RUM 8

Mudip dalem Berua Tuhan

1Naʹkini aheʹ iaʹ mudip pebulung dalem Keristus Yesus, abeʹ ne penyalaʹ un nyalet ukum neng ida laʹa. 2Moʹ layan puyan Berua Tuhan iaʹ ngkin udip milu dalem Yesus Keristus, ia iaʹ nakau akeʹ cen layan puyan penyalaʹ ngan patai ina. 3Un pemuyan iaʹ Katuk Adet ina abeʹ un senteng ke uyan moʹ o supeʹ kuʹun penyaheʹ usa kelunan, sukat sepe Allah ban uyan ne. Allah iaʹ ban pebetep ukum neng penyalaʹ iaʹ un dalem penyaheʹ usa kelunan. Pekini ie uyan ne: ia cuk Anak ke tengen nai ngaliu kelunan, iaʹ un penyaheʹ usa koʹ baʹan diseʹ penyaheʹ usa kelunan iaʹ sangan penyalaʹ, nuyan ncai petutung tuman penyalaʹ. 4Pekina puyan Allah, apan tai dengkep ne mung peneneng Katuk Adet, moʹ abeʹ le mudip bayaʹ penyaheʹ usa kelunan laʹa, di lareʹ ilu mudip bayaʹ dau Berua Tuhan. 5Aheʹ diaʹ mudip bayaʹ penyaheʹ usa re, seʹ de pele penyaheʹ usa re ngkang kimet de. Aheʹ diaʹ mudip bayaʹ dau pengubaʹ Berua Buheʹ ina, seʹ de pele Berua Buheʹ ke ngkang kimet de. 6Buk kimet cem pele penyaheʹ usa hem, ketai ubo ho patai. Buk kimet cem pele dau pengubaʹ Berua Buheʹ ina, ketai ubo ho udip ngan udip iaʹ tadan. 7Ngan pekini kelunan ketai pebunoʹ ngan Allah, buk kimet de ke pele pengubaʹ penyaheʹ usa re, moʹ abeʹ de tunuk bayaʹ dau adet Allah. Sematu re abeʹ un sukat. 8Aheʹ diaʹ tunuk bayaʹ penyaheʹ usa re dina, abeʹ nyatan nte tai sihoʹ neng pengubaʹ Allah.

9Di lareʹ ikem dini, abeʹ kem mudip pele penyaheʹ usa hem. Ikem mudip bayaʹ dau Berua Buheʹ buk lan ne un Berua Allah mudip kedalem usa hem. Buk aheʹ diaʹ abeʹ un Berua Keristus, abeʹ Keristus un ida lepe. 10Buk Keristus un mudip kedalem usa hem, naʹ pe usa hem ke matai lete kuʹun penyalaʹ, un sepuʹo Berua Tuhan iaʹ ngkin ikem mudip, moʹ kem lepa tai teneng ngan Allah. 11Buk Berua Allah iaʹ ban pudip Yesus cen patai ie un mudip dalem usa hem, ia iaʹ pudip Keristus ne, ia te iaʹ ke pudip usa hem iaʹ laho ke salai ini. Puyan ina Allah uyan man Berua ha iaʹ mudip dalem ikem.

12Moʹ ban pekina cenganak keʹ, ilu dini jangan tekaʹ tawai le. Abeʹ e janga tawai neng penyaheʹ usa iaʹ cuk ilu mudip bayaʹ pengubaʹ a. 13Buk kem mudip bayaʹ penyaheʹ usa hem, atek kem ke matai lete. Di lareʹ buk kem kanan Berua Tuhan ina, man ncem lematai pemuyan ncem diaʹ jaʹat, atek kem ke mudip lete ʹo. 14Mele aheʹ diaʹ pele Berua Allah ngkin ida, ida ne diaʹ anak Allah. 15Moʹ Berua iaʹ Allah ban naʹ mikem ina, abeʹ e cuk ikem ketai ulaʹ tunuk neng puyan takut laʹa, di lareʹ Berua ina iaʹ ban uyan ikem anak Allah. Laʹa kuʹun penyukat Berua ina, ilu ngelengap palaʹ Allah: “Amai, Amai heʹ.” 16Berua Allah iaʹ petuk ngan berua le, apan ne badaʹ ilu dini tugen ban anak Allah. 17Moʹ le anak ke, inu iaʹ Allah ban pedemun me diaʹ anun ne, ilu ke un ne. Ngan inu iaʹ Allah pedemun me Keristus, ke pemung pe ilu ke un ne ngan ne pelaʹa. Moʹ buk le pemung penuyen ngan Keristus, ilu lete ke pemung ngan ne dalem serema peniga ha ʹo.

Serema peniga iaʹ kenai luhaʹ bayaʹ

18Moʹ tekaʹ kihoʹ keʹ, un penuyen iaʹ ilu tegoʹ ngajan le mudip ini, buk le pata ha ngan serema peniga iaʹ kenai luhaʹ neng ilu bayaʹ, coʹ laleʹ tekajaʹ a. 19Mung inu diaʹ kentaʹ langit ne diaʹ ban Allah uyan, bioʹ tebelum nte mengaʹ Allah ke peluhaʹ diseʹ de diaʹ anak ke. 20Moʹ mung inu iaʹ Allah ban uyan, lepa tai tampun kuʹun pemuyan iaʹ abeʹ un tuman tuman. Abeʹ e ban kuʹun pengubaʹ de tengen, di lareʹ moʹ Allah iaʹ ban cuk ida tai pekina puyan nte. Naʹ pia pekina, abeʹ e tai pesau tebelum ini: 21dalau ketai kebayaʹ a ʹo, mung inu ban pemuyan Allah, ke takau re cen iaʹ jaʹat, iaʹ ban nyalut ida. Ketai re pemung ngan diaʹ anak Allah neng serema peniga udip de iaʹ pejo. 22Moʹ tisen te ilu ban mung inu iaʹ pemuyan Allah keta ngan ngerahing pabeʹ naʹkini, koʹ baʹan leto iaʹ sakit nganak are. 23Abeʹ e bang dina tuaʹ le. Ilu diaʹ ban un Berua Buheʹ, ca pengencai iaʹ ading Allah naʹ milu dini, ilu lete diaʹ ngerahing dalem pengudip le, ngajan le pekena Allah ke pedaʹam puyan ne ke uyan ilu anka ke, pa ha ke nakau usa le cen iaʹ jaʹat. 24Moʹ kuʹun tebelum le, ilu un udip iaʹ pudip ilu dalem Tuhan. Un sepuʹo buk lepa ne ilu alaʹ iaʹ ilu nebelum, abeʹ un tebelum kidi laʹa. Moʹ aheʹ diaʹ caʹ nebelum neng inu iaʹ ia lepa alaʹ tupe? 25Di lareʹ buk le nebelum neng inu iaʹ ilu abeʹ un alaʹ lepe, pedenaʹ tawai le pekena ha.

26Pekina lete Berua Tuhan ina ke mepo ilu eng pengelemaʹ le, moʹ le abeʹ un tisen kumpin seʹ iaʹ tekep ilu ke lemameʹ. Atek Berua ina tengen iaʹ taten nyat neng Allah milu ngan dau kerahing, iaʹ ilu supeʹ ke badaʹ. 27Un Allah iaʹ mile kedalem penawai kelunan, ia ngetisen inu iaʹ kimet Berua Buheʹ ina. Moʹ Berua Buheʹ ina lemameʹ Allah me diaʹ anun ne, bayaʹ ban pengubaʹ Allah.

28Tisen ne ilu ban neng mung inu iaʹ nuyan, Allah iaʹ mepo aheʹ diaʹ malaʹ neng ia, uyan ne ca peniga. Allah nengangan mengin ida dina bayaʹ kimet te. 29Moʹ aheʹ diaʹ Allah ban nekena lemileʹ are, ida diaʹ Allah ban pelaya pe ke tai pekaliu koʹ baʹan layen Anak ke ne. Idi Anak ke ne ke tai nuyan Anak ading neng ahang kadoʹ cenganak ke. 30Un diaʹ Allah ban pelaya dina are, ida te Allah ban mengin pelaʹa. Un diaʹ Allah ban mengin dina, ida pe diaʹ Allah ban peteneng ngan ne pelaʹa ʹo. Un diaʹ Allah ban peteneng dina, Allah ngahum nte pemung ngan ne dalem serema peniga ha.

Cen Keristus luhaʹ seʹ Allah malaʹ ilu

31Inu ne iaʹ ke baʹan dau le neng mung puyan ini tupe? Buk Allah iaʹ payo ngan le, aheʹ iaʹ senteng ke ti ngan le ne? 32Abeʹ pe ia maʹam Anak ke ne. Ia mencai ia me ilu mung. Lepa ne ia naʹ Anak ke milu: inu laleʹ e abeʹ un ke naʹ tuaʹ mung inu inu milu lene. 33Aheʹ iaʹ ke mekem salaʹ neng ida diaʹ Allah ban lemileʹ dina tupe? Buk Allah iaʹ peteneng ida, 34abeʹ un aheʹ iaʹ senteng mekem salaʹ neng ida laʹa. Keristus Yesus iaʹ lepa matai idai, ngan Allah pudip ia laʹa: un te ia tahaʹ taʹu Allah, ngan ia iaʹ lemameʹ neng Allah me ilu naʹkini. 35Buk pekina, aheʹ iaʹ senteng ke petat ilu cen pengemalaʹ Keristus tupe? Penaru mo, ngan keta mo, ngan tuyen mo, ngan lien mo, ngan kasip gelam mo, ngan penusa mo, ngan sihoʹ bahing ayau mo, nyahut dina senteng ke petat ilu cen pengemalaʹ Keristus ne. 36Koʹ baʹan dau Kitap Tuhan:

“Moʹ kuʹun ncoʹ Tuhan, ameʹ lemuto un tenup tekaʹ ke nyeripa patai.

Seʹ meʹ koʹ baʹan dumba diaʹ pekena dulu ke nebek are.”

37Lan te, dalem mung puyan ini, ilu iaʹ atek un usun ne moʹ kuʹun Keristus iaʹ ban malaʹ ilu. 38Abeʹ keʹ babak tekaʹ, nyahut un inu iaʹ senteng petat ilu cen pengemalaʹ Allah ne, naʹ pia patai, naʹ pia udip, naʹ pia melikat, naʹ pia bali iaʹ ngkang usun tanaʹ, mele inu penyukat diaʹ ca, naʹ pia puyan iaʹ un naʹkini, pekina pe iaʹ kenai bayaʹ ʹo, abeʹ senteng; 39naʹ pia diaʹ kempau ngan diaʹ kentaʹ, mele pe inu inu iaʹ ca iaʹ nuyan kusun tanaʹ, abeʹ dina senteng ke petat ilu cen pengemalaʹ Allah iaʹ ilu ban un dalem Keristus Yesus iaʹ Tuʹa le.

Currently Selected:

RUM 8: KNT

Highlight

Copy