1 Aŵakolinto 14

1Kamulondo'ŵutemwe; sombi kaŵili kamwesyo'kwakuti ukuŵa nefintu ifyakuMupasi: tanje cine ati mukasimike. 2Pakuti uyo, ulaŵila nelumini, taalaŵila kuŵantunsi, sombi alalaŵila kuli ŵaLesa; pakuti tapali-po uumfwisya; sombi mumupasi alalaŵila ifyamfiso, 3Sombi uvo usimika, alalaŵila kuŵantunsi ukuŵeŵaka nekuŵacenjesya nekuwasaŋgalasya. 4Uyo ulaŵila nelumini, alaliiŵaka umwine; sombi uyo usimika alaliiŵaka ikelesya. 5Kansi niŋgafwaya ati mwense mukalaŵile nemini; sombi tanje cine ati mukasimike; nakaŵili uyo usimika alicilile uŵukulu napali woyo ulaŵila nemini, kani tesi aŵulisisye, ati lipoke ukwiŵakwa ikelesya.

6Pakuti pali fyefyo, mweŵakwasu, kani ŋkese kuli mweŵo ukulukulaŵila nemini, ŋkamuwamyeni syani, kani tesi ŋkalaŵile kuli mweŵo, neli nipakufisulula, neli nipafyakwisiŵa, neli nipakusimika, neli nipakusambisya? 7lfintu ifyakuŵulo'mweo, kani musembe kani bwesela, ifilila, kani tafilekanya imisaŋgo yafiko, mbasyani fiŋgesibwa ifi ŵalisya pamusembe kani nipabwesela? 8Pakuti kani ulupeŋga lulile nemusaŋgo utawisibwa, mbaninani uŋgaliansika mukulukulwa? 9Fyopele'fyo namweŵo, kani tesi mulaŵile nelumini amasiwi akumfwanika bwaŋgu, ifyo ifilaŵilwe fiŋgesibwa syani? Pakuti, kani nifyefyo, muŋgekala ŵakulaŵila muli kaŵesya.

10Emo ili mucalo, cipale, imilaka imikoka namikoka; kaŵili tapali-po neli umo uwakuŵulo'kumfwanika. 11Kani lomba nsiisi ifi weŵa umulaka, ŋkaŵa mwinafyalo kuli woyo ulukulaŵila, nawoyo ulukulaŵila naye akaŵa mwinafyalo kuli neŵo. 12Fyopele'fyo namweŵo, pakuti mulukwesyo'kuŵa nefyaMupasi, kamufwaya ifyakwiŵake'kelesya, ati mukafule ukwakuti, 13Pakuti pali fyefyo uyo ulaŵila nelumini ŋgaatembele ati akaŵulisisye. 14Pakuti kani ntembele nelumini, mupasi wanji eutembela; sombi akalaŋgo kanji takekata-po ifisepo. 15Nindo lomba? Ŋkatembela nemupasi; sombi kaŵili ŋkatembela nakukalaŋgo. Ŋkemba nemupasi; sombi kaŵili ŋkemba nakukalaŋgo. 16Kani ifyo tefyo, kani ulukucindika nemupasi, umuntu uyo ulukwikala pamupunda wamuntu utaasambisiwe, mbasyani aŋgalaŵila ati Ameni, pakutota weŵo, pakuti ifi ulukulaŵila weŵo taafiisi-po? 17Pakuti icine ulukutota bwino; sombi uyo umbi taalukwiŵakwa, yo. 18Ndukutota ŵaLesa pakuti ndalaŵila nemini ukwakucila napali mweŵo mwense: 19naŋgawe'fyo mwikelesya ndukufwayo'kulaŵila amasiwi asanu nekalaŋgo kanji, ati mbafunde naŵambi, ukucila napakulaŵila nelumini amasiwi amasausande ikumi.

20Mweŵakwasu, mumitima yenu tekuŵa muli ŵanice: naŋgawe'fyo ifyaŵumbifi muŵe muli nincece, sombi mumitima muŵe muli ŵakulu. 21Mumafunde mulilembelwe ati: ŴaSikulu ati: Muŵantu ŵamini yabwensu namumilomo yaŵensu ŋkalawila kuŵantu aŵa; popele, naŋgawe'fyo, tawakanumfwa.

22Pakuti pali fyefyo, imini sili koti kesiŵilo, kuli ŵaŵo aŵacetekela teko, sombi nikuli ŵaŵo aŵataŵacetekela; sombi ukusimika takuli kuŵakuŵulo'kucetekela, sombi kuli kuli ŵaŵo aŵacetekela. 23Kani lomba ikelesya lyonse lifiwuŋgene nemutima umo, neŵantu ŵonse naŵo nekulukulaŵila nemini, lomba nekwinjila-mo aŵantu aŵataŵasambisiwe neli ŵakuŵulo'kucetekela, kansi taŵakalaŵila ati: Mwafunta? 24Sombi kani ŵonse ŵalukusimika, lomba nekwinjila-mo umbi utaacetekela neli muntu utaasambisiwe, alasininwa kuli ŵo ŵonse; alebwa kuli ŵo ŵonse; 25ifintu ifyamfiso ifyamumutima wakwe filaŵoneka; fyopele'fyo akawila pansi ubwifuneme, nekuŵalambila ŵaLesa, ukulukutulisya ati icine ŵaLesa ŵali pakati pali mweŵo.

26Nindo lomba, mweŵakwasu? Impindi syonse isi mulukuwuŋgana, mwense umbi ali nesamo, umbi ali neŵusambisi, umbi ali necakufisulula, umbi ali nelumini, umbi naye ali nekuŵulisisya. Fyonse ŋgaficitwe mukwiŵaka. 27Kani umbi alaŵile nelumini, ŋgaŵalaŵile ŵaŵili, sombi tekucila napali ŵatatu, nekulaŵila umo umo; umbi naye umo ŋgaaŵulisisye: 28sombi kani tapali uwakuŵulisisya, ŋgaakutumane uyo mwikelesya; ŋgaaluawilile, alaŵile kaŵili nakuli ŵaLesa. 29Neŵakusimika naŵo ŋgaŵalaŵile ŵaŵili, kani ŵatatu, naŵambi naŵo ŋgaŵesiŵisye ukwakulekanya. 30Sombi kani fyafisuluka ifintu kuli umbi uwikele-po, uwakutaŋga ŋgaakutumane. 31Pakuti mwense muliisi ukusimika umo umo, ati ŵonse ŋgawasambile, ŵacenjesiwe. 32Nakaŵili imipasi yaŵakusimika ilakomekwa kuŵakusimika; 33pakuti ŵaLesa taŵali ŵakufuluŋganya, sombi ŵaŵutende: koti nifyopele'fyo ifili mumakelesya onse awaluŋgeme.

34Aŵanakasi ŋgawakutumane mumakelesya; pakuti tafisuminwe kuli ŵo ukulaŵila; sombi ŋgawakomekwe, koti nifyopele'fyo ifi alaŵila nemafunde. 35Popele kani ŵalukufwayo'kusambila fimbi, ŋgaŵaŵepusye aŵalume ŵaŵo aŵene kwaŵo kunanda: pakuti fyansoni ukulaŵila mwikelesya umwanakasi.

36Syani? Kani muli mweŵo mwalifumine isiwi lyaŵaLesa? Kani lyalificile kuli mweŵo mweŋka? 37Kani umbi alukulilaŋgulucila ati ndi wakusimika, ndi waMupasi, ŋgaaliisiŵisye ifintu ifi ndukulemba kuli mweŵo, ati fyakufundwa kuli ŵaSikulu. 38Sombi kani umbi taakwete-kwisiŵa, ŋgaekale wakuŵulo'kwisiŵa.

39Pakuti pali fyefyo, mweŵakwasu, fwaisyeni nemakosa ukusimika, sombi tekuŵakanya aŵantu ukulaŵila nemini. 40Sombi ifintu fyonse ŋgaficitwe nemucinsi neŵunjino.

Currently Selected:

1 Aŵakolinto 14: AAL59

Highlight

Copy

Compare