Namba 34
34
Israel wan tom
1Amu Yawe Nug Moses amegppa aum. 2“Na Israel danab ah ag inam hekkulagnunab appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Da ag Kanan wan, ag aulag daakkunu aakku madattem. Haen ag Kanan wanppa nokkulag amu, imu amu geha ahilag wan tom daakku.
3Amu yau uɗitteppanu tom am, le ameg Mauhak Le laih yau uɗitteppanu digma ukka, Mediterenia yuppa nokku, amge tom nug tutukkunab ii goma. Sin atu taɗak laih am ahilag tom ooppa daakku, amuam Edomnu tom guguittak. 4Amu Mauhak Le, appanu amu, tom am ukka, qauko ikki oppoɗu noak onig Apiap, aben amuppanu yau uɗitteppanu ukka, Sin atu taɗak obata ukka, Kades Barneanu yau uɗitteppanu ukka, aab okkai Hasaradar ta ukka, Asmon ele tekku. 5Asmon appa amu, tom nug nakok piia, oolnu noak laa onig Isipnu oolnu noak, amuppa digma dim lamitta ukka ukka, Mediterenia yuppa nokku.
6Aam nodeppanu tom amu Mediterenia yu ihi daakku.
7Ahilag tom yawalti uɗitteppa amu, Mediterenia yuppanu tutukku ukka, Hor qauko batakku. 8Hor qaukoppanu am ukka, Lebo Hamat ta, appanu am ukka, Sedat wakku. 9Appanu am tuɗitta ukka, Sipron wana ukka, Hasarenan batakku. Amuam ahilag tom laih yawalti uɗitteppanu aakku.
10Aria, ahilag tom laih kaɗag uɗitteppanu am, Hasarenannu aha, tutukku ukka, Sepam tekku. 11Sepamnu amu, ahilag tom am ukka, aab onig Ainnu aam bedeppan ukka, Ripla ta, qauko laala, le gottu okkai Galili, le amuppanu laih aam bedeppanu daatteb amu, qauko amuam tom daakku. 12Aria, tom amu ukka, Galili le gottuppa wana, Galili ihi matta ukka, Jodan leppa wana, le amu matta noa ukka, Mauhak Leppa wana ukka batakppa batakku. Wan, nuhig tom laih laih oh amuppa daaglag amu, wan amu oh ahilag daakku,” awa aum.
13Amu dimppa amu, Moses nug Israel amelagppa ag inam hekkulagnunab aum. “Wan aug, ahilag daakkunu amu, ag om ena yaakppa paniatteg! Yawe Nug Israel dilag huu okkai eblaih waɗele, amu Israel dilag huu okkai laa mahaib ele, amu panin mattaglagnunab aum. 14Aɗinu? Israel dilag huu okkai Ruben, amu huuppan baelkadppan danab, Israel dilag huu okkai Gad, amu huuppan baelkadppan danab, amu Israel dilag huu okkai Manase mahaib, amu huuppan baelkadppan danab, ag aulag wan matu aoppig. 15Israel dilag huu okkai aɗit amu, amu Israel dilag huu okkai laa mahaib ele, ag matu aulag wan laih aam bedeppanu, heqo laih, le Jodannu Jeriko guguittak appanu aoppig,” awa aum.
16Moses nug anam a amu, Yawe nug amegppa aum. 17“Na danab laala ag wan ag aulag daakkunu epeɗin paniglagnu otiatte! Danab amuam mana mettak danab Eleasar, Nan bekka Josua ele, 18amu Israel ooppa Israel dilag huu okkai anen anenppanu ikki danab laippu ele. Wan amuam Israel, ag aulag wan. 19Israel dilag huu okkai anen anenppanu danab otiadkkulag ele onilag amu iikku.
Kalep, nug am Jepune bekka. Nug am Israel dilag huu okkai Judanu.
20Amihut bekka Semuel. Nug am Israel dilag huu okkai Simeonnu.
21Kislon bekka Elidat. Nug am Israel dilag huu okkai Benyaminnu.
22Jogli bekka Buki. Nug am Israel dilag huu okkai Dannu ikki danab.
23Epod bekka Haniel. Nug am Israel dilag huu okkai Manasenu ikki danab. Manase am Josep bekka laa.
24Siptan bekka Kemuel. Nug am Israel dilag huu okkai Epraimnu ikki danab. Epraim am Josep bekka laa aakku.
25Parnak bekka Elisapan. Nug am Israel dilag huu okkai Seblonnu ikki danab.
26Asan bekka Paltiel. Nug am Israel dilag huu okkai Isakarnu ikki danab.
27Ahihut, nug am Selomi bekka. Nug am Israel dilag huu okkai Asernu ikki danab.
28Amihut bekka Pedahel. Nug am Israel dilag huu okkai Naptalinu ikki danab,” awa aum.
29Danab amu, ag Kanan wan, ag aulag daakkunu paniadna, Israel danab mattaglagnunab, Yawe Nug aum.
© (Active), Wycliffe Bible Translators, Inc. All rights reserved.