Zefaniya 3
3
Inzambi ya Yerusalemu na Ukukombolighwa
1Watsochona iwanu wa ghumji ghwa Yerusalemu, ghumji ghwa iwanu iwamlemile IMNDEWA na iwehile, na iwowadununza iwanu na kutenda ighehile. 2Ng'aghumtegheletsa munu wowose baye, wala ng'aghutoghola baye ukukanyighwa. Ng'aghumlolela IMNDEWA baye, wala ng'aghumsoghelela habehi baye ghumlombe Imulungu wake. 3Pfilongotsi wake wakulu weghala na isimba iyodumilila, walamlitsi wake weghala na yumbwa wa kwibagho yana inzala, yang'aghogha imnyama nemihe komja mbaka nemitondo na ng'oleka chinu chochose baye. 4Manabii wake wana chidandali na waghutsu. Iwatambika wake wapfitenda ipfinu pfelile pfihe, na ng'awokinda keli baye ghamalaghitso. 5Lekeni IMNDEWA iyali mghati mwake kotenda ighali gha haki, yeye ng'otenda ighehile baye. Chila nemitondo yeye kolangusa apfila pfayohigha pfinoghile, wala ng'oleka baye ukutenda apfo. Lekeni awala iwotenda ghehile wahela chinyala ghendo. 6IMNDEWA kolonga, “Niwadumulila kutali iwanu wa isi tsingi, ubanda wao na minala yawo niibomola, tsinzila tsawo nitsihinya na mduhu munu yopfosa amwo. Imiji yawo imwaghighwa yahela munu, wala kuduhu iwanu iwokala.” 7Apfo nilongela nimwenyegho, “Iwanu wa ghumji aghuno watsonipfuka ghendo, na watsotoghola kukanyighwa, apfo tsing'anda tsawo ng'atsitsobomolighwa baye. Hata ka tsawona ghengo apfila pfaniwatowile iwanu isi tsingi, lekeni wawo tsawalamka nemitondo tondo watende ghehile.” 8IMNDEWA kolonga, “Apfo nibeteni nene mbaka litsuwa lyanitsakutsa kuwaboka chila chinu. Kwaapfila nilamla kuwatinganitsa hamwe iwanu wa isi tsingi na tsifalume ili wone apfila pfanighudubuke, na wone apfila imaya yangu pfailakatsa kwaapfila isi yose itsolakatsighwa kwa imaya yangu ayo ilakatsa ka ghumoto. 9Kuya nitsowatenda iwanu wa isi tsingi walonge achila ichilongesa, nawo wose watsomlomba IMNDEWA yaliyeka na watsomsang'anila kwa ghumoyo ghumwe. 10Iwanu wangu iwapwilike iwakalile kumwambu mwa ghumto ghwa Kushi, watsomtsila kumlomba IMNDEWA nawo watsomlapfila nambiko. 11Mna Litsuwa alyo ng'amtsakwona chinyala baye kwa aghala ghehile ghamtendile kwaapfila nitsowalapfa mna mwemwe awala wose iweghoda na iwotamba. Namwe ng'amtsakuwa na chidandali baye mna chidunda changu chelile. 12Lekeni nitsowaleka mna mwemwe iwanu wahole na iwalihela chidandali, nawo watsomtsumila IMNDEWA yawakinge. 13Waisiraeli iwatsolekighwa wagima ng'awatsotenda baye ghehile, wala ng'awatsolonga ughutsu baye, na kutsakuwa kuduhu munu wowose iyatsobugha iwanu. Kwaapfila watsakuja na kuwasa, na kutsakuwa kuduhu imunu iyatsowatenda wapfuke.”
Wila wa ndeng'elo
14Ghweghwe Sayuni wimbe, ghweghwe Isiraeli kemelela.
Sekelela na udeng'elele kwa ghumoyo ghose ghweghwe Yerusalemu!
15Kwaapfila IMNDEWA kaleka kukuhigha,
kawoyitsa kuchughu maadui tsako,
IMNDEWA, mfalume wa Isiraeli katsokala hamwe naghwe,
naghwe ng'utsopfuka baye chinu chochose chihile.
16Mna litsuwa alyo iwanu watsoghulongela apfino ghumji ghwa Yerusalemu,
“Uleke kupfuka ghweghwe Sayuni,
ghamoko ghako ghaleke kuleghela.
17Kwaapfila IMNDEWA Imulungu wako kokala hamwe naghwe,
yeye kana ngupfu, naye katsokukombola,
yeye katsokudeng'ela aku kosekelela ghendo,
katsokudeng'ela aku kokwimbila,
katsokwing'a ugima ungi kwaapfila ghweghwe konoghelwa naye.”
18IMNDEWA kolonga,
“Nitsowatinganitsa hamwe iwanu wose iwonile usungu,
kwaapfila ng'awadeng'elele baye ipfihungo pfaniwalaghitse wadeng'elele,
chinu achino chiwatenda wone chinyala na tsachoneka mtsigho kuna wawo.
19Lola, mna litsua alyo nitsowahigha iwanu wose iwakutendile ughaye,
nitsowakombola ipfimbete na kuwoyitsa hamwe awala wose iwawingighwe kutali,
nitsowatenda iwanu wawatunitse na wawatoghole mna chila isi yawaghelighwe chinyala.
20Mna litsua alyo nitsowatinganitsa hamwe, kuya nitsowoyitsa ukaye,
nitsowatenda iwanu wawatunitse na wawatoghole mna chila isi,
namwe mtsolola kwa tsinenge tsenu apfila pfanitsowatenda mbwede keli.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose