Ifyacitilwe 16

1Kaŵili alificile nakuDabe nakuLusiala; lomba kopele uko kwali umusambile umbi, isina lyakwe niTimote, umwana wamwanakasi umuJuda uwalukucetekela, sombi ŵawisi ŵaEla; 2uyo wali nempupo isiweme kuŵanaŵaŋkasi aŵakuLusiala nakulkonya. 3Uyo-ye Paulu walukufwayo'kulukwenda nakwe. Popele alimupokele, nekumukopola, pakuti paŵaJuda aŵali kopele uko; pakuti ŵonse aŵo ŵaliisiŵile, ati ŵawisi ŵaEla. 4Pakulukupitana ili ŵenda pamisi, ŵaliŵafundile aŵantu nemafunde ayo asalulwilwe kuntanjisi neŵakulu aŵakuJelusalemi, ati ŵalukwalonda. 5Fyopele'fyo amakelesya alikosiwe mukucetekela, nekufula aŵantu aŵenji insiku nansiku.

6Popele apo ŵalipitile ponse pacalo caFiluja necaGalatya, pakuti pakukanisiwa kuMupasi Uswetelele, ati: Tekulaŵile'Siwi mucalo caAsya. 7Peŋka pakufika ukusiŋkamene kucalo caMisya, ŵaliesesye ukuya kucalo caBitunya; sombi Umupasi waŵaYesu tawaŵasuminisye. 8Popele ŵalipitile paMisya, nekufika kuTilowa. 9Peŋka ukuŵoneka kwalibwenekele kuli Paulu uŵusiku: Paliimakene umuntu uwakucalo caMakedonya alukumukombetela ati: Kamwisa kuMakedonya, mukatofwe-ko! 10Lomba, ili abwene uku ŵoneka, twalipulilile ukwesyo'kuya kucalo caMakedonya, pakuti pakucetekela ati ŵaLesa ŵatwita ati tukatulisye leeŵo Iciweme kuli ŵo.

11Peŋka'po, pakufuma kuTilowa, katuya mubwato munsila iluŋgeme, nekufika kuSamotilake; popele ŋgamailo nakuNeapoli. 12Ukufumo'ko katuya nakuFilipoi, umusi wakuMakedonya uwakucila uŵukulu napali yo yonse iyapamitala iyo, uwatusucile ukufuma kucalo caŵaLoma; popele twaliikele mumusi mulya simbi insiku. 13Lomba pakasuŵa kasabata twalifumine-mo mumusi nekuya pambali yanika, apo twacetekele ati epo pali apakutembelela; peŋka twaliikele pansi, nekwambala neŵanakasi aŵaŵuŋgene. 14Popele nemwanakasi umbi, isina lyakwe niLudya, uwalukuulisya ifikasicile, uwakumusi waTuatelya, umuntu uwalukucindika ŵaLesa, wali tumfwile; lomba ŵaSikulu ŵalimwiswilepo pamutima wakwe, ati alukukutika ifintu ifyo ifyalaŵilwe kuli Paulu. 15Peŋka, pakuŵatisiwa ye newamuŋanda yakwe, alitukombetele ati: Kani mwaŋgesya ati nditekenye kuli ŵaSikulu, mwinjile muŋanda yanji, mulukwikele. Naye alitukakatisye.

16Pakulukuya fweŵo uko ukwakutembelela, paliŵele ati moye umbi, uwali nemupasi uwakusimika, alitukumenye; uyo alukunoŋkela ŵaŵisikulu amaŵoni aenji, pakuti pakusimika; 17wopele alukutulonda fweŵo naPaulu, ili aŵilicisya ati: Awantu aŵa ŵapyunjisi ŵaŵaLesa Aŵo Aŵacilile, ŵalukumutulisisyeni insila yakupulusya. 18Kaŵili alukucite' fyo insiku isinji. Sombi Paulu aliŵele nensoni ukwakuti, nekwaluka, nekulaŵila kumupasi uyo ati: Ndukukufunda, mwisina lyaŵaYesu Klistu, ati ufumemo muli ye! Nawo walifumine-mo impindi iyo yopele.

19Sombi ŵawisikulu, pakuŵona ati icakutunoŋkela amaŵoni casila, ŵaliŵekete Paulu naSilasi, nekuŵakulila kumupunda uwakuulila-po kumpemba. 20Popele, pakuŵatwala kuŵakusololola, ŵalilaŵile ati: Aŵantu aŵa, aŵaJuda, ŵalukukatasyo'kwakuti umusi wesu, 21nekulanjisya ukwisiŵila uko takwelelwe fweŵo ukupoka, neli kukulonda, fweŵaLoma. 22Popele neŵumba lyaŵantu lyaliŵemine; neŵakusololola naŵo ŵaliŵakwamawilile nefyakufwala fyaŵo ukuŵafula, nekuŵula aŵantu ati ŵapameni kundondo. 23Peŋka, ili ŵaŵapamine ifinji, ŵaliŵaposele mwikati, nekumuŵula kalama wamwikati ati aŵalamisye. 24Naye, pakumfwa ukuŵulo'ko, aliŵaposele mucipinda icamukati kekati; nekuŵakacisya amolu aŵo mumakusu.

25Sombi, pakati kaŵusiku, Paulu naSilasi ŵalukutembela nekwimbe'nyimbo kuli ŵaLesa; naŵakaili naŵo ŵalukuŵakutika. 26Lomba necitulika icikulu calipulilile ukwisa, fyopele'fyo ifyapansi ifyakwikati fyailieŋkene. Impindi iyo yopele, napamilyaŋgo yonse paliiswilwepo, nefyakuŵakaka aŵo ŵonse fyalikakulucile. 27Peŋka kalama, ili aŵucite mutulo, nekuŵona ati pamilyaŋgo yakwikati paliisucile, alisomwene impoko yakwe, ati ndiipaye, pakuti pakweŵa ati ŵakaili ŵafyuka. 28Sombi Paulu aliŵilicisye nesiwi'likulu ati: Wilisomesya, pakuti epo tuli fwense. 29Popele aliŵaŵulile ati leteni inyale, nekusotokelamo nekuwila pansi pamenso aŵaPaulu naSilasi, ili atutuma pakuti pamwenso; 30nekuŵafumya-mo, nekulaŵila ati: Mweŵasikulu, ncite syani ati mpuluke? 31Naŵo ati: Ulukupema-mo muli ŵaSikulu Yesu, eli ukapuluka, weŵo neŵamuŋanda yoŵe. 32Naŵo ŵalilaŵile lsiwi lyaŵaSikulu kuli ye nakuli ŵaŵo ŵonse awamuŋanda yakwe. 33Naye impindi iyo yopele iyaŵusiku aliŵapokele, nekuŵasamfya nemikakambo yaŵo; nekuŵatisiwa, ye umwine neŵantu ŵakwe ŵonse, impindi iyo yopele. 34Naye aliŵenjisye muŋanda yakwe, nekuŵatekela nefyakulya, nekulukusembo'kwakuti, pamo newamuŋanda yakwe ŵonse, ili ŵacetekele muli ŵaLesa.

35Sombi, pakuco'ŵusiku, aŵakusololola ŵalifitumine ifilolo, nekulaŵila ati: Muŵakakulule aŵantu aŵo! 36Peŋka kalama alimuŵulile Paulu amasiwi ayo, nekulaŵila ati: Aŵakusololola ŵatuma aŵantu mukumukakululeni; fumeni-mo lomba, mulukuya neŵutende. 37Sombi Paulu alilaŵile kuli ŵo ati: Ŵalitupamine apaswetele, nekutufumbucila lukoso, fweŵaLoma, nekutuposa mwikati: kansi ŵukumo ŵalukutufumya kumpelo? Fwewaswe! Sombi ŋgawese aŵene, ŵatufumye! 38Popele ifilolo fyaliŵaŵulile aŵakusololola amasiwi ayo: naŵo ŵalitinine pakumfwa ati ŵaLoma. 39Naŵo ŵaliisile, nekuŵakombetela: lomba, pakuŵafumya, ŵaliŵakombetele ati fumeni-mo mumusi muno. 40Ŵo ŵalifumine-mo mwikati, nekwinjila mwa Ludya; popele, ili ŵaŵabwene aŵana-ŵaŋkasi, ŵaliŵasaŋgalesye, nekukumbuluka.

Currently Selected:

Ifyacitilwe 16: AAL59

Highlight

Copy

Compare