1 KURINTUS 13
13
Pengemalaʹ
1Kenuen pe akeʹ senteng pisiu ngan mung naʹan isiu kelunan, ngan isiu melikat pe, un sepuʹo buk keʹ abeʹ un malaʹ ne, mung isiu heʹ are, kuaʹ baʹan dau ca tuyau angkung re, ngan sanang iaʹ mengengit dau. 2Kenuen pe akeʹ un pencai man nceʹ senteng pisiu seluhan isiu Allah, kenuen pe akeʹ un mung penisen, ngan iaʹ lesan neng iaʹ linget pe, kenuen pe pengelan nceʹ sukung pa heʹ senteng paso mudung pe, un sepuʹo buk keʹ abeʹ un malaʹ, abeʹ keʹ ke nuyan ca inu inu pe. 3Kenuen pe akeʹ naʹ mung inu heʹ naʹ tuaʹ me kelunan kasip, ngan ke mencai nutung usa heʹ pe, un sepuʹo buk keʹ abeʹ un malaʹ, abeʹ un bang ngkeʹ kuʹun ne.
4Un malaʹ ina ne puyan dadoʹ tawai, ngan puyan lesau. Malaʹ ne, abeʹ un ketiʹet te, abeʹ e selum neng usa ha tengen, abeʹ e balang dau. 5Un malaʹ ne, abeʹ e lepo adet temek, abeʹ e maʹam, abeʹ e buseʹ, abeʹ e nawai puyan jaʹat kelunan. 6Abeʹ e bangen neng puyan salaʹ, un sepuʹo un bangen ne neng isiu iaʹ telit. 7Buk le malaʹ ca kelunan, abeʹ le melak tekaʹ pa pa majan, ngan abeʹ tepa pengelan le neng ia, ngan abeʹ tepa tebelum le neng ia, pekina pe pengedadoʹ tawai le neng ia.
8Un malaʹ ne, abeʹ e ke un pengelepa ha. Un sepuʹo puyan iaʹ pisiu seluhan isiu Allah ke tai ie abeʹ un laʹa. Pekina pe pencai iaʹ pisiu ngan isiu bulen ke tai pekenaʹ, pekina pe pencai penisen ke tai abeʹ un laʹa. 9Moʹ un pencai penisen le abeʹ lepe sukung, ngan pencai le pisiu seluhan isiu Allah abeʹ lepe sukung. 10Un sepuʹo dalau puyan iaʹ sukung nai ʹo, puyan iaʹ abeʹ un sukung inaʹ abeʹ ke un laʹa ʹo.
11Dalau heʹ anak dumit are, isiu heʹ koʹ baʹan dau anak dumit, ngan tekaʹ keʹ koʹ baʹan tekaʹ anak dumit, ngan kimet ceʹ koʹ baʹan kimet anak dumit. Naʹkini lepa sukung bioʹ udip keʹ, puyan anak dumit idai are, abeʹ keʹ kanan ne laʹa. 12Moʹ penaʹat le naʹkini koʹ baʹan puyan kelunan iaʹ naʹat dalam ca kelingai iaʹ mabun, un sepuʹo dalau ina ʹo silung ke peseripa ngan silung. Naʹkini penisen nceʹ abeʹ lepe tai sukung, un sepuʹo dalau ina ʹo, akeʹ ke tisen kuaʹ baʹan Allah lepa tisen akeʹ.
13Cen kena ne diaʹ telu naʹan dini paget un, iaʹ ina pengelan, tebelum, ngan malaʹ, un sepuʹo iaʹ atek bioʹ mida, ia ne malaʹ.
Currently Selected:
1 KURINTUS 13: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
