Aposel 10

Engel laa ba, Kornilius amegppa nai aum

1Aria, iitta aɗi danab laa Sisaria dayom, onig Kornilius. Nug ban daup 100, onig Itali daup, nug amu dilag ikki dayom. 2Danab amu nug baekkudppa ele ag oh Kayaknu ebehilag oh bodoetta le meum. Amu nug men doɗo kuɗum, Juda danab men doɗo iitta ele, nug ag ehanatta madatta, haen oh nug Kayak unuqidttom. 3Nug anam heehe amu deɗ laa tueb, aam ameg ewamppa nug tuleglegppa Kayaknu engel laa miag atiak nug gumitta uɗia anttom. Engel nug uɗia, onig diia, “Kornilius,” aum. 4Nug anam a amu, Kornilius nug ameg behabe, engel neekkittatta, huanak baɗaɗa nug aum. “O naɗi, amu aɗitai?” awa aum. A aria engel nug amegppa aum. “Kayak Nug nahip unuqittak doya, amu daɗek ehanittak kobol nahip ele antta, nahipnu dabmette. 5Amunu na gemu danab laala heppe, Jopa gona, ag danab laa, nug onig Saimon, onig laa Pita, amu anidna appeg uɗiaɗ! 6Saimon Pita nug Saimon, nug am doɗ gaɗa beɗamanu babaittak danab, nug laugppa daatte. Lag amu yu ihippa daatte. Ag nug appa anidkkulag,” awa aum. 7Engel nug Kornilius amegppa anam awowa ugekke, aria Kornilius nug nuhikuɗ maɗi nid aɗit laa, amu daup laippu ele onilagppa e doppig. Daup amu nug Kayaknu ooppa genab doya, nug Kornilius ehanittom. 8Aria, Kornilius nug keeke oh beum danab ewam amu amelagppa awowa he, ag Jopa goppig.

Pita tuleglegppa keeke anttom

9Aria, danab ewam ag ukkaegeg ⌊uudo, ibppa niiona, ahan ukkaegeg,⌋ aam ameg tutukku aokkunu heehe Jopa guguittegeg, Pita nug lag koɗokko uɗem ukkakppa unuqidkkunu teum. 10Pita nug enug qak doya, ee lakkunu dabmeum. Dabmeeme, lag amuppa daappig ag ee lanaknu babaittegeg amu, Pita nug tuleglegppa 11hab obate, keeke laa ne anttom. Keeke amu lamen okkai laa bia, muɗi waɗele daug waɗeleppa qakkak dayeye, paɗaeg wanppa neum. 12Keeke amu ooppa doɗ iɗu iɗu, mat keeke iɗu iɗu, amu ai hagagaɗna oitteb iɗu iɗu ele daappig. 13Nug amu antta dayeye am baag laa Pita amegppa inam aum. “Pita na ahan, doɗ imu aqan la!” awa aum. 14Nug anam aum, amge Pita nug aum. “Naɗi, da Juda dilag ɗoppa doɗ ii lanaknu epeɗiak daatte deɗ laa ii lami, gemu ele ii lattem,” awa aum. 15Pita nug anam awa a, baag amu baula nai mattia, Pita amegppa inam aum. “Kayak Nug he, ee laa lanaknu epeɗiak daatte amu, na ee amunu, ‘Ii lanaknu epeɗiak daatte,’ aib ame,” awa aum. 16Lamen okkai amu nug ne, haen ewam bate, aria ⌊Kayak he⌋ keeke amu paha eɗua, hab aabppa teum.

17Pita nug Kayak keeke amu ippunitte anttowa, nug oo ii maitte, keeke amu diignu dabmak kuɗum awom. Nug anam dabmak awewe, aria danab Kornilius he uɗippig amu ag uɗin bena, ag Saimon laugnu oɗ meeg, ippuanatteg dona, lag odppa hippaidna daappig. 18Ag lag odppa daanna, enan inam oɗ meppig. “Danab Saimon atteb, nug onig laa Pita amu, nug ippate daatte o iitta?” aon appig. 19Aon oɗ meegeg, amu Pita nug keeke anttom, amunu dabmeeme, Kayak Ouɗi amegppa aum. “Doye! Danab ewam ag na mattidtteb 20amunu, na ahan noppe, ag ele ukkeg! Dabmak kuɗum aib aome. Da hei, ag uɗippig,” awa aum. 21Nug anam Pita amegppa a, Pita noa, danab amu anatta nug aum. “Laa ag mattidtteb am da iikku. Ag aɗinu uɗippig?” awa aum. Nug anam awa a, 22ag nug amegppa appig. “Kornilius, nug ban daup 100 dilag ikki daatte, nug he ig uɗimut! Nug am genab tutukku hak danab. Nug Kayaknu ebehi oh bodoetta le mette. Juda danab ah oh ag nuhignu ena elele dootteb. Amu Kayaknu engel oppiaawak laa na, Kornilius amegppa nahipnu, na Kornilius laugppa gona, na nai laala appe nug dookkunu aum amunu nug he, ig uɗimut,” aon appig. 23Ag Pita amegppa nai amu ana malaeg, nug a, ag lag ooppa noeg, tuqan amuppa nug dabmadette, wagɗe deɗ amuppa nug ele oh ukkaegeg amu, Jopanu danab, Jesusnu oolagppa genab dooppig ele, ag oolagppan laala ele ahaeg, oh goppig.

Pita Kornilius laugppa ukkom

24Aria ag gona, tuqan laippu ibppa niiona, ahan gona Sisaria teppig. Kornilius nug amelag ma dayaya, nuhikkud tiig laippu, amu nug laikkudnab ele, nug ag onilagppa e uɗieg, ag ele qagmena daappig. 25Ag qagmen daaegeg, gona tena, Pita nug Kornilius laug ooppa no, Kornilius nug doa, Pita noobppa paha gateg qaun o, gomela, binag meum. 26Nug anam heum, amge Pita nug Kornilius hume ahehe, Pita nug amegppa aum. “Hibaitte! Da ele am danabib,” awa aum. 27Am Pita nug Kornilius ele nai mattiiya, lag ooppa noya, Pita nug danab ah kuɗum qagmena daaegeg anattom. 28Pita nug kuɗum daaegeg anatta, nug amelagppa aum. “Ig Juda amu ihinig ɗo ɠagattag laa am Juda danab laa nug iitta aɗi laa ele oh ouqak laippu ii daamya, o Juda laa amu nug iitta aɗi laa ele gumitta ii wama, amge Kayak Nug da ippuniɗom, da danab laanu inam laa ii apa. ‘Da am Juda danab amunu Kayak amegppa da iitta aɗi amu da nug eɗidttem!’ Da anam awe ii apa. 29Amunu haen ag da gumatte uɗikkulnu onilppa eppig amu, da ahilag ewak amu tappai ii neum. Iitta! Ag da uɗikkulnu appig am da iikku uɗimi. Aria, ag da onilppa eppig, ag amunu diig nakok appeg dookkulnu ool daatte,” awa aum. 30Awa a aria Kornilius aha, nug keeke nuhigppa be anttom amunu mattia inam aum. “Keeke anidmi amu gemu deɗ waɗele iikku ukkom am inam. Da laulppa dayeye, da tueb, aam ameg ewamppa haen gemu inam iikku bia aakku da unuqittitti, danab laa, nuhig lamen am amahlaknab ele, nug da noolppa hibaitta 31nug aum. ‘Kornilius, Kayak Nug nahip unuqittak doya, amu na daɗek danab ehanadttem amu ele anttom. 32Amunu na heppe, danab laala Jopa gona, danab Saimon, nug onig laa Pita, appeg uɗiaɗ! Danab amu nug Saimon, doɗ gaɗa beɗamanu babaittak danab, nug laug amu yu ihippa daatte ele amu, nug danab amu ele daattep,’ awa aum. 33Nug anam a amu da paha hei, danab laala na omaidkkulagnu ukkaeg, am na ena hena uɗime. Aria, ig oh Kayak noobppa inam daatta amu, Naɗi nuhig nai oh Nug na appe doognignu a doome ele amu, na appe doognignu daattem.” Kornilius nug Pita amegppa anam aum.

34Kornilius nug nai mattia male amu, Pita nug inam awa aum. “Amu genabnab, gemu da doottem, Kayak Nug danab mamekkud aɗi am aun dabmaama, diig amunu Nug danab laa awa, laa geɗitta ii hette. 35Iitta. Kayak Nug danab buɗub ohppanu laa ag nuhignu ebehilag oh bodoetta le mette, ag kobol genab tutukku ele hetteb amu, Kayak Nug ag diiadtte. 36Nai amunu diig am Jesus Kristus, Nug wan ohppan dilag Naɗi daatte amu, Nug nuhig uɗat okkaippa maɗoɗ daakkunu ib ooɗe, Kayak Nug maɗoɗnu Nai Ena amu me, Israel dilagppa uɗiom, am anamib daatte. 37Ag keeke laa tumaiib Galili appa digme ukke, Juda wan ohppa beum amu, ag dootteb. Amuam Layattak Jon nug layattaknu nai mehuqe, 38dimppa Kayak he, nuhig Ouɗi Nug Jesus, Nasaret ted, Nug ooppa ambe, ɠagattag okkai ele mettom amunu, Nug Galili appa digma, aabaab oiyaya, danab ah ehanatte, danab oh Satan he ena ii daappig ele amu, Nug bappalatte, ag eɗun ena daappig. Aɗinu? Kayak Nug ele daapiɗ,” awa aum. 39Pita nug anam ana, nug nai amu tuɗitta aum. “Amu Jesus Nug Juda wanppa, amu Jerusalem aab okkaippa ele, Nug aɗi oh heum amu, ig totol danab ig amunu aɗi heehe anttomnu mattiak danab daattem. Jerusalem appa amu, ag Nug ad emaitakppa atuleg mauhom, 40amge deɗ ewamppa Kayak he, Nug eɗua hibaitte, danab laa ag Nug anidppig. 41Danab oh ii anidppig. Iitta! Ig laala, ig Nug anidta, aɗi heehe anttomnu mattiak danab daagnignu, Kayak Nug ig tituanikkom ele amu, Nug ig gumikka uɗie anidmut. Nug hibaitte, dimppa ig Nug ele ee, le ele lamut. 42Amu Nug ig nai ena mehuqkkunignu ana, ig danab ah amelagppa Kayak Nug Jesus dimppa mauhak aɗi, bau dayak aɗi ele epeɗiadkkunu tituanittom, Nug ig nai amu ele mehuqkkunignu haknunab nai ig mekkom. 43Nuhignuib propet ag inam yaappig. ‘Aun aɗi ag Jesusnu oolagppa genab dootteb ele amu, Kayak Nug, Nug onigppa, hipunin ahilag uhuqa madakku.’ ” Pita nug anam aum.

44Pita nug nai mehuqeqe, Kayak Ouɗi Nug danab oh ag Kayak nai dooppig ele, Nug ahilagppa neum. 45Am Juda danab ag Jesusnu oolagppa genab dooppig, ag Pita dim lamidna uɗippig ele, ag Kayak Nug Kornilius aɗi, ag iitta aɗi danab, Nug nuhig Ouɗi Juda danab mattom bianab, Nug iitta aɗi ag ele mattom anidna, ag ottaina dabmak kuɗum aoppig. 46Anam amu, Juda ag iitta aɗi amu ag nailag digdigppa nai mattinna, ag Kayak binag meegeg anidppig. Keeke amu beum, amu Pita nug aum. 47“Amu laa nug danab imu ag layattak aoglagnu gun mekkunu elelete? Ag Kayak Ouɗi ig aomut amubiaib aoppig,” awa aum. 48Nug anam awowa, danab haen amuppa Kayak Ouɗi aoppig amu, nug ag Jesus Kristus onigppa layattak aoglagnu haknunab nai aum. Nug anam a, ag aona, ag nug amegppa appig. “Na ig ele deɗ laala ele daagnignu oonig hette,” aon appig.

Currently Selected:

Aposel 10: NB

Highlight

Copy

Compare