PUYAN LUHA’ 22
22
1Melikat ina lete peluhaʹ makeʹ pelaʹa alo sungai ngeriman iaʹ ngelilep koʹ baʹan seʹ batu mening are, iaʹ nai cen padung pengaren Allah ngan Anak Dumba ina, 2ngan nai ngalo tegoʹ beluaʹ janan lepoʹ ina. Seripa sungai ina un kayu ngeriman iaʹ ngebuʹan puloʹ dua liwai ca uman, ca liwai ca bulan, ngan un tung nge tuman ban paget singket gaham perinta kelunan. 3Abeʹ un inu iaʹ Allah lepa mudoʹ ke kahum dalem lepoʹ ina.
Padung pengaren Allah ngan Anak Dumba ina ke un dalem lepoʹ ina. Ngan kina pe diaʹ pegayeng mia ke lemameʹ palaʹ ia. 4Ida ke taʹan pe silung nge, ngan ngadan ne ke senurat neng anang nte. 5Abeʹ un alem kina laʹa. Ngan abeʹ un ida titin kanan pelitaʹ, ngan neng dema tau, moʹ Tuhan iaʹ atek ngedema ida, ngan ida ke ngkang pengaren koʹ baʹan laja pa majan.
Puyan kenai Yesus
6Dau melikat ina neng akeʹ: “Ini tiraʹ iaʹ teneng ngan iaʹ tekep ilu semamet ngelan. Moʹ Tuhan Allah iaʹ naʹ Berua ha me pegawa dina, lepa ne ia cuk melikat te nai peluhaʹ me diaʹ pegayeng mia inu puyan iaʹ atek kenai palup laho ʹo.”
7Un dau Yesus: “Ngeringa hem, kenai heʹ laho ʹo. Bangen saheʹ le kelunan diaʹ bayaʹ dau tiraʹ iaʹ badaʹ seluhan kimet Allah dalem Kitap ini.”
8Akeʹ ini Yaya iaʹ lepa kenahan ngan taʹan mung puyan ini. Ngan tegoʹ keʹ muʹo kenahan ngan taʹan puyan ini, penco heʹ muʹup ke nyelama kata taket melikat iaʹ peluhaʹ puyan dini makeʹ, moʹ keʹ ke lemameʹ palaʹ ia. 9Un dau ue neng akeʹ: “Ayen ti pekina. Akeʹ pe ca iaʹ pegayeng mia pekuaʹ ngan ncoʹ lete, pemung ngan cenganak koʹ diaʹ pegawa dina, ngan mung kelunan diaʹ semamet bayaʹ dau tiraʹ dalem Kitap ini. Lemameʹ palaʹ Allah.” 10Dau ue makeʹ pelaʹa: “Ayen ncoʹ nyuhuk dau tiraʹ iaʹ badaʹ seluhan kimet Allah iaʹ un dalem Kitap ini, uban jakaʹ nyeng ne tegoʹ mung puyan dini kenai palup uʹo. 11Aheʹ kelunan iaʹ jaʹat, lemejo ne ida neng iaʹ jaʹat, ngan aheʹ kelunan iaʹ jameng, lemejo ne ida neng iaʹ jameng. Ngan aheʹ kelunan iaʹ teneng, lemejo ne ida neng iaʹ teneng, ngan aheʹ kelunan iaʹ buheʹ, lemejo ne ida neng iaʹ buheʹ.”
12Un dau Yesus: “Ngeringa hem. Kenai heʹ laho ne uʹo. Akeʹ ke ngkin bang tugung akeʹ uʹo, man nceʹ ke nyuaʹ singket usa kelunan bayaʹ uban pemuyan iaʹ ia lepa ban ti. 13Akeʹ ini iaʹ Alpa ngan iaʹ Umiga, iaʹ ading ngan iaʹ ngebayaʹ, iaʹ tading ngan iaʹ ke kuʹo.”
14Bangen saheʹ ne mung kelunan diaʹ muheʹ sapai dadoʹ re pa buheʹ, moʹ ina iaʹ ukoʹ de senteng tai uman buʹan kayu ngeriman ina, ngan penco tai pasek kedalem pamen lepoʹ kerahan ina. 15Un sepuʹo diaʹ tahaʹ awang lepoʹ ina un kelunan diaʹ ti puyan jameng, ngan kelunan diaʹ malai ngkang taban pucau, ngan diaʹ pemung nyelem, ngan diaʹ lematai kelunan, ngan diaʹ lemameʹ neng uyat, ngan diaʹ lemalo, ngan diaʹ bayaʹ puyan palo re.
16“Akeʹ ini Yesus, iaʹ lepa cuk melikat ceʹ nai badaʹ puyan ini mikem kedalem singket Mpun diaʹ ngelan Tuhan. Akeʹ iaʹ puhoʹ cen pemanak Daut. Akeʹ iaʹ betuʹen maya iaʹ dema.”
17Un dau Berua Tuhan ngan leto iaʹ ke pepeto ina kuma ha: “Nai ne.”
Mung kelunan diaʹ kenahan dau tiraʹ ini, atek de kuma ha lete: “Nai ne.”
Nai ne, mele aheʹ ia muhang, aheʹ iaʹ ubaʹ, tiga ha alaʹ sungai iaʹ ngeriman ini, abeʹ un suaʹ a.
Tiraʹ ngebayaʹ
18Akeʹ Yaya iaʹ nai badaʹ lan me ketoʹ kelunan iaʹ kenahan dau tiraʹ iaʹ badaʹ seluhan kimet Allah iaʹ dalem Kitap ini. Buk aheʹ kelunan iaʹ ke naʹ pit dalem Kitap ini, Allah ke naʹ mia mung layu iaʹ ia lepa ban pisiu dalem Kitap ini pit ukum me. 19Pekina pe buk aheʹ kelunan ke sau inu cen tiraʹ iaʹ badaʹ seluhan kimet Allah dalem Kitap ini, Allah ke sau tulat te cen buʹan kayu ngeriman, ngan tulat te neng Lepoʹ Buheʹ iaʹ ia lepa pisiu kedalem Kitap ini.
20Uban aheʹ iaʹ badaʹ tugen neng mung puyan ini, ia iaʹ ke kuma ha: “Ke pekina lan lete, nai heʹ laho uʹo.”
Amin. Nai ne, Tuhan Yesus.
21Awaʹ pe pengelesau Tuhan Yesus ke un ngan ncem mung.
Currently Selected:
PUYAN LUHA’ 22: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
