RUM 5

Puyan tai teneng ngan Allah

1Lan te, teneng ne ilu ngan Allah kuʹun pengelan le, ina ukoʹ le un udip iaʹ tadan ngan Allah moʹ kuʹun Tuhan le Yesus Keristus ne. 2Ban kuʹun pengelan le, ia ngkin ilu tai kedalem pengelesau Allah iaʹ ia lebang naʹ milu ina, iaʹ ukoʹ le mudip naʹ kini. Bangen pe tekaʹ le laʹa moʹ le nebelum ke kahum neng serema peniga Allah ʹo. 3Ca ukoʹ le bangen laʹa, neng penaru le, moʹ le tisen penaru ina ke cuk ilu nengayet. 4Ngan puyan tengayet ina ke uyan kimet iaʹ pali, ngan kimet iaʹ pali ina ke nyalet tebelum le. 5Abeʹ tebelum ina ke pebahoʹ ilu, moʹ Allah ban lebang meseʹ pengemalaʹ a kedalem penawai le, kanan Berua Buheʹ iaʹ pengencai Allah milu.

6Dalau le caʹ supeʹ kuʹun penyalaʹ, ngan dalau ketai ie sihoʹ tuket Allah, Keristus matai tuman ilu diaʹ ban muau ia. 7Mencat laleʹ le dulu diaʹ ubaʹ ke matai saliu ca usa iaʹ teneng. Selu un pe iaʹ metek ke matai buk ke saliu ca usa iaʹ tiga saheʹ. 8Di lareʹ Allah peluhaʹ kumpin seʹ e ban malaʹ neng ilu: moʹ dalau le petem kelunan penyalaʹ are, Keristus iaʹ ban matai saliu ilu. 9Moʹ kuʹun patai Keristus ne, ilu tai teneng ngan Allah. Tahaʹ tai kina pelaʹa, pali kuʹo ke Keristus ke pudip milu neng kenca Allah. 10Lan pe ilu ban bunoʹ Allah ading nte are, un nuʹo Allah uyan udip ilu kuʹun ban patai Anak ke ne. Naʹkini pelaʹa, uʹo ho uyan udip ina, pali kuʹo ke udip Keristus ke pudip ilu, moʹ o mudip dalem ilu. 11Abeʹ e pa ina tuaʹ le, un pelaʹa atek bangen le kedalem Allah kuʹun Tuhan le Yesus Keristus ne, moʹ ia iaʹ uyan udip le senteng ketai pemung ngan Allah.

Tepun le Adem, ngan Keristus

12Penyalaʹ ban nai kaʹ usun tanaʹ kuʹun ca kelunan, ngan penyalaʹ ina ngkin patai pemung ngan ne. Kuʹun ina, ketai patai petabin neng ilu mung moʹ mung le uyan penyalaʹ. 13Kena kenai Katuk Adet are, ban un ne penyalaʹ kusun tanaʹ ini. Un sepuʹo abeʹ Allah pecap penyalaʹ dalau ina, moʹ abeʹ lepe Katuk Adet un. 14Cen dalau udip Adem te, pa abeʹ udip Musa ne, patai ina ngaren mung kelunan, naʹ pe palai mida dina abeʹ un ti penyalaʹ koʹ baʹan puyan Adem iaʹ muau dau katuk ukum Allah are.

Un Adem ne nuyan ca kelingai neng Keristus iaʹ ke nai bayaʹ. 15Un sepuʹo tekajaʹ laleʹ de dua. Moʹ pengencai Allah iaʹ ia lebang naʹ ina, abeʹ e koʹ baʹan penyalaʹ Adem are. Lan te kadoʹ kelunan ban matai kuʹun penyalaʹ ca usa tuaʹ le. Di lareʹ bioʹ neng ʹo ina pelaʹa pengelesau Allah iaʹ ia lebang naʹ milu are, pekina pe pengencai ie iaʹ ia lebang naʹ me kadoʹ kelunan, iaʹ nai kuʹun pengelesau ca usa kelunan le, iaʹ ina Yesus Keristus. 16Tengen ca seʹ puyan pengencai Allah ina neng puyan penyalaʹ iaʹ ca usa idai. Moʹ kuʹun penyalaʹ ca usa, kenai puyan iaʹ nyalet ukum. Un sepe puyan pengencai pengelesau Allah nai sihoʹ kadoʹ dulu diaʹ un penyalaʹ, iaʹ ke uyan ida teneng. 17Lan te kuʹun penyalaʹ ca usa idai, ina tading patai ke ngaren kelunan. Bioʹ neng ʹo ina pelaʹa ban puyan ca usa, iaʹ ina Yesus Keristus. Moʹ mung le diaʹ alaʹ pengelesau iaʹ Tuhan Allah lebang naʹ milu, ngan pengencai peneneng nge ina, ilu iaʹ ke ngaren udip moʹ kuʹun Keristus ina.

18Moʹ ban pekina, ca le penyalaʹ iaʹ nyalet ukum neng kelunan mung, pekina pe ca le pemuyan iaʹ teneng ina iaʹ uyan mung le tai teneng ngan Allah neng pengudip le. 19Un pelaʹa, kadoʹ dulu tai nuyan kelunan penyalaʹ kuʹun puyan ca usa iaʹ muau neng Allah, pekina pe kadoʹ dulu ke tai nuyan kelunan teneng ngan Allah kuʹun puyan ca usa iaʹ tudep bayaʹ dau Allah.

20Tuhan Allah naʹ Katuk Adet apan ne peluhaʹ ngan badaʹ penyalaʹ. Un sepuʹo kaʹ mpi kadoʹ kenai penyalaʹ luhaʹ, kaʹ ina lete kadoʹ kuʹo ban pengelesau Allah nai luhaʹ. 21Koʹ baʹan penyalaʹ ina ban ngaren ilu dalem patai, pekina lete pengelesau Allah ngaren ilu dalem peneneng nge, iaʹ naʹ ilu neng udip iaʹ saheʹ kelineʹ iaʹ ngeriman kuʹun Yesus Keristus, Tuhan le.

Currently Selected:

RUM 5: KNT

Highlight

Copy