Aposel 9

Saul oo eɗue, Kristen beum

1Amu haen gamag amuppa ele Saul nug danab ah Jesusnu oolagppa genab dooppig ele, nug ag aqeb mauhkkulagnu, nug ɠagattag anana, wagai ma haaha, nug mana mettak ikki danab gumitta ukka 2amegppa a, nug Juda dilag nai doyak lag Damaskus daatteb, amunu ikki danab anen anen dilag pas Saul mettom. Pas amuppa nug inam yom. “Saul nug danabte, iitta ahte ag Jesusnu oolagppa genab dootteb ele appa anadkku, nug hippalatta diia, Jerusalem uɗikku,” ana yom. 3Aria nug ya, Saul mette, nug ukkom. Ukka Damaskus guguittette amu, laippun hab aabppanu amahlak okkai na, nug talilitta amahalom. 4Anam amu, Saul nug wanppa na qa, wanppa niieye, nai baag laa na, inam nug amegppa a doyom. “Saul, Saul, na aɗinu da eheɗ heiɗttem?” awa aum. 5Anam awa a, Saul nug aum. “Naɗi na am aun?” awa oɗ mettom. Oɗ mette amu Naɗi Nug eɗua aum. “Da am Jesus; na da eheɗ heiɗttem. 6Amge na ahan, aab okkai ooppa nona daabppe, geha na keeke aɗi hekkutnu amu, danab laa nug na amenppa akku,” awa aum. 7Nug amegppa amu aawo, danab Saul ele oippig amu, ag nai iitta hippaidna daanna, baagnu oqotti aakkuib dooppig, danab laa ii anidppig. 8Nug nai mattia male, aria Saul nug wanppanu aha gokkunu neekkom, amge nug ameg gatatu mane, ag nug eppeg aɗan, omalna Damaskus noppig. 9Ag aon noeg, nug deɗ ewam ii neekkom, ameg gatatuib dayeye, nug ee le ele laa ii laum.

10Nug anam dayeye, danab laa nug Jesusnu ooppa genab doyom ele, nug Damaskus appa dayom, nug onig Ananias. Nug dayeye, Naɗi nug onig diia, “Ananias,” awa aum. Awa a aakku Nug oɗeppa awa aum. “Naɗi, da ina daattem,” awa aum. 11-12A amu Naɗi nug amegppa aum. “Na ahan, ib onig Tutukku, amuppa gona, Judas laugppa tena, na Tarsus danab laa anidkkut, nug onig Saul. Nug unuqidtte. Amu da hei, nug tuleglegppa, nug eɗua neegkkunu elele daakkunu amu nug danab onig Ananias nug ukka, nug eppeg qaɗeppa me anttom,” awa aum. 13Naɗi Nug Ananias amegppa anam aum amu Ananias nug eɗua inam aum. “Naɗi, danab kuɗum ag danab amunu aeg doomi. Nug kobol ena iitta haaha, nahipad danab ah oppiaawak ele Jerusalem daatteb ele eheɗ hattom. 14Amu mana mettak danab okkai ag nug uɗia, aun aɗi oh ag na oninppa etteb ele nug ag aɗualatta, maniguadkkunu ɠagattag medappig amunu, nug amu hekkunu uɗiom,” awa aum. 15Nug anam aum, amge Naɗi nug amegppa aum. “Na ukke! Aɗinu? Nug da onil awa ukka, iitta aɗi, amu king aɗi, am Israel ele amelagppa ab dooglagnu da danab amu tituanmi; nug am dahil maɗi nid. 16Geha nug da onil ag ippuanattatta, amuppa nug uug nau digdig maokkunu daatte amu da nug ippunidkkul,” awa aum.

17Amunu Ananias nug ukka, Saul dayom ele, lag amu ooppa noa, eppeg qaɗeppa ma, nug amegppa aum. “Lai Saul, Naɗi Jesus Nug na ibppa gumitta neum ele amu, Nug na eɗun bau neegkkutnu, Kayak Ouɗi na ootppa ambekku Nug aakku he, da na gumitten uɗimi,” awa aum. 18Anam awa a, Saul ameg laih laihppa keeke kakai gonelag bia aɗaya daapiɗ amu, nug ameg doɗoppanu tolai neya qeeh, ameg ena daye, aha layattak awom. 19Nug layattak awowa, dimppa nug ee laawo, beɗu ɠagattag qeum. Ɠagattag qe, Saul nug Damaskus appa deɗ laib laib danab Jesusnu oolagppa genab dooppig ele amu, nug ag ele oh daappig.

Saul Damaskus Jerusalem ele appa Jesusnu nai mehuqom

20Saul ag ele, ag appa daanna nug ameg mak ii heum. Iitta. Nug ukka, Juda dilag nai doyak lag laalappa noa, nug Jesusnu nai mehuqa, amelagppa inam aum. “Jesus Nug Kayak Bekka,” awa aum. 21Nug Jesusnu nai amelagppa mehuqeqe doonna, danab oh ag nuhignu ottaina dabmak kuɗum aonna, ag appig. “Danab amu nug aakkuib danab ah ag Jesusnu oolagppa genab doon unuqidtteb ele amu, nug ag aqattom. Nug Jerusalem uppa anam ha, ippa ele nug ag hippalatta diia, mana mettak danab okkai eppelagppa maadkkunu uɗiom,” aon appig. 22Ag anam aegeg amu Saul nug Jesusnu, Kayak Nug Nug tituanom, Kristus daatte, amu tutukkunab nai ebehi eleppa ippuanatte, Juda ag Damaskus daappig, ag nuhig nai tabappeg nokkunu ib laa ii anidppig.

23Nug anam heehe, deɗ kuɗum ukke, Juda ag qagmena, Saul qeppeg mauhkkunu nai qagappig. 24Qagappig amge laa nug a, Saul nug nai amu aakku doyom. Juda ag nug qeppeg mauhkkunu amun tuqan ele meidna, ib aɗan aab okkainu aɗ odppa daappig, 25amge danab ag Saulnu nai dim lamidppig ele, ag tuqan Saul aon, kalegppa inan, aab okkainu aɗ oɗe laappa paɗeg dimittim noa ukkom.

26Aria Saul nug oiyaya, Jerusalem ukka, nug danab Jesusnu oolagppa genab dooppig ele, nug ag ele oh daaglagnu heum, amge ag oh nug baɗidppig. Aɗinu? Ag nug oo eɗue, Jesusnu ooppa genab doyom amu, ag amu oolagppa genab ii dooppig. 27Ag nug baɗidppig, amge Barnabas nug Saul omala, totol danab 12 gumatta ukka, ibppa Saul nug Naɗi Jesus antte, amegppa nai aum amu Barnabas nug amunu amelagppa mattia, nug Saul Damaskus dayaya nug baɗak iitta ele, Jesus onigppa nai mehuqom. 28Barnabas anam heum amunu, Saul, nug ag ele daappig. Ag oh daanna, Saul nug Jerusalem appa aben ohppa oiyaya, nug baɗak iitta ele Naɗi Jesus onigppa nai mehuqom. 29Anam amu, nug Juda laa, ag Grik nai dootteb amu, nug ag ele nai mattin, aeg ona aeg doum, amge ag nug qeppeg mauhkkunu ib mattinna daappig. 30Anam heegeg, Kristen tamaniakppanu nug laikkud ag amu doona, ag Saul omalna Sisaria nona meeg, Tarsus ukkom.

31Aria, amu dimppa amu, laih Juda appa, Galili appa amu Samaria ele, aben amu ohppa haen amuppa Kristen tamaniakppa maɗoɗ dayom. Kayak Ouɗi danab ah amu ehanatta ag oolag ɠagattag qe, ag Naɗinu ebehilag oh bodoetta le meeme, danab ah kuɗum ag Kristen tamaniak ooppa noppig.

Pita nug Ainias, Tabita ele ehanatom

32Pita nug danab ag matatun aabaab gona daappig anadkkunu oiyaya, nug aab Lida noa, appa Kayaknu danab ah oppiaawak ele anatte daappig. 33Daanna aab amuppa Pita nug danab laa anttom, nug onig Ainias. Nug eppeg baeg ele mauhak amu, nug maɗ eblaih ewam ele anam abenppa niiakib niiom. 34Pita nug antta amegppa aum. “Ainias, Jesus Kristus Nug na beɗun ehanidtte amunu, na ahan nahip niiak aben babaitte!” awa aum. Awa a aria Ainias nug pahanab ahom. 35Nug aha oiyeye, Lidanu danab ah oh amu Saron danab ah ele ag amu anidna, ag oolag eɗue, Jesusnu oolagppa genab dooppig.

36Aria aab laa onig Jopa, appa amu ah laa Jesusnu ooppa genab doyaya dayom, nug onig Tabita, Grik naippa amu ag Dorkas atteb. Nug hanhan kobol ena haaha, nug danab ah keeke iitta ele amu ehanattatta, keeke madattom. 37Amu Pita nug Lida dayeye, haen amuppa ah amu nug oɗe awa mauhe, laa ag mauhom gaɗa amu le laaidna, lag oo attan laa amuppa meeg dayom. 38Lida, Jopa ele ouqak daapiɗ amunu, danab Jesusnu oolagppa genab dooppig ele ag, “Pita Lida daatte,” amu dooppig amunu, ag danab aɗit, aa Pita amegppa, “Na paha ihinigppa uɗie! Na appa aib daame!” akkulahnu heeg gopiɗ.

39Aria Pita nug ahe, danab amu ele oh goppig. Haen nug ukka te, ag nug omaleg lag oo attan amuppa te amu, ah qab appanu ag oh uɗin, Pita talilidna daanna, gaanna ag lamen digdig Dorkas ii mauhom haenppa ha mattom amu ippunidppig. 40Ag anam heeg amu Pita nug he, danab ah oh dimittim ukkaeg amu nug gateg qaun o, unuqittowa eɗua ah gaɗa amu neekkitta, nug aum. “Tabita na ahe!” awa aum. Awa a, aakku ah ameg oppate nug neekka, Pita antta, aha heɗep na dayom. 41Anam dayeye, Pita eppeg aɗa, hume hibaittom. Nug eɗua ahe, Pita nug danab ah, Kayaknu oolagppa genab dooppig, ah qab ele, ag onilagppa e uɗieg, Tabita bau dayeye awa mattom. 42Pita nug amu he, nai amu Jopa aab ohppa ukke, danab ah oh dooppig. Doona amu kuɗum ag Naɗinu oolagppa genab dooppig. 43Ag anam heeg, Pita nug deɗ kuɗum Jopa dayom. Nug danab laa, doɗ gaɗa beɗamanu babaittaknu uɗat hettom amu, nug ele daapiɗ. Nug onig Saimon.

Currently Selected:

Aposel 9: NB

Highlight

Copy

Compare