KULUSE 3
3
1Allah lepa beteʹ ikem neng ca udip iaʹ mading pemung ngan Keristus. Tuman ina tekep kem pelek penawai hem neng puyan iaʹ kaʹ surga, iaʹ ina kukoʹ Keristus madung neng usun adan pengaren ne, kukoʹ iaʹ un penyukat pemung ngan Allah. 2Tekep kem lemuto nyalet kimet cem neng puyan iaʹ kaʹ surga ina, abeʹ e un neng puyan iaʹ kusun tanaʹ ini. 3Moʹ lepa ne ikem matai are. Ngan naʹkini udip kem un senuhuk dalem Allah pemung ngan Keristus. 4Iaʹ atek lan, pengudip kem ina ne Keristus. Ngan tegoʹ o ke nai luhaʹ ʹo, ikem, lete iaʹ ke luhaʹ pemung ngan ne, mentung ngkem ke kahum dalem serema peniga ha.
Udip puʹun ngan udip mading
5Tuman ina, tiga hem lematai penyaheʹ usa hem iaʹ ngala dalem ikem, koʹ baʹan puyan pemung nyelem, puyan iaʹ deram, pengubaʹ iaʹ jaʹat, kimet jaʹat, ngan tutun, (moʹ tutun ina koʹ baʹan ca pemuyan iaʹ ngelan uyat). 6Aheʹ kelunan iaʹ abeʹ un bayaʹ katuk Allah ina ban tuman puyan diaʹ jaʹat dina are, neng ida lete Allah ke pelaboʹ kenca ha. 7Dalau puyan jaʹat dina ngaren pengudip kem cen naʹaʹ are, puyan ncem lemuto bayaʹ penyaheʹ usa hem iaʹ jaʹat ina.
8Un sepuʹo naʹkini, tekep ne ikem pet mung puyan diaʹ pekini, koʹ baʹan miʹa, pengubaʹ iaʹ jaʹat, ngan miʹi neng dulu. Ngan pekina pe ayen peletoʹ ti isiu iaʹ ke pejaʹat kelunan, ngan isiu iaʹ jameng. 9Ayen ncem lemalo neng ahang ikem selepeʹ, moʹ lepa ne ikem sau penyaheʹ kem iaʹ puʹun, peging ngan kelayen adet te, 10sulo hem kanan penyaheʹ iaʹ mading. Ini ne kelunan iaʹ mading, iaʹ Allah nyelung ban uyan ina. Allah nengangan uyan layen ncem mading apan ne tai pekuaʹ ngan layen ne tengen, ngan apan penisen ncem neng Allah ketai sukung. 11Tuman ina, abeʹ un aheʹ iaʹ ilu ke kuma lepoʹ dulu diaʹ ca ngan lepoʹ Yahudi; laʹa diaʹ un sunat ngan diaʹ abeʹ un sunat; diaʹ penan ngan diaʹ aloʹ; diaʹ panyen ngan diaʹ paren. Di lareʹ Keristus ne iaʹ toʹ o mung, ngan Keristus ne iaʹ un dalem ida mung.
12Ikem ne diaʹ anun Allah. Allah iaʹ malaʹ ikem, ngan lemileʹ ikem tai nuyan diaʹ anun ne tengen. Tuman ina, tekep lete ikem ke un kimet malaʹ, puyan lesau, libaʹ tawai, lemaʹ saheʹ, ngan denaʹ tawai. 13Mepo ne ikem selepeʹ. Ngan buk ca usa neng ahang ikem ban un salaʹ neng dulu diaʹ ca, sau ne salaʹ ina neng ahang ikem selepeʹ. Kumpin Tuhan lepa sau penyalaʹ kem, pekina lete ikem ke sau penyalaʹ kem selepeʹ. 14Ngan pelaʹa, ngepit ne kimet cem malaʹ neng kelunan, moʹ puyan malaʹ ina ne iaʹ ke pebeka mung inu ketai pemung pebulung ngan daʹam. 15Udip tadan iaʹ Keristus lepa naʹ mikem ina, tiga hem uyan puyan ina iaʹ ke pebetep dau dalem kimet cem. Tuman Allah mengin ikem tai nuyan ca le usa, apan ncem dapit neng udip iaʹ tadan ina, mentung ngkem nyuaʹ tiga saheʹ palaʹ Allah.
16Tekep lete tiraʹ Keristus ina ngan mung peniga ha ke mudip dalem penawai hem. Pekalai ne ngan pekatuk ne ikem selepeʹ, man toʹ tekaʹ penudi hem. Ngentau ne man kentau Masmur, ngan kentau sebayang, ngan ngentau iaʹ nai cen berua hem. Ngentau ne palaʹ Allah, mentung ngkem nyuaʹ tiga saheʹ iaʹ nai cen penawai hem. 17Sen ne, mung inu iaʹ ikem uyan ngan iaʹ ikem pisiu, uyan ne man ngadan Tuhan Yesus, mentung ngkem nyuaʹ tiga saheʹ palaʹ Allah iaʹ Amai Bioʹ, ban kuʹun Tuhan Yesus ina.
Puyan le pepanak dalem udip iaʹ mading
18Mung ngkem leto diaʹ un laki, tunuk ne palaʹ laki hem. Tekep lete ikem ke uyan puyan diaʹ pekina moʹ kem nedanaʹ ikem diaʹ kelunan Keristin.
19Mung ngkem laki diaʹ un leto, malaʹ ne leto hem, ngan ayen ncem buseʹ neng ida.
20Mung ngkem anak, tiga hem lemuto tunuk palaʹ ueʹ ngan amai hem, moʹ ina ne puyan ncem iaʹ tekep ke nedanaʹ ikem kelunan Keristin, ngan iaʹ sihoʹ neng pengubaʹ Allah.
21Ahaʹ ikem diaʹ ueʹ ngan amai, ayen ncem nyakit kimet anak kem pa ha tai iʹut tawai.
22Mung ngkem diaʹ ulaʹ, tunuk ne palaʹ diaʹ tuʹa hem kusun tanaʹ ini neng toʹ naʹan pemuyan. Ayen ncem bang sanget tegoʹ diaʹ tuʹa hem un naʹat ikem tuaʹ le, apan nte ke pempau ngadan ncem, di lareʹ pegayeng ne ngan sebelang tekaʹ kimet cem, moʹ kem nyelama palaʹ Tuhan. 23Mele inu iaʹ gayeng ngkem, pegayeng ne ngan toʹ tekaʹ penyanget kimet cem, seleket tekaʹ kem ke pegayeng me Tuhan, abeʹ e me kelunan. 24Nawai ne, ikem lete iaʹ ke alaʹ bang ngkem cen Tuhan ʹo. Ikem ke alaʹ inu iaʹ Tuhan lepa petenup me diaʹ anun ne, moʹ iaʹ lan ne, ikem pegayeng me Keristus. 25Ngan kelunan iaʹ uyan jaʹat, mele aheʹ aheʹ pe, palaʹ ia lete Tuhan ke nyuaʹ puyan jaʹat iaʹ ia lepa ban uyan. Moʹ Allah iaʹ metep tiraʹ neng singket usa le kelunan ngan abeʹ un selepeʹ.
Currently Selected:
KULUSE 3: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
