PUYAN LUHA’ 21
21
Langit iaʹ mading ngan tanaʹ iaʹ mading
1Uʹo ina akeʹ taʹan langit mading ngan tanaʹ mading. Moʹ langit iaʹ ading idai, ngan usun tanaʹ iaʹ ading idai, lepa salai ne. Ngan banget pe abeʹ un laʹa. 2Kun nceʹ taʹan lepoʹ buheʹ, Yerusalim iaʹ mading ina, kenai kentaʹ cen surga, cen Allah, koʹ baʹan ca leto petenup ngan pedengkep, iaʹ pegelam ke pepeto ngan laki ie. 3Kun nceʹ kenahan dau ca lengap bioʹ cen padung pengaren ina. Un dau ue: “Naʹkini amin Allah un pemung ngan kelunan. Atek ke mudip ngan nte, ngan ida iaʹ ketai diaʹ anun ne. Allah tengen iaʹ ke pemung ngan nte, ngan ia iaʹ atek ke Allah re ʹo. 4Ia ke lemasa mung luloʹ cen mata kelunan dina. Abeʹ ne un patai laʹa, pekina pe keta, ngan pekina pe tange, ngan pekina pe sakit abeʹ un laʹa. Moʹ mung inu iaʹ un cen naʹaʹ lepa salai ne.”
5Uʹo ina, laki iaʹ madung neng usun padung pengaren ina kuma ha: “Naʹkini mung inu akeʹ uyan mading.” Un pe dau ue makeʹ laʹa: “Nyurat ne ini, moʹ tiraʹ ini teneng. Tekep kem semamet ngelan ne.” 6Un dau ue: “Lepa palup ne. Akeʹ ini iaʹ Alpa ngan iaʹ Umiga, iaʹ ading ngan iaʹ ngebayaʹ. Mele aheʹ kelunan diaʹ muhang, akeʹ ke naʹ tuaʹ le sungai tisep cen lubang tebut iaʹ ngeriman ina. 7Aheʹ kelunan diaʹ un usun neng puyan jaʹat, ida ke alaʹ ini cen akeʹ: akeʹ iaʹ atek Allah ha, ngan ia iaʹ atek anak keʹ. 8Un sepuʹo kelunan diaʹ takut, ngan diaʹ abeʹ un tudep bayaʹ akeʹ, ngan diaʹ jameng, ngan diaʹ lematai kelunan, ngan diaʹ pemung nyelem, ngan diaʹ kanan tabat pucau, ngan diaʹ lemameʹ neng uyat, ngan mung naʹan diaʹ lemalo, un kukoʹ de kedalem bawang luten iaʹ ngelahang ngan lisan belirang, iaʹ ina ne patai iaʹ kedua ha.”
Lepoʹ Yerusalim iaʹ mading
9Nai kun ca melikat iaʹ neng ahang tujoʹ melikat, diaʹ ngkang tujoʹ kiut iaʹ sangan kuʹun tujoʹ naʹan layu iaʹ ngebayaʹ idai. Penco dau ue pisiu akeʹ: “Nai ne, akeʹ ke peluhaʹ mikoʹ leto iaʹ ke pepeto, iaʹ ina leto Anak Dumba ina.” 10Nai kun Berua Tuhan nesun neng akeʹ, penco melikat ina ngkin akeʹ kusun ca mudung iaʹ bioʹ ngan mpau. Kun ne peluhaʹ Yerusalim makeʹ, Lepoʹ iaʹ Buheʹ ina. Seʹ nai ie kentaʹ cen surga, cen Allah, 11ngan nyerema kuʹun serema peniga Allah. Serema lepoʹ ina koʹ baʹan batu intan iaʹ mahan beli, koʹ baʹan seʹ batu yasip, mening koʹ baʹan batu kelingai are. 12Un kerahan ne bioʹ ngan mpau, iaʹ un pamen puloʹ dua kidi. Un pe puloʹ dua melikat diaʹ jagaʹ a. Neng pamen dina un senurat ngadan puloʹ dua naʹan puhoʹ Israil ne. 13Tahaʹ sek tau un telu re pamen ne. Tahaʹ taʹu asat tau un telu re pamen ne, ngan tahaʹ kabing asat tau un telu re pamen ne. Tahaʹ tau lenca un telu re pamen ne. 14Kerahan lepoʹ ina pedeng neng usun puloʹ dua batu nten ne. Neng nten ina un senurat puloʹ dua ngadan diaʹ lawa Injil Anak Dumba.
15Un melikat iaʹ pisiu akeʹ ina, ngkang ca kuaʹ sekut mat, man ne nguaʹ kukoʹ lepoʹ ina, ngan pamen ne, ngan kerahan ne. 16Lepoʹ ina besageʹ e kuaʹ lengkak, dadoʹ o kuaʹ ngan berang nge. Kun melikat ina alaʹ kuaʹ a tai pekuaʹ kukoʹ lepoʹ ina. Dadoʹ o ca ibu lema ato batu, pekina pe mpau ue, ngan berang nge. 17Kun melikat ina pekuaʹ pelaʹa kerahan lepoʹ ina, dua ato puloʹ nem kaki mpau ue, bayaʹ uban kuaʹ iaʹ melikat ina kanan. 18Batu yasip tuning kerahan ne, ngan lepoʹ ina loʹ nuyan mat iaʹ buheʹ koʹ baʹan seʹ kelingai iaʹ mening. 19Mung batu nten kerahan lepoʹ ina iaʹ pegelam man mung batu intan kidi. Batu nten iaʹ ading nge un batu yasip tuning, ngan iaʹ kedua ha un batu nilam sebileng, ngan iaʹ ketelu ue un batu akik puteʹ, ngan iaʹ kepat te un batu samrut buleng, 20ngan iaʹ kelema ha un batu unam silam, ngan iaʹ kenem me un batu sardis bala, ngan iaʹ ketujoʹ o un batu ratna tuning, ngan iaʹ keaya ha un batu beril semepo, ngan iaʹ kepiʹen ne un batu tupas tuning, ngan iaʹ kepuloʹ o un batu kaseduni bileng, ngan iaʹ kepuloʹ ca ha un batu lasuadi semepo, ngan iaʹ kepuloʹ dua ha un batu kecubung silam. 21Puloʹ dua pamen dina puloʹ dua batu mutiara lete, moʹ singket pamen dina nuyan cen ca le batu mutiara. Janan lepoʹ ina mat iaʹ buheʹ koʹ baʹan seʹ kelingai iaʹ mening.
22Abeʹ keʹ un taʹan ca umaʹ palan dalem lepoʹ ina, moʹ Tuhan Allah iaʹ Atek Bioʹ Penyukat ina, ngan Anak Dumba ina ne umaʹ palan nte. 23Lepoʹ ina abeʹ titin mata tau un, ngan bulan un, ke ngedema neng idi moʹ serema peniga Allah iaʹ ngedema ha, ngan Anak Dumba iaʹ seleket pelitaʹ a. 24Mung kelunan kusun tanaʹ ke masat kuʹun dema ha, ngan mung diaʹ laja kusun tanaʹ ke ngkin kayaʹ de kedalem lepoʹ ina. 25Pamen kerahan lepoʹ ina peketo pesik utung tau, nyahut te abeʹ un ke pekep ne, moʹ abeʹ alem ke un kina. 26Pengaren ngan kayaʹ mung lepoʹ ne, ida ke ngkin kedalem lepoʹ ina. 27Un sepuʹo abeʹ senteng inu penginteʹ tai kedalem lepoʹ ina, pekina pe aheʹ kelunan iaʹ uyan puyan jameng ngan lemalo. Bang kelunan diaʹ lepa un ngadan senurat dalem surat mudip iaʹ anun Anak Dumba ina, ida le iaʹ senteng ketai kedalem lepoʹ ina.
Currently Selected:
PUYAN LUHA’ 21: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
