Prowerb 9
9
Doyak Dabmak Ena Ele hobul ha, danab ah onilagppa eum
1Doyak Dabmak Ena Ele nug nug laug heum.
Nug biidod eblaih aɗit okkai amu lagnu uug maoglagnu galattom.
2Nug hobul hekkunu doɗ danab ah madakkunu aqa, babaitta mala, nug wain lanaknu babaitta malowa,
aria nug ee lanaknu balal ele babaittom.
3Nug babaittak uɗat amu oh ha malowa,
aria nug maɗi ah nuhikkud ag nuhig nai ekkulagnu aab okkaippa gona, aben attannab, ag amuppa tena ekkulagnu maatte goppig.
4-5Nug aun laa nug epeɗia ha dabmak ena awaknu kobol ii dootte ele amu, nug nug amegppa atte.
“Aun laa nug doyak ii awak ele amu, nug dahilppa uɗiaɗ! Genab, nug ippa uɗia, ee dahil, wain ele bapaidmi imu lanaɗ!
6Ag doyak ii awak ele aib tuɗidna daan oippig! Ag amu tuɗidna ii hekkulag dayeb, ag bau daaglag;
ag diignu doyak tutukku aon oiyeg!” awa atte.
7Am aun nug awa awa qettak danab laa tolidtte amu, awa awa qettak danab nug nug eɗua, awa awa naunab qedakku.
Yo, aun nug nau hak danab laa daug batatte amu, nauhak danab amu nug nug eɗua guittak medakku.
8Na awa awa qettak danab daug batappe, nug geha nau ninig ele nahipnu dookku;
amge na danab doyak dabmak ena ele laa daug batappe amu, nug nahipnu oo mauhkku.
9Na danab doyak dabmak ena ele nai enappa doyak medappe, nug anamib doyak dabmak ena tuɗid ele daakku.
Ao, na genab tutukku hak danab laa doyak aokkunu ippunidppe, nug tuɗid ele doyak okkai ele daakku.
10Amu Yawenu ebehi oh bodoetta le mak kobol, amuam doyak dabmak ena ele digma awak aakku.
Ao, Kayak, Nug oppiaawak ele, Nug dooittak am he, diignu doyak tutukku aakku bette,
11amunu na da, Doyak Dabmak Ena Ele dim lamiɗkkut dayeb amu, na haen elab wanppa daakkut.
Ao, na da, Doyak Dabmak Ena Ele dim lamiɗkkut dayeb amu, da maɗ nahip tuɗidppi, kuɗum daaglag.
12Na doyak dabmak ena ele aɗan oippe amu, doyak dabmak ena ele amu na nob ena medakku;
amge na awa awa qettak danab daan, na guittak aon oikkut.
Ah onig Kayak Dab-ii-maama Haknu nai
13Ah laa onig Kayak Dab-ii-Maama Hak, ah amu nug baag okkaippa nai maditte.
Nug nukka nuhig oiyak ii atognoa enaib oikkunu ii oiya, doyak iitta ele oitte.
14Nug nug laug od oɗeppa heɗep na daatte.
O nug aab okkai ooppa qauko attannab igippa, appa dayak balal daatte, nug appa ana daatte.
15Nug appa dayaya amu, aguppanu nug danab ah nug daatteppa gukkuidna oitteb ele, nug amelagppa qala ewa nai maditte;
ag aben laalappa tutukku gokkulagnu gotteb, amge nug ag dooglagnu ewa,
16laa amu ag epeɗia ha dabmak ena awak kobol ii dootte ele, nug ag amelagppa ⌊hambuppua,⌋ atte.
“Ag laa doyak ii awak ele, ag uɗin, dahil nai doyeg!
17Ag le yab aon lana amu, ag ubuhi ele dooglag.
Ao, ag ee ahilag iitta aona, lokkumakppa lana amu, ag ubuhi enanag ele dooglag,” awa atte.
18Nug anam ⌊hambuppualatta⌋ atte amunu, laa ag nug nai mattie dootteb ele, ag laa, ag nug aɗi maditte, ag amu dim lamidna hena mauhtteb, ag amu dab-ii-mettanna mauhtteb.
Ao, laa ag nuhigppa watteb, ag mauheg, boumadtteb.
© (Active), Wycliffe Bible Translators, Inc. All rights reserved.