1 KURINTUS 12
12
Pencai cen Berua Buheʹ
1Dau heʹ laʹa cenganak cenganak keʹ neng puyan iaʹ Berua Tuhan ke mencai milu.
Kimet ceʹ ubaʹ ikem ngetisen kidi. 2Tisen te ikem dalau hem un adet puʹun are, un bali uyat iaʹ ameng iaʹ lemuto pedancun ikem. 3Moʹ ina, tekep ikem iaʹ tisen moʹ kelunan aheʹ iaʹ pisiu seluhan Berua Tuhan Allah ina, abeʹ e senteng pisiu: “Pesataʹ ne Yesus.” Laʹa abeʹ un aheʹ iaʹ senteng pisiu: “Yesus ina Tuhan” buk Berua Buheʹ abeʹ un mampin ia.
4Un naʹan naʹan pencai iaʹ Berua Tuhan mencai milu, un sepuʹo Berua ina loʹ lete iaʹ mencai dina mung. 5Laʹa un pe naʹan naʹan janan le pegayeng me Tuhan, un sepuʹo Tuhan ina loʹ lete iaʹ ngkang gayeng ina. 6Laʹa un naʹan naʹan senganan man le ke pegayeng me Allah, un sepuʹo Allah loʹ lete iaʹ naʹ senganan me singket usa iaʹ pegayeng mia. 7Neng singket usa le un ca puyan iaʹ badaʹ ban Berua Tuhan un nengangan ke pawat bang nge tipo Mpun diaʹ ngelan Tuhan. 8Moʹ neng ca usa un Berua Tuhan iaʹ naʹ ca isiu iaʹ tudi. Ngan neng diaʹ ca Berua Tuhan ina loʹ lete iaʹ naʹ ca isiu penisen. 9Berua Tuhan loʹ lete iaʹ naʹ ca puyan pengelan me ca usa, mentung nge naʹ penyukat ke paget kelunan me diaʹ ca. 10Berua Tuhan ina iaʹ naʹ penyukat uyan puyan nyingan me ca usa, ngan neng diaʹ ca un pencai man ne pisiu seluhan isiu Allah, ngan neng diaʹ ca laʹa un penyukat man ne senteng nugen iaʹ tekajaʹ puyan pencai iaʹ nai cen Berua Tuhan ngan pencai iaʹ nai cen bali. Neng ca usa laʹa ia naʹ penyukat man ne ke pisiu isiu bulen. Pekina pe neng diaʹ ca ia naʹ penyukat man ne ke petisen ilu neng sen isiu bulen are. 11Un sepuʹo mung puyan ina iaʹ nuyan kuʹun Berua iaʹ bang ca le ina. Ca naʹan pencai ia naʹ me singket usa le bayaʹ ban pengubaʹ a tengen.
Ca le usa, kadoʹ diaʹ sangat te
12Bang ca le usa ne Keristus, koʹ baʹan usa kelunan. Naʹ pe sangat te kadoʹ, usa ha ca tuaʹ le, kenuen pe kadoʹ naʹan tulat dalem me. 13Kuaʹ baʹan puyan usa lete ilu mung. Ikem lepoʹ Yahudi, pekina pe ikem diaʹ tahaʹ awang lepoʹ Yahudi, pekina pe kelunan ulaʹ, ngan diaʹ muga tekaʹ mudip, ilu mung ban sihoʹ ngebatis kuʹun Berua Tuhan, ketai nuyan ca usa tuaʹ le. Ngan Berua Tuhan loʹ lete iaʹ nuyan milu seleket telang sio iaʹ ilu senteng nisep.
14Moʹ usa ina, abeʹ e nuyan ca le sangat te, di lareʹ kadoʹ. 15Buk taket iaʹ kuma ha: “Akeʹ, abeʹ keʹ ca ujoʹ. Moʹ ina abeʹ keʹ kahum neng usa.” Abeʹ e pesau neng usa tuman dau ina ne. 16Laʹa buk telinga iaʹ kuma ha: “Akeʹ, abeʹ keʹ ca mata. Moʹ ina abeʹ keʹ kahum neng usa.” Abeʹ e pesau neng usa tuman dau ina ne. 17Buk mung usa ina nuyan ca mata le, kempi ie ke kenahan ʹo tupe? Ngan buk ke nuyan ca telinga tuaʹ le, kempi ie ke madek ʹo tupe? 18Un sepuʹo iaʹ lan ne, Allah lepa metuk singket naʹan sangat neng ca usa, marung bayaʹ pengubaʹ a. 19Buk ke nuyan ca sangat tuaʹ le, usa ha abeʹ un. 20Iaʹ lan ne, kadoʹ naʹan sangat nuyan ca le usa.
21Ban ne pekina, abeʹ senteng mata kuma ha neng ujoʹ: “Abeʹ keʹ pesingo neng ikoʹ.” Pekina pe abeʹ senteng ulu kuma ha neng taket: “Abeʹ keʹ pesingo neng ikoʹ.” 22Di lareʹ mung sangat le iaʹ lemaʹ seʹ dalem usa le, abeʹ senteng are un. 23Ngan sangat usa le diaʹ ilu kuma ha abeʹ un inu ne, ilu nubo tiga ne. Pekina pe sangat le diaʹ ilu kuma iaʹ abeʹ un tiga seʹ ina, ilu pegelam nte ngan tiga lan, 24lapa neng ʹo sangat diaʹ ilu kuma tiga. Allah tengen iaʹ peteneng usa kelunan ngan puyan selama neng palai sangat usa diaʹ tepet neng selama. 25Un pekina puyan ne apan abeʹ un tai pasi dalem usa, un sepuʹo mung naʹan sangat te ke mepo ida peselepeʹ. 26Buk ca sangat te un tekaʹ sakit, mung sangat te diaʹ ca pekuaʹ ketisen tekaʹ sakit lete. Buk ca sangat dina ketai pejung, mung sangat dina kuaʹ un bangen.
27Pekina te ikem mung diaʹ usa Keristus, ngan singket cem iaʹ sangat te. 28Pekina lete puyan le dalem Mpun, moʹ Tuhan Allah iaʹ pempun ilu neng ca tuaʹ le, ading nge diaʹ lawa Injil, kedua ha diaʹ pegawa Allah, iaʹ ketelu ue diaʹ guru Injil, uʹo ina diaʹ uyan puyan nyingan, uʹo ina pelaʹa diaʹ un penyukat ke paget kelunan, ngan mepo kelunan, ngan diaʹ senteng peteneng gayeng, ngan diaʹ pisiu isiu bulen. 29Abeʹ e mung nte lawa Injil, buk are diaʹ pegawa Allah, buk are diaʹ guru Injil. Abeʹ de mung un penyukat sukat uyan puyan nyingan, 30pekina pe paget kelunan sakit, ngan pisiu isiu bulen, ngan petisen ilu neng sen isiu bulen are. 31Un sepuʹo naten ne ikem mita pencai iaʹ bioʹ bang nge.
Ca janan iaʹ lapa tiga neng ʹo taten ina, pekini ie:
Currently Selected:
1 KURINTUS 12: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
