ati: Alukuŵoneka koti wakutulisya ŵalesa aŵensu! pakuti alukusimika ŵaYesu nekuŵuka kwapamfwa. 19Naŵo ŵalimwikete, nekumutwala kuAleopage, nekulaŵila ati: Twisiŵe uŵusambisi uŵu ubwaŵukumo, uŵulukulaŵilwa kuli weŵo? 20Pakuti ulukuleta kumatwi esu fimbi ifintu ifyaŵukumo; lomba tulukufwayo'kwisiŵa ati mbefi fyasyani. 21(Pakuti aŵaAtenai ŵonse neŵensu aŵalukwikala mopele umo ŵalukupisye'mpindi yaŵo yonse ukulaŵila nekumfwa fimbi ifintu ifyaŵukumo, temufyeŵo fimbi koku.)

22Naye Paulu aliimakene mukati muAleopage, nekulaŵila ati:

Mweŵantu ŵakuAtenai, pafintu fyonse naŵona ati muli ŵakupupa; 23pakuti, pakupitana nekuŵona ifyo-fintu ifi mupupa, nasaŋga neconto icali nemalembo aya, ati: KULI LESA UTESIŴILWE. Pakuti pali fyefyo, aŵo aŵa mucindika, mweŵakuŵulo'kwisiŵa, ŵopele aŵo ndukubwenesya kuli mweŵo. 24ŴaLesa awaleŋgele icalo conse nefintu fyonse ifilimo, aŵo, pakuti niŵaSikulu ŵamwiulu napansi pano, taŵekala-mo mumatempuli aiŵekwe kuminwe; 25neli kutaŵataŵilwa kuminwe yaŵantu, koti ŵakupeŋgele'fintu: pakuti aŵene ŵalafipela fyonse umweo nekupema nefintu fyonse; 26nakaŵili ŵalileŋgele kuli umo imikoka yonse yaŵantu, ati ŵekale ponse pacalo capansi, ili ŵaansicile impindi syaŵo nemipaka yakwikala kwaŵo; 27ati ŋgaŵaŵafwaya-fwaye ŵaLesa, nekuŵapampantila, nekuŵaŵona, naŋgawa ati taŵali ukutali nakuli fweŵo fwense. 28Pakuti muli ŵo emo tulukwikala, nekulukwenda, nekulukuli neŵumi; koti nifyefyo ifi ŵalaŵile aŵatatwisi ŵenu ŵambi ati: Pakuti nafweŵo nifweŵakamufyalwa ŵaŵo! 29Popele, pakuti nifweŵakamufyalwa ŵaŵaLesa, tekwelelwa fweŵo ukulukulaŋguluka ati ŵuLesa ŵuli koti ligolide, neli lisilifa, neli libwe, iliŵasilwe nemano nekucenjela kwaŵantu. 30Popele ŵaLesa ŵalisisulile impindi syakuŵulo'kwisiŵa; sombi ŵukumo ŵalukuŵafunda aŵantu ŵonse aŵaponse-ponse ati ŋgaŵalapile; 31pakuti ŵaliansicile akasuwa ako ŵakasololola-mo neŵamucalo ukuluŋgeme kumuntu uyo uyu ŵasalulwile; ifyo ŵalilaile kuŵantu ŵonse, ili ŵamuŵusisye paŵafwile.

32Popele, pakumfwa ifyakuŵuka kwaŵafwile, ŵambi ŵaliwelele; sombi ŵambi naŵo ati: Tukakumfwa liŵili ifyafifi. 33Fyopele'fyo Paulu alifuminemo muli ŵo. 34Sombi ŵambi aŵantu ŵalimukoŵamine, nekucetekela; mwiŵumba lyaŵo emo ŵali Ndionusyo umuAleopage, nemwanakasi umbi uwailicilwe ati niNdamali, naŵambi naŵo pamo.

Currently Selected:

Ifyacitilwe 17: AAL59

Highlight

Copy

Compare