Aposel 5

Ananias Sapira ele

1Amu danab laa onig Ananias, nug wau onig Sapira, nug wan laih me, danab laa awe, nug men doɗo awom. 2Nug men doɗo awa, laih amu nuhig piɗe me dayeye, nug men doɗo laih amu awa uɗia, totol danab 12 matta, “Wan dahilnu nob oh iikku,” awa aum. Nug wau nug amu hekkunu dabmeum doya, anam hekkunu elele aum. 3Nug anam a amu Pita nug aum. “Ananias, aɗinu Satan na ootppa ambe, na Kayak Ouɗi amegppa hambuppuak nai mattinna, ‘Da wan mei, laa nug daden me, men doɗo aomi amu oh iikku,’ ame, amge na laih nahip daakkunu piɗe mee dayeye, laihib aon uɗime? 4Na tatam wan amu laa aokkunu ii meeme, am nakka nahip dayom. Am dimppa na ae, daden meeg, men doɗo amu ele nahipib dayom. Amu aɗinu na kobol amu hekkutnu ootppa dabmeme? Na heme amu danab ii buppuidme. Iitta. Na Kayak amegppa hambuppuak nai mattime,” awa aum. 5Aria, haen Ananias nug Pita nai aum amu doya, nug na qa mauhe, danab oh ag amunu nai doona amu, ag huan baɗappig. 6Aria, nid bau ag ahan dona, lamen laappa beɗu hautna, aon gona boumppig.

7Amu aam ameg ewam anam ukke, Ananias wau nug uɗia, lag ooppa noum. Nug gamunu aɗi beumnu nai laa ii doyom. 8Nug uɗie, Pita oɗ metta aum. “Na appe doyei! Attemu? Ahilah wannu daden nob amu elele iikkuibte?” awa aum. A am ah nug aum. “Amu aakkuib,” awa aum. 9Ah nug anam a, Pita nug amegppa aum. “Amu aɗinu aa oh nai laippu mattiya, aa Naɗinu Ouɗi ma anttak mettaglahnu hepiɗ? Doye! Danab ag na gamut boumona, geha iikku eɗun doppig, ag odppa hippaidppig daatteb, geha ag na ele boumidkkulagnu mawidkkulag,” awa aum. 10Pita nug anam aawo, ah amu laippun nug baegppa na qa mauhe, nid bau ag lag amu ooppa nona, ah mauhom anidna, ag aon maon gona, gamu boumppigppa ouqen boumppig. 11Amu kobol amu be, Kristen tamaniaknu danab ah oh, amu danab ag keeke amunu nai dooppig ele, ag ele huan baɗappig.

Totol danab ag danab bappaladppig

12Aria, haen amuppa danab ah oh ag Jesusnu oolagppa genab dooppig ele ag hanhan Kayaknu mettid lagnu aɗ ooppa, aben laa Solomonnu Aben atteb, amuppa qagmedappig. Qagmenan oinna, totol danab 12 ag aabppan danab oolagppa Kayak dabmettaknu kobol danab haknu elele iitta kuɗum digdig, amu uɗat ɠagattagnab ele heppig. 13Anam amu, laa ag ag eheɗ ii hadappig. Iitta. Aabppan danab ah ag ahilagnu oolag enaib dayom. 14Ag oolagppa ena daye, danab ah ele kuɗumnab ag Jesusnu oolagppa genab doona, ag Kristen tamaniak ooppa goppig. 15Aria, totol danab 12 ag kobol danab hekkunu elele iitta heeg, danab laala ag oɗe danab amu qaɗaqaɗppa akkan uɗin, ib daugppa maatteg niippig. Amunu diig am Pita oiyebeb amu, nuhig itotog oɗe danab qaɗelagppa ukkeb ena daaglagnu oolag dayom. 16Ag anam heeg, danab ah kuɗumnab, aab laala Jerusalem guguittak daatteb, appan ag ele ahan, danab oɗe ele, amu danab ouɗi nau ele akkan uɗiegeg, ag oh eɗun ena daappig.

Laa ag totol danab eheɗ hadappig

17Ag anam heeg ukke amu, mana mettak ikki danab, nuhikkud ehanittak danab oh, ag am ɗo gumak danab-Sadyusi oolagppanu amu, ag ele, ag totol dilagnu, ihinigppa anam daalon dabmak aɗan daappig. 18Anam amu ag ahan, totol danab 12 aɗualadna, danab oh dilag maniguittak, ag amuppa maadppig, 19amge tuqan amuppa Naɗinu engel nug maniguittak lag od matula he dimittim doeg, nug amelagppa aum. 20“Ag eɗun gona, Kayaknu mettid lag ooppa nona, danab ah amelagppa Kristen bau oiyaknu diig, amunu mehuqppeg doyeg!” awa aum.

21Engel anam a amu wagɗe buttuanab totol danab 12 ag ahan gona, Kayaknu mettid lag ooppa nona, danab ah amelagppa engel nai akkulagnu aum ele, ag nai amu danab ah ippunadppig. Amu totol danab 12 ag Kayaknu mettid lag ooppa daaegeg, mana mettak ikki danab amu nuhikkud ehanittak danab ele ag qagmena, Juda dilag hettoɗiak okkai onig Sanhidren, amunu danab, amu Israel dilag ikki danab oh onilagppa eeg, ag uɗieg, ag ahilag daup ag maniguittak lakka gona, totol danab 12 diin uɗiglagnu appig. 22Ag aeg, daup ag maniguittakppa goppig, amge totol danab 12 ag appa ii daappig anidna, ag eɗun qagmeppigppa gona, ag keeke attem attem anidppig amu aeg dooppig. 23Ag inam appig. “Ig gota, maniguittak lag amu od lok ɠagattag aqak daaegeg, daup ag od oh gumappig anidmut. Aria, haen ig od matulmut amu, ig lag ooppa danab laa daaegeg ii anadmut,” aon appig. 24Anam aeg doona, aria mana mettak ikki danab amu ban daup Kayaknu mettid lag gumappig dilag ikki ele ag dabmak kuɗum aonna appig. “Keeke attemtai laa ana daakkutai,” aon appig.

25Amu ag anam mattiegeg, danab laa uɗia amelagppa aum. “Doyeg! Danab ag maniguittakppa inadppig ele amu, ag Kayaknu mettid lag ooppa danab ah ippunittak nai madatteb,” awa aum. 26Danab amu anam a doona, ban daup ikki anuqak, amu nuhikkud ban daup ikki laa ele ag gona diippig, amge ahilagnu eheɗ laa ii heppig. Aɗinu? Ag baɗan inam akka akka appig. “Ig ag makkuɗadpput amu, danab ah ag ig menppa iqaglagtai,” aon appig.

27Ag anam ana, diin uɗin heeg, hettoɗiak okkai onig Sanhidren, amuppan danab noolagppa hippaidna daaegeg, mana mettak ikki danab nug amelagppa aum. 28“Amu ig ag amelagppa ag Jesus onigppa nai baula danab ah iinab ippunadmananu amut. Aɗinu ag anam heegeg, danab ah oh Jerusalem daatteb ele aakku dooppig. Amu ag danab ag ihinignu, ‘Jesus Nug danab ena, ag qeeg mauhom,’ aon akkulagnu dabmak aoeg ɠagattag eppom daatte,” awa aum.

29Nug anam a amu Pita nug totol danab 12 ele ag oh eɗun appig. “Kayaknu nai, amu danab dilag nai ele aa laippu iitta daattep dayeb amu, ig Kayak nai dim lamidkkunigoitte. 30Amu ag Jesus ad emaitakppa atulna qeeg mauhom amu, ig mamelkad aɗi dilag Kayak Nug he, eɗua hibaittom. 31Jesus Nug heeb, ig Israel ig oonig eɗueb, Kayak Nug ihinig hipunin uhuqa megakkunu Kayak he, Jesus Nug Kayak eppeg naɗiap, amuam aben onig okkainab ele, Nug appa ihinig Okkai, ihinig Eɗua Awikkak Danab ele daatte. 32Amu ig keeke amu ohnu aɗi heehe anttomnu mattiak danab daattem. Kayak Ouɗi ele nai amunu mehuqa atte. Kayak Nug danab ah ag nai nuhig dim lamidtteb amu, Nug nuhig Ouɗi madatte,” aon appig. 33Ag nai amu aeg doonna, ag oppoɗilag be amelag kokoɗ eppe, totol danab 12 aqappeg mauhkkulagnu appig.

Gamaliel totol danab ehanattom

34Ag anam hekkulagnu appig, amge Juda dilag hettoɗiak okkai onig Sanhidren, amunu danab laa aha hibaittom. Nug am ɗo gumak danab-Parasia onig Gamaliel, amu nug ele am ɗo mehuqak danab. Danab ah oh ag nug binag humappig. Nug aha, ag laa amelagppa ag totol danab 12 appeg, dimittim haen tutunu gokkulagnu haknunab aum. 35Nug a, ag heeg, totol danab ag dimittim ukkaeg, nug okkai danab laa daappig amu amelagppa aum. “Ag Israel danab, ag kobol aɗi danab imu dilag hekkulagnu hetteb amu ag dabmeig! 36Aɗinu? Ag imu dootteb. Matu haen Teudas nug aha, ‘Da danab okkai,’ ana, nug nukka binag ma hambuppualatta he, danab 400 ag ahan dim lamidppig. Amge gabman nug Teudas qe mauhe amu, danab ag nuhignu oolagppa genab dooppig ele, ag ele matatun ukkaeg, nuhig uɗat aakku iitta meum. 37Amu Teudas onig iitta me, nug heum bia haen gabman nug danab ah onilag yeeye, Galili ted Judas nug aha, danab ah laala biilagppa ya he, ag nug dim lamitteg gona, Rom dilag gabman lamidkkulagnu ban heppig. Amge nug ele qe mauhe amu, danab oh nug diie oippig ele ag matatun goppig. 38Ig amu anam anidmut amunu, da ag amelagppa attem. Ag danab aɗalatteg daatteb umu amu, ag uuadppeg dayeg! Uuppeg, ag daanna hebeppeg, keeke amu diig am danabnu dayeb amu, geha na qeeb, iitta mekku. 39Amge genab Kayak Nug keeke amu he bette amu, ag Nug ippu oo nekkulagnu am elele iitta. Ag anam hena amu, ag aakku Kayak ele ban hekkulag,” awa aum.

40Gamaliel nug anam a, ag nuhig nai dim lamidna, totol danab 12 ii aqappig, amge ag diin ag, laa ag bu qaun eleppa eheɗ mataɗattona, nai Jesus onignu amu ii mattimnanu haknunab nai ag amelagppa awona, heeg goppig. 41Ag anam heeg, totol danab 12 ag Juda dilag hettoɗiak okkai onig Sanhidren, amuppanu dimittim gona, ag maɗoɗppan gamag ahak doona, inam dabmeppig. “Kayak Nug ig Jesus onignu uɗa nak, guittak ele aognignu elele anikkom amu, amuam ena.” Ag anam dabmeppig. 42Anam amu, deɗ oh ag Kayaknu mettid lakka, amu danab ah laulagppa ele oina, Jesus Nug am Kristus, amu mehuqnana ippunadppig. Ag Nai Ena mehuqkkulagnu ii uuppig.

Currently Selected:

Aposel 5: NB

Highlight

Copy

Compare