Rom 11

Israel ameg laa Jesusnu oolagppa genab dooppig

1Amunu da oɗ mettem. Kayak Nug danab nuhikkud geɗattomte? Iittanab iitta! Da ele am Israel ted. Da amu Abraham buɗub, Israel dilag huu okkai Benyamin, amuppanu danab laa. 2Danab Kayak Nug anukka ag doyattom ele, Nug ag ii geɗattom. Amu Elaiyanu kaya Kayak naippa daatte amu ag amu iitai dootteb? Elaiya nug Kayak unuqittatta, Israel danab beɗulkadppa nai ya, inam aum. 3“Naɗi, danab amu ag nahip propet aqaeg mauheg, ag qaɗab nahip ele loppaɗppig. Da dakka amu bau iikku daaiyi, ag da iuppeg mauhkkulnu mattiɗtteb,” awa aum. 4Nug anam a amu Kayak Nug nai nuhig attem nob meum? Kayak aum. “Da danab dahilad 7,000, ag hambuppuak kayak onig Bal, ag nug noobppa dup ii nona binag ii meppig ele amu, da ag aɗualatti, ag dahilad daatteb,” awa aum. 5Amu bianab haen imuppa ele Israel oolagppan ameg laa Kayak Nug ag ehanittak okkai hamu madatta tituanattom. 6Amu Kayak Nug danab amu ehanittak okkai hamu madatta tituanattom dayeb amu, Nug ag uɗat heppig amuppa ii diiattom. Ag uɗat heppig amunu Kayak Nug diiattom daalo amu, Kayak Nug ehanittak okkai hamu mettakppa danab diittenu kobol amu keeke hamu daalo, ehanittak okkai hamu mettak kobol amuam meu iitta daalo. 7-8Amunu ig aɗi akkunig? Israel danab kuɗum ag Kayak noobppa genab tutukku hak danab daaglagnu, ag amu aoglagnu oolag unuqagppanu heppig amu, ag ii aoppig. Amge laa, Kayak Nug tituanattom ele, ag tutukku dayak amu aoppig. Laa oh amu, Kayak he, ahilag dabmak am ɠagattag eppom. Kayak nai amunu am inam. “Kayak he, ag oolag amu dabmak ahilag ele niiak bia daappig. Nug he, ag amelag neekkaknu elele iitta daaegeg, daulag ele nai dooglagnu elele iitta daappig. Ag anamib daaeg uɗie, gemu ele anamib daatteb.” 9Amu Dawit ele ahilagnu nai laa, ⌊Kayak naippa yaak daatte⌋ inam mattia aum.

“O Kayak, na heppe, kekeɗ dahil ag hobul henana, ag doɗ pelemppa tena qakkak daatteb, amubia hobul ahilagppa ag anam daaglagnu oɗ medattem.

Ao, ag nena qena, nob nau aoglagnu unuqidttem.

10Na ag amelag heppe gaɗueb, ag ii neegmananu oɗ medattem.

Ge, na heppe, ag beɗulag bodoettaknab ele daaglagnu unuqidttem.”

Dawit anam aum.

11Aria, nai anam daatte amunu, da baula oɗ mettem. Ag eheɗnab nena qeppig, amuppanu ag eɗun ii hippaidmanate? Iittanab iitta! Ag ib apiɗitteg, Kayak Nug danab laa, iitta aɗi, Nug ag diiom. Nug iitta aɗi eɗua diiomnu diig am, amuppa Nug heeb, Israel danab ag, ag iitta aɗi ag gemu Kayaknu kobol enanag aotteb anidna, ag amunu ittag aqeeb, ag dabmak aona, ag Kayak baekkudppa daaglagnu dokkulag. 12Amu ag ib apiɗidppig amuppa Kayak Nug wanppanu danab oh dilagppa ehanattak okkai hette. Ag Kayaknu kobol ena uuppig, amuppa Kayak Nug iitta aɗi dilagppa kobol enanag hette. Anam amunu, Israel ag eɗun Kayak toppa dokkulag haenppa amu, geha wanppan danab ag enanag daaglag.

Kayak Nug iitta aɗi ag oolagppa genab dooppig ele eɗua diiom

13Imuam da iitta aɗi, ahilagnu attem. Kayak Nug da Kristus onig awe, ag oolagppa uɗat hekkulnu meiɗe uɗimi amunu, da uɗat imunu, da nug binag mettem. 14Da amu hettemnu diig am, kobol amuppa da heppi, danab da ele buɗub laippu, amuam Juda danab, da heppi, Juda danab ag, ag iitta aɗi ag gemu Kayaknu kobol enanag aotteb anidna, ag amunu ittag aqeeb, ag dabmak aona, kobol amuppa Juda danab oolagppanu laala ag Kayak baekkudppa daaglagnu dokkulagtai. 15Am genab, Israel dilag na qakppa wan atu ohppan danab ag Kayak ele oolag laippu daaglagnu elele daatteb amunu, dimppa Israel ag oolag eɗueb, Kayak Nug ag eɗua diieb, keeke enanagnab bekku. Amuam mauhakppanu eɗua hibaittak. 16Bret maha nakok laa tatamnu Kayak medappeg, amu nuhig daatte dayeb amu, bret kunum oh am Kayaknu ele daatte. Ad laa diɗilkad Kayaknu daatte dayeb amu, ad eppekkud oh amu Kayaknu ele daatteb. ⌊Amubia Abraham, Aisak amu Jakop ele ag oolagppa genab doona, Kayaknu danab oppiaawak ele daappig amunu, ag buɗulkad ele anam daaglag.⌋

17Kayak Nug danab laa, nug dattanu olip ad ebekkud laala qiialatta awowa, ebekkud ii qiialattak daappig oolagppa olip dakkuɗ eppeg laa awa tuɗitte bau daatte, amubia Kayak Nug he, ag iitta aɗi ag gemu ena bau daatteb. Ag iitta aɗi ag gemu amu ag am olip dakkuɗ eppeg bia, gemu amu ag ɠagattag, kobol ena ele Kayaknu aotteb, eppekkud diɗippa keeke ena aotteb bia. 18Amge ag eppekkud otakkattak, hamu daatteb ele, ag amu dilag nai eheɗ aib appig. Ag nai eheɗ amananu amu ag dabmena autna aweg! Ag diɗi ii gumatteb. Iitta. Diɗi ag gumadtte. Ag am eppekkudib daatteb. 19Amge ag anen anen ag inam akkulag. “Da olip ad amuppa tuɗittak daakkulnu, Kayak Nug eppekkud laala qiialatta awom,” aon akkulag. 20Genab! Eppekkud qiialatta awak amu, ag oolagppa genab ii dooppig amunu, Nug ag qiialatta awom. Ag iitta aɗi ag Kristen beppig daatteb ele, ag am oolagppa genab dootteb amunu, ag aakku ena daatteb, amge ag dabmena autna aweg! Ag aib hibguitta heppig. Iitta! Ag Kayaknu ebehilkad oh bodoetta le maɗ! 21Aɗinu? Anukka Kayak Nug dattanu olip ad eppekkud qiialatta awe, abenlagppa ii daappig, amubia ag, ag am olip dakkuɗ eppeg bia amu, ag ooppa genab doyak uuppeg, Nug ag uuatteb, abenlagppa ii daamna.

22Anam amunu, ag Kayaknu oo bodoettak kobol, amu nuhig ɠagattag hak kobol ele ag antteg! Danab ag nuhig kobol dimedappig ele, Nug ɠagattag kobol nuhig ag ippunadtte, amge ag iitta aɗi ag gemu nuhig oo bodoettak kobol anidtteb. Amu ag oo bodoettak kobol nuhig amu ooppa daappeg, Nug ena hadakku, amge ag anam ii daappeg am Nug ag otakkatteb daaglag. 23Ele amu eppekkud laa, ag ooppa genab ii doyak tuɗidna ii heppeg amu, Kayak Nug eɗua tuɗitteb ag ele ad eppekkud aakku daaglag. Kayak Nug eɗua tuɗitteb daaglagnu elele. 24Doyeg! Ag iitta aɗi ag anukka amu ag olip ad dakkuɗ eppekkud daaegeg, Kayak Nug olip ad amuppanu ag otakkatta diia, dattanu olip ad, amuppa tuɗittom. Ad amuam ahilagnab iitta. Israel ag am dattanu olip ad eppekkudnab bia amunu, Kayak Nug ag diia, eɗua tuɗitteb daaglagnu elelenab daatte. Kobol Kayak heum am adppanab nukka hamu anambia ii bette, amge Kayak Nug ag iitta aɗi, ahilagppa kobol adppa ii bette, Nug ahilagnu amubia he beum.

Kayak Nug Israel eɗua diikku

25O lailad, ag akka ahilagnu dabmena, “Ig doyak binanig ele okkainab,” aon amananu da ag nai anukka tonak dayom amu da geha iikku miag atiak madikkulnu hettem ele amu, ag amunu ootot ii aqamanu ool daatte. Anam amunu, da nai anukka tonak dayom ele imu ahilagppa diig matule madittem. Amu inam. Israel danab laala ag dabmak ɠagattag eppom ele, kobol amu ahilag am anamib dayeb ukkeb, iitta aɗi ag Kayak dim lamidkkulagnu nuhig aɗppa wappeg, ebqak melemel elele aokku. 26Kobol anamppa Kayak Nug Israel oh eɗua diikku. Amu Kayak naippa, Kayaknu nai laa daatte bia. Nai amuam inam. “Ehanittak laa Sionnu uɗia, Kayaknu, nuhig haknu ele uuak kobol Jakop toppanu amu, Nug aokku. 27Amu da hipunin ahilag oh uhuqen mattoya amu, haen amuppa da nug tituana nai qakkak ag ele hekkunig.”

28Israel ag Jesusnu Nai Ena doon uuna, ag Kayaknu kekeɗ daatteb, amu ag iitta aɗi ag amuppa ehanittak aotteb, amge Kayak Nug anukka Israel ag tituanattom amu, Nug ag alalkad dilag dabmaama, Nug ag Israel, ahilagnu Nug oo mauhak ele dootte. 29Aɗinu? Kayak Nug danab tituana, keeke laa nuhig daakkunu hamu metta, nug onigppa eum ele amu, Nug nuhig dabmak dimppa amunu iinab baolitte. 30Anukka ag iitta aɗi ag Kayak oɗe tappaeg neum, amu gemu Israel ag Kayak oɗe tappaeg nette, amuppa Kayak Nug ag iitta aɗi, Israel iitta, ag iitta aɗi Nug ahilagnu oo gai-iitta doya oo matta ehanadtte. 31Gemu Israel ag Kayak oɗe tappe nakppa daatteb, amu ag ele Kayaknu oo gai-iitta doya oo metta ehanittak kobol waappa daaglagnu, Kayak Nug ag iitta aɗi ahilagnu oo gai-iitta doya oo matta ehanadtte, amuppa Israel ag gemu ele anamib aoglagnu elele daatteb. 32Aɗinu? Kayak Nug danab ah oh, Nug ahilagnu oo gai-iitta doya oo matta ehanadkkunu Nug ahilag tappe nak kobolnu ag maniguattom daatteb.

Kayak binag humaknu nai

33Genab! Kayaknu doyak dabmak ena ele, aria doyak nuhig ele, keeke aɗit amuam okkainab, unuqagnab ele daattep. Ig danab ig maittak nuhig oh diig mattita anidkkunignu elele iittanab. Amu ig ib oh Nug dim lamidtte ele, ig elelenab doognignu ele elele iitta. 34Amuam Kayak naippa, nai laa daatte, am amubia. Nai amuam inam. “Aun laa nug Naɗinu dabmak oh anttom? O aun laa nug nuhig ulum mettaknu danab dayaya, ulum nai laa mettom? 35Aun laa nug Naɗi keeke mettom amunu, Naɗi Nug eɗua, amunu nob nug medakkunu daatte?” 36Iittanab! Nug nukka aakkuib keeke oh diig daatte. Nug nukka aakkuib keeke ohnu Mamelag daatte. Keeke oh am nuhignuib daatteb. Binag amahlak oppiaawak ele hanhan nuhignu dayaɗ! Genab.

Currently Selected:

Rom 11: NB

Highlight

Copy

Compare